నిమిషానికి 1,244 బిర్యానీలు​ - ఓయోలో 6.2 లక్షల బుకింగ్స్ - న్యూ ఇయర్​ సెలబ్రేషన్స్​ ఎఫెక్ట్

Zomato, Swiggy, OYO Rooms Register Record Orders And Bookings On New Years Eve In Telugu : కొత్త ఏడాది ప్రారంభంలో జొమాటో, స్విగ్గీ లాంటి ఫుడ్​ డెలివరీ అండ్ క్విక్ కామర్స్ ప్లాట్​ఫామ్​లు రికార్డ్ స్థాయిలో ఆర్డర్లను బట్వాడా చేశాయి. మరోవైపు ఓయో రూమ్ బుకింగ్స్ కూడా రికార్డ్ స్థాయిలో జరిగాయి. ఇక్కడ ఆశ్చర్యకరమైన విషయం ఏమిటంటే, ఎక్కువ మంది రాముని జన్మ స్థలమైన ఆయోధ్యలోని రూమ్స్​ బుక్​ చేసుకున్నారు. పూర్తి వివరాలు మీ కోసం.

Zomato, Swiggy, OYO Rooms Register Record Orders And Bookings On New Years Eve : నూతన సంవత్సర వేడుకల సందర్బంగా జొమాటో, స్విగ్గీ లాంటి ఫుడ్​ డెలివరీ ప్లాట్​ఫామ్​లు రికార్డ్ స్థాయిలో ఆర్డర్లను డెలివరీ చేశాయి.

జొమాటో టిప్సే రూ.97 లక్షలు!
జొమాటో ప్లాట్​ఫామ్​లో 2015 -2020 మధ్య ఎన్ని ఆర్డర్లు అయితే బుక్ అయ్యాయో, అన్ని ఆర్డర్లు ఒక్క 2023 డిసెంబర్​ 31నే బుక్ కావడం విశేషం.

"2015 నుంచి 2020 వరకు ఎన్ని ఆర్డర్లు అయితే వచ్చాయో, అన్ని ఆర్డర్లు ఒక్క ఈ డిసెంబర్​ 31నే రావడం విశేషం. ఇది మంచి భవిష్యత్​ను సూచిస్తోంది."
- దీపేందర్​ గోయెల్​, జొమాటో సీఈఓ

సుమారుగా 3.2 లక్షల మంది జొమాటో డెలివరీ పార్టనర్లు ఈ ఆర్డర్లను బట్వాడా చేశారని కంపెనీ తెలిపింది. కంపెనీ ప్రకారం, అన్నింటి కంటే ఎక్కువగా మహారాష్ట్రలోనే ఆర్డర్లు బుక్​ అయ్యాయి. కోల్​కతాలో ఒక వ్యక్తి ఏకంగా 125 ఐటెమ్​లను ఆర్డర్ చేశాడు. విశేషం ఏమిటంటే, జొమాటో డెలివరీ బాయ్స్​కు ఈ ఒక్క రోజులోనే రూ.97 లక్షల మేరకు టిప్స్​ లభించాయి.

స్విగ్గీ రికార్డ్ ఆర్డర్స్​
స్విగ్గీ ఇన్​స్టామార్ట్​ కూడా డిసెంబర్​ 31న రికార్డ్ స్థాయిలో ఆర్డర్లను డెలివరీ చేసింది. వరల్డ్ కప్ ఫైనల్స్ జరిగినప్పుడు వచ్చిన ఆర్డర్లు కంటే, ఏకంగా 1.6 రెట్లు అధికంగా ఇయర్ ఎండ్​ ఈవ్​ ఆర్డర్లు వచ్చాయని స్విగ్గీ తెలిపింది.

"వరల్డ్​ కప్ ఫైనల్స్ జరిగినప్పుడు వచ్చిన ఆర్డర్లు కంటే, అధికంగా ఇయర్ ఎండ్​ ఈవ్ ఆర్డర్లు వచ్చాయి. దీనితో గత రికార్డులు అన్నీ చెదిరిపోయాయి."
- రోహిత్​ కపూర్​, స్విగ్గీ సీఈఓ

4.8 లక్షల బిర్యానీ ఆర్డర్లు
నూతన సంవత్సర వేడుకలు సందర్భంగా ఒక్క హైదరాబాద్​లోనే ఏకంగా 4.8 లక్షల బిర్యానీ ప్యాకెట్లు డెలివరీ చేసినట్లు స్విగ్గీ తెలిపింది. ఇంకా క్లారిటీగా చెప్పాలంటే, ప్రతి నిమిషానికి 1244 ఆర్డర్లు వచ్చాయని స్పష్టం చేసింది. చివరి గంటలో సుమారుగా 10 లక్షల మంది స్విగ్గీ యాప్​ను ఉపయోగించారని ఆ కంపెనీ సీఈఓ రోహిత్ కపూర్ తెలిపారు.

భారీ స్థాయిలో కండోమ్స్ ఆర్డర్​
న్యూ ఇయర్ సెలబ్రేషన్స్​ సమయంలో ప్రతి గంటకు 1722 యూనిట్ల కండోమ్స్​ ఆర్డర్లు వచ్చాయని ​స్విగ్గీ ఇన్​స్టామార్ట్​తెలిపింది.

కిరాణా సామాన్లు కూడా
స్విగ్గీ ఇన్​స్టామార్ట్​లో డిసెంబర్​ 31న రెండు లక్షల కిలోల ఉల్లిపాయలు, 1.80 లక్షల కిలోల బంగాళా దుంపలు ఆర్డర్ చేశారు.

ఓయో రూమ్ బుకింగ్స్​
నూతన సంవత్సరం వేడుకల్లో భాగంగా ఓయో రూమ్ బుకింగ్స్​ కూడా రికార్డ్ స్థాయిలో జరిగాయి. గతేడాదితో పోల్చితే ఈ సంవత్సరం 37 శాతం (6.2 లక్షల) రూమ్ బుకింగ్స్ జరిగాయి. ఇంకా కచ్చితంగా చెప్పాలంటే, కేవలం డిసెంబర్​ 30, 31 తేదీల్లోనే ఏకంగా 2.3 లక్షల ఓయో రూమ్స్​ బుక్ అయ్యాయి. ఇక్కడ విశేషం ఏమిటంటే, హిందూ పవిత్ర స్థలమైన అయోధ్యలో గతేడాదితో పోలిస్తే 70 శాతం అధికంగా, గోవాలో 50%, నైనిటాల్​లో 60% ఎక్కువగా ఓయో రూమ్స్ బుక్ అయ్యాయి.