Ujjwala Yojana Free Gas Cylinder : కేంద్రం శుభవార్త.. ఉచితంగా మరో 75 లక్షల వంట గ్యాస్​ కనెక్షన్లు

Ujjwala Yojana Free Gas Cylinder : దేశ ప్రజలకు కేంద్ర ప్రభుత్వం తీపి కబురు చెప్పింది. ప్రధాన మంత్రి ఉజ్వల యోజన రెండో దశ కింద మరో 75 లక్షల ఎల్​పీజీ కనెక్షన్లను అందించడానికి నిర్ణయం తీసుకుంది. ఈ పథకం కోసం 1650 కోట్లను కేటాయించింది.

Ujjwala Yojana Free Gas Cylinder :దేశ ప్రజలకు కేంద్రం శుభవార్త తెలిపింది. ప్రధానమంత్రి ఉజ్వల యోజన- పీఎమ్​యూవై రెండో దశ కింద మరో 75 లక్షల ఎల్​పీజీ కనెక్షన్లు ఇచ్చేందుకు సిద్ధమైంది. 2026 వరకు కొనసాగే రెండో దశ ఉజ్వల యోజన పథకం కోసం 1650 కోట్లను కేటాయించింది. ప్రధాని నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశంలో ఈ నిర్ణయం తీసుకున్నట్లు సమాచార, ప్రసార శాఖ మంత్రి అనురాగ్ ఠాకూర్ తెలిపారు. ఉజ్వల 2.0లో భాగంగా లబ్ధిదారులకు మొదటి రీఫిల్​, స్టవ్​ను ఉచితంగా అందజేస్తామని మంత్రి వెల్లడించారు.

ప్రస్తుతం పీఎమ్​యూవైలో భాగంగా 14.2 కిలోల సిలిండర్​పై ఏడాదికి 12 రీఫిళ్ల వరకు రూ.200 చొప్పున సబ్సిడీ (Ujjwala Yojana Subsidy Amount) అందిస్తున్నారు. ఈ కొత్త కనెక్షన్లతో.. ఉజ్వల పథకం కింద మొత్తం లబ్ధిదారుల సంఖ్య 10.35 కోట్లకు చేరుతుంది. అయితే దేశంలో చాలా మందికి ఇంకా ఎల్​పీజీ కనెక్షన్ లేదని కేంద్రం ఓ ప్రకటనలో పేర్కొంది. అయితే జానాభా పెరుగుతుండటం, వివాహాలు, వలసలు వంటి కారణాల వల్ల కొత్త కుటుంబాలు ఏర్పడుతున్నాయి. 2023 ఆగస్టు 31 నాటికి దేశంలో దాదాపు 15 లక్షల పీఎమ్​యూవై కనెక్షన్​ల కోసం డిమాండ్​ ఏర్పడింది.

మోదీకి కేబినెట్ అభినందనలు..
Union Cabinet Meeting :జీ20 శిఖరాగ్ర సదస్సును విజయవంతం చేసినందుకు ప్రధాని నరేంద్ర మోదీని అభినందిస్తూ కేంద్ర కేబినెట్ తీర్మానాన్ని ఆమోదించిందని వెల్లడించారు అనురాగ్. ఈ తీర్మానాన్ని రక్షణ మంత్రి రాజ్‌నాథ్ సింగ్ ప్రవేశపెట్టగా.. మంత్రులంతా ఏకగ్రీవంగా ఆమోదించారని చెప్పారు. జీవ ఇంధన కూటమి (Global Biofuel Alliance) ఏర్పాటు సహా ఆఫ్రికా యూనియన్‌ను జీ20 కూటమిలో చేర్చుకోవడం వంటి అంశాలలో ప్రధాని మోదీ సభ్య దేశాల మధ్య ఏకాభిప్రాయం సాధించడం యావత్‌ దేశానికి గర్వకారణమని పేర్కొన్నారు. ఈ-కోర్టు ప్రాజెక్టులో భాగంగా ఫేజ్‌-3 కింద రూ. 7,210 కోట్ల వెచ్చించేందుకు మంత్రి మండలి ఆమోదం తెలిపిందని వెల్లడించారు. అన్ని కోర్టు కాంప్లెక్స్‌లలో 4, 400 ఈ-సర్వీస్ సెంటర్లను ఏర్పాటు చేస్తామని పేర్కొన్నారు.