WPI Inflation: ఇంధనం, ఆహారం, ఇతర వస్తువుల ధరల పెరుగుదల కారణంగా ఏప్రిల్లో టోకు ధరల ఆధారిత ద్రవ్యోల్బణం (డబ్ల్యూపీఐ) అత్యధికంగా 15.08 శాతంగా నమోదైంది. మార్చిలో ఇది 14.55 శాతంగా ఉండగా, గతేడాది ఏప్రిల్లో 10.74శాతంగా నమోదైంది. మినరల్ ఆయిల్స్, బేసిక్ మెటల్స్, క్రూడ్ పెట్రోలియం, నేచురల్, ఫుడ్ ఆర్టికల్స్, నాన్ ఫుడ్ ఆర్టికల్స్, ఆహార ఉత్పత్తులు, కెమికల్స్, కెమికల్ ప్రొడక్ట్స్ ధరలు పెరగడమే ద్రవ్యోల్బణ ఎగబాకడానికి కారణమని వాణిజ్య, పరిశ్రమల మంత్రిత్వ శాఖ ఓ ప్రకటనలో తెలిపింది.
- గతేడాది ఏప్రిల్ నుంచి వరుసగా 13వ నెలలోనూ డబ్ల్యూపీఐ రెండంకెల స్థాయిలో కొనసాగుతోంది.
- ఏడాది కాలంగా కూరగాయలు, గోధుమ, పండ్లు, ఆలుగడ్డల ధరలు పెరగడం వల్ల ఆహార ద్రవ్యోల్బణం 8.35శాతంగా ఉంది
- ఇంధనం, విద్యుత్ రంగాల్లో ద్రవ్యోల్బణం 38.66 శాతంగా, ఉత్పత్తి వస్తువుల్లో 10.85శాతం, నూనె గింజల్లో 16.10 శాతంగా ఉంది.
- ముడి చమురు, సహజ వాయువు విభాగంలో ఏప్రిల్ నెలలో ద్రవ్యోల్బణం 69.07గా నమోదైంది.
- ఏప్రిల్లో రిటైల్ ద్రవ్యోల్బణం ఎనిమిదేళ్ల గరిష్ఠానికి చేరుకొని 7.79శాతంగా ఉన్నట్లు ప్రభుత్వం గతవారం లెక్కలు విడుదల చేసింది. ఇది వరుసగా నాలుగో నెలలో రిజర్వ్ బ్యాంక్ ద్రవ్యోల్బణ లక్ష్యం కంటే ఎక్కువగా నమోదైంది.
- అధిక ద్రవ్యోల్బణాన్ని అదుపు చేయడానికి ఈ నెలారంభంలో అనూహ్యంగా కీలక వడ్డీ రేట్లను 0.40శాతం, సీఆర్ఆర్ను 0.50శాతం పెంచింది ఆర్బీఐ.