ఉమ్మడి ఆదిలాబాద్‌ జిల్లాలో కళతప్పిన సంక్రాంతి

రైతు ముఖంపై విరబూసే చిరునవ్వే ఏ పండగకైనా ప్రత్యేకత. అందులో సంక్రాంతి పండగంటేనే ఎనలేని ఆనందం ఉంటుంది. కానీ ఈ ఏడాదలా కనిపించడంలేదు. ప్రకృతి ప్రతికూల ప్రభావంతో పంటల దిగుబడి సగానికి పడిపోయింది. పంట కోసం పెట్టిన పెట్టుబడితో పాటు రైతులు చేసిన శ్రమకు సైతం ఫలితం లేకుండా పోయింది. నాణ్యమైన పత్తిపంటకు ఖండాంతర ఖ్యాతి గడించిన ఆదిలాబాద్‌ జిల్లాలో కళతప్పిన సంక్రాంతి పండగ... రైతుల నిర్వేదంపై ప్రత్యేక కథనం.

ఉమ్మడి ఆదిలాబాద్‌ జిల్లాలో సంక్రాంతి పండగ శోభ కనిపించడంలేదు. రైతుల్లో మునుపటి ఆనందం అగుపించట్లేదు. ఉమ్మడి జిల్లాలో దాదాపు 5.70లక్షల హెక్టార్లు సాగు విస్తీర్ణం ఉంటే... 3.5 లక్షల హెక్టార్లలో పత్తి పంట సాగైంది. మరో లక్షా 25వేల ఎకరాల్లో సోయా పంట సాగైంది. ఖరీఫ్‌ ఆరంభంలో వానలు అనుకూలంగానే కురిసినా... ఆ తరువాత ముఖం చాటేశాయి. ఈ ప్రభావంతో ఒకటికి రెండుసార్లు విత్తనాలు వేయాల్సి రావటం వల్ల ప్రతి రైతుపై రెట్టింపు భారం పడింది. బీటీ అనే ఒకే మాట తప్ప... వాటి తయారి కంపెనీ ఏదీ..? విత్తన నాణ్యత ఏమిటీ...? అనే అంశాలను వ్యవసాయశాఖ పరిగణలోకి తీసుకోకపోవడం వల్ల మొక్కదశలోనే రైతులు ఒకటికి రెండుసార్లు నష్టపోవాల్సి వచ్చింది. దానికితోడు గులాబీ రంగు, కాయకుళ్లు తెగులు ఆవరించటం వల్ల ఎకరాకు రూ. 20వేలు పెట్టుబడి నుంచి రూ.40 వేల వరకు పెట్టుబడి ఖర్చు పెరిగింది. అయినా... అశించిన దిగుబడి రాలేదు.

సగం కూడా రాలేదు...

తొలుత ఆదిలాబాద్ జిల్లా తలమడుగు, తాంసి, ఆదిలాబాద్‌, బేల, ఇంద్రవెల్లి, ఇచ్చోడ, బోథ్‌ మండలాల్లో ప్రారంభమైన కాయకుళ్లు తెగులు తరువాత ఉమ్మడి జిల్లా అంతటా విస్తరించింది. ఎకరాకు కనీసం 10 క్వింటాళ్లు రావాల్సిన పత్తి దిగుబడి... ఐదు క్వింటాళ్లకు మించడం గగనమైపోయింది. ప్రభుత్వ సూచనతో ఉమ్మడి జిల్లా వ్యాప్తంగా 4.50 లక్షల మంది రైతుల్లో దాదాపుగా 3.50 లక్షల మంది రైతులు పత్తి సాగు చేసినప్పటికీ.. ఆశించిన దిగుబడి రాక.. కాలపరీక్షను ఎదుర్కోవాల్సి వచ్చింది. ఫలితంగా రైతు కుటుంబాల్లో సంక్రాంతి పండగ సంబురం ఆవిరైంది. పలకరిస్తే నిర్వేదపూరితమైన వేదననే వినిపిస్తోంది.

పశువుల మేతగా పంటచేల్లు...

పత్తి దిగుబడి తగ్గడం వల్ల పారిశ్రామిక రంగంపై కూడా ప్రభావం చూపింది. ఆదిలాబాద్‌ జిల్లాలో దాదాపుగా సగం పత్తి జిన్నింగు పరిశ్రమలు తెరుచుకోనేలేదు. కేంద్రం నిర్ణయించిన మద్దతు ధర రూ.5825 చొప్పున భారత పత్తి సంస్థ (సీసీఐ) పత్తి కొనుగోళ్లకు ముందుకురావడం వల్ల రైతుల్లో ఆనందం కనిపించింది. ఆ తరువాత సరుకులో నాణ్యత తగ్గడం వల్ల మద్దతు ధరను కూడా రూ.5725కు తగ్గించారు. ఈ ఏడాది 98 లక్షల క్వింటాళ్ల పత్తి దిగుబడి వస్తుందని వ్యవసాయ శాఖ అంచనా వేసినా... సీజన్‌ ముగిసిపోతున్నప్పటికీ కేవలం 60లక్షల క్వింటాళ్లు దాటడం లేదు. భైంసా, బోథ్‌, ఆసిఫాబాద్‌, ఇంద్రవెల్లి, నార్నూర్‌ లాంటి ఏజెన్సీ ప్రాంతాల్లో పంటచేలను పశువులకు వదిలేయాల్సి రావడం వల్ల పండగ ప్రాభావమే కనిపించడంలేదు. తగ్గిన దిగుబడులతో పండగ ప్రాశస్థ్యం లేకుండా పోయిందనే భావన వ్యాపార, అధికార వర్గాల్లోనూ వినిపించడం ప్రతికూల పరిస్థితులకు అద్దంపడుతోంది.

అన్నివిధాలుగా నష్టపోయిన ఉమ్మడి ఆదిలాబాద్ జిల్లా రైతులకు... రెండేళ్లుగా పంటల బీమా పరిహారం డబ్బులు కూడా పంపిణీ కాలేదు. రైతులు బీమా ప్రీమియం చెల్లించినప్పటికీ... కేంద్ర, రాష్ట్ర ప్రభుత్వాలు ప్రీమియం చెల్లించకపోవడం వల్ల పరిహారం పంపిణీలో రెండేళ్లుగా ప్రతిష్ఠంభన నెలకొంది. రైతులకు ఏవిధంగానూ... ప్రయోజనం చేకూరకపోవడం వల్ల సంక్రాంతి సంబురం కనిపించకుండా పోతోంది.

ఇదీ చూడండి:రాష్ట్ర ప్రజలకు సంక్రాంతి శుభాకాంక్షలు తెలిపిన సీఎం కేసీఆర్‌