Working 70 Hours A Week Pros And Cons : అభివృద్ధి చెందిన దేశాల సరసన భారతదేశం చేరాలంటే.. నేటి యువత వారానికి కనీసం 70 గంటలైనా పనిచేయాలని ఇన్ఫోసిస్ వ్యవస్థాపకులు నారాయణమూర్తి అభిప్రాయపడ్డారు. ఇది చాలా మంచి ఆలోచన అని చెప్పకతప్పదు.
ఒక దేశం అభివృద్ధి చెందాలంటే, కచ్చితంగా యువత కష్టపడి పనిచేయాలి. రెండో ప్రపంచ యుద్ధం జరిగిన తరువాత జపాన్, జర్మనీ ఇలానే కష్టపడి పనిచేసి, అభివృద్ధి సాధించాయి. అందుకే మన దేశ యువతీయువకులు కూడా ఇలానే పనిచేయాలని నారాయణమూర్తి ఇచ్చిన సలహాకు.. పలువురు బడా సంస్థలు యజమానులు, సీఈవోలు మద్ధతు ఇస్తున్నారు.
అయితే ఇక్కడ ఉదయించే ఒక ప్రశ్న ఏమిటంటే.. దేశం సంపన్నం కావడం అంటే.. ప్రజలు సంపన్నులు కావడమా? కార్పొరేట్ సంస్థలు, వాటి యాజమానులు లాభాలు సంపాదించడమా?
కొంత మంది చేతుల్లోనే సంపద!
ప్రపంచంలో జీడీపీ ర్యాంకింగ్స్లో మన భారతదేశం 5వ స్థానంలో ఉంది. అంటేఈ లెక్కన మన దేశం కచ్చితంగా సంపన్న దేశమే. దీనిని చూసి మనం గర్వించాల్సిందే. ఇక్కడ వరకు బాగానే ఉంది. మరి మన భారతీయులు అందరూ సంపన్నులుగానే ఉన్నారా?
- భారతదేశంలో 60శాతం సంపద కేవలం 5 శాతం మంది ధనికుల చేతిలో ఉంది. దేశంలోని చివరి 50 శాతం మంది సామాన్యుల దగ్గర కేవలం 3 శాతం సంపద మాత్రమే ఉంది. Oxfam India రిపోర్ట్ చూస్తే ఈ విషయం స్పష్టంగా తెలుస్తుంది.
- Survival of the Riches: The India Story నివేదిక ప్రకారం, దేశ ప్రజలు కష్టపడి పని చేసి సంపద సృష్టిస్తుంటే.. ఆ సంపదలో 40 శాతం నేరుగా 1 శాతం ఉన్న బిలయనీర్స్ జేబుల్లోకి పోతోంది. సమాజంలో అట్టడగున ఉన్న 50 శాతం సామాన్యులకు మాత్రం కేవలం 3 శాతం మాత్రమే చేరుతోంది.
ధనవంతులు పెరుగుతున్నారు!
2020 నుంచి 2022 వరకు ఉన్న గణాంకాలను చూసుకుంటే.. దేశంలోని బిలియనీర్ల సంఖ్య 102 నుంచి 166కు పెరిగింది. అంటే దేశ ప్రజలు సృష్టించిన సంపద.. కొద్ది మంది ధనవంతుల ఇళ్లల్లోనే పోగుపడుతోంది. కానీ కష్టించి పనిచేసే పేదల జీవితాలు.. ఏ మాత్రం మెరుగుపడడం లేదు. ఇదంతా చూస్తుంటే.. మన భారతదేశం ప్రపంచంలోనే 5వ అతిపెద్ద ఆర్థిక వ్యవస్థగా ఎదగడం వల్ల ఎవరికి ప్రయోజనం కలిగిందో, కలుగుతోందో తెలుసుకోవచ్చు.
ఉద్యోగులు కష్టపడి పనిచేస్తే.. ధనవంతులు అవుతారా?
భారతీయ యువతీయువకులు ఉన్నత చదువులు చదువుకొని, "కష్టపడి పనిచేయడానికి మేము సిద్ధంగా ఉన్నాం. ఉద్యోగాలు కల్పించడం మహాప్రభో" అని ప్రభుత్వాలను, ప్రైవేట్ సంస్థలను వేడుకుంటున్నారు. సింపుల్గా చెప్పాలంటే నిరుద్యోగంతో కొట్టుమిట్టాడుతున్నారు.
మరికొందరు తమ చదువులకు, సామర్థ్యాలకు తగిన ఉద్యోగాలు లేక 'అల్ప నిరుద్యోగం'తో బాధపడుతున్నారు. ఉదాహరణకు ఒక మేనేజర్ స్థాయిలో పనిచేయాల్సిన వ్యక్తి, బంట్రోతుగా పనిచేస్తూ జీవితాన్ని వెల్లబుచ్చుతున్నాడు.
ఉద్యోగం సంపాదించినవారు సుఖంగా ఉన్నారా?
ఉద్యోగం సంపాదించిన వారిలో రెండు రకాల కేటగిరీలవారు ఉన్నారు. ఒకరు ప్రభుత్వ ఉద్యోగులు, మరొకరు ప్రైవేట్ ఉద్యోగులు. ప్రభుత్వ ఉద్యోగుల్లోనూ నీతికి, నిజాయితీకి మారుపేరుగా ఉండి, కర్తవ్య నిర్వహణే ధ్యేయంగా పనిచేసేవారు కొందరు ఉన్నారు. ఇది నిజం. కానీ పనిచేయని ప్రభుత్వ ఉద్యోగులే ఎక్కువ మంది ఉన్నారనేది కఠోరమైన వాస్తవం. దేశం వెనుకబడి ఉండడానికి ఇలాంటివారే కారణం అని చెప్పడానికి ఎలాంటి సంశయం అక్కరలేదు.
ఇప్పుడు ప్రైవేట్ ఉద్యోగుల సంగతి చూద్దాం. సరైన శక్తి, సామర్థ్యాలు లేకుండా ఎవ్వరూ ప్రైవేట్ ఉద్యోగాలు సంపాదించలేరు. ఇలా సంపాదించినవారు కచ్చితంగా కష్టపడి పనిచేయాల్సిందే. ఎందుకంటే.. పనిచేయని, సామర్థ్యం లేని ఉద్యోగులను ప్రైవేట్ సంస్థలు ఏ మాత్రం ఉపేక్షించవు.
మానసిక ఆరోగ్యం పరిస్థితి ఏమిటి?
ప్రైవేట్ సంస్థలు తమ ఉద్యోగుల చేత వీలైనంత ఎక్కువ సమయం, ఎక్కువ పని చేయించాలని భావిస్తాయి. కొన్ని సంస్థలు అయితే ఎక్స్ట్రా డ్యూటీ కూడా చేయమంటాయి. కొన్ని ప్రత్యేక సందర్భాల్లో సెలవులను కూడా రద్దు చేస్తాయి. ఇవన్నీ ఆ ఉద్యోగుల మీద ఒత్తిడిని పెంచుతాయి.
ప్రాజెక్టుల విషయానికి వస్తే.. అది మరింత దారుణంగా ఉంటుంది. ఒక నెలలో చేయాల్సిన పనిని కేవలం 10 రోజుల్లోనే కంప్లీట్ చేయాలని ఉద్యోగులకు టార్గెట్ విధిస్తూ ఉంటారు. దీని వల్ల ఆ పనిని పూర్తి చేయడానికి సదరు ఉద్యోగి ఓవర్ టైమ్ పనిచేస్తాడు. లేకుంటే బాస్ తిడతాడని, ఉద్యోగం పోతుందనే భయం. ఈ మానసిక సంఘర్షణతోనే ఉద్యోగుల జీవితాలు గడిచిపోతున్నాయి.
ఆరోగ్య సమస్యలు వస్తున్నాయి!
షిఫ్ట్ల్లో పనిచేసే ఉద్యోగుల పరిస్థితి మరీ దారుణంగా ఉంటుంది. కొన్ని సంస్థలు నైట్ షిప్ట్ తరువాత, ఏమాత్రం గ్యాప్ ఇవ్వకుండా నెక్ట్స్ షిఫ్ట్ కూడా పనిచేయిస్తుంటాయి. దీని వల్ల వారి ఆరోగ్యంపై తీవ్రమైన ప్రభావం పడుతుంది. దీనితో తాము కష్టపడి సంపాదించినది అంతా వైద్యానికి దారపోసే పరిస్థితి ఏర్పడుతుంది.
మరీ ముఖ్యంగా టైమ్ బేస్డ్ ప్రాజెక్ట్ చేసేవారు.. టార్గెట్లోగా పనిని పూర్తి చేయలేక తీవ్రమైన ఒత్తిడికి గురువుతారు. దీనితో వారు అతిగా టీ, కాఫీలు, డ్రింక్స్ తాగుతుంటారు. ఒత్తిడిలో అతిగా జంక్ ఫుడ్స్ తీసుకుంటూ ఉంటారు. దీని వల్ల తీవ్రమైన అనారోగ్య సమస్యలు వారిని చుట్టుముడతాయి.