ట్విట్టర్ను మరో కంపెనీలో విలీనం చేశారు ఆ సంస్థ సీఈఓ ఎలాన్ మస్క్. ఎక్స్ అనే ఎవ్రీథింగ్ యాప్లో ట్విట్టర్ను కలిపేసినట్లు ఆ సంస్థ వెల్లడించింది. ప్రస్తుతం ట్విట్టర్ అనే స్వతంత్ర కంపెనీ మనుగడలోనే లేదని కోర్టు ఫైలింగ్లో పేర్కొంది. "ట్విట్టర్ కంపెనీని ఎక్స్ కార్పొరేషన్లో విలీనం చేశాం. ట్విట్టర్ ఇప్పుడు లేదు. ఎక్స్ కార్పొరేషన్ అనే ప్రైవేటు సంస్థ.. నెవాడలో ఉంది. కాలిఫోర్నియాలోని శాన్ఫ్రాన్సిస్కోలో ఈ సంస్థ వ్యాపార కార్యకలాపాలు నిర్వహిస్తోంది" అని తన ఫైలింగ్లో వివరించింది.
ట్విట్టర్ కొనుగోలు ప్రక్రియ తుది దశలో ఉండగానే ఎక్స్ యాప్నకు సంబంధించి తన ప్రణాళికలను వివరించారు మస్క్. ఎక్స్ యాప్ కార్యకలాపాలను మరింత వేగవంతం చేసేందుకే ట్విట్టర్ను కొనుగోలు చేస్తున్నట్లు స్పష్టంగా వెల్లడించారు. 'ఎక్స్ అనేది ఎప్పటికీ నా దీర్ఘకాల వ్యాపార ప్రణాళికగా ఉంటుంది. ఎక్స్ యాప్ రూపకల్పనను వేగవంతం చేసేందుకు ట్విట్టర్ ఉపయోగపడుతుంది. ట్విట్టర్ను కొనుగోలు చేస్తే.. ఎక్స్ సంస్థ 3-5 ఏళ్లు ముందుకు వెళ్తుంది' అని గతేడాది అక్టోబర్లో ట్వీట్ చేశారు మస్క్.
ఎక్స్ యాప్ గురించి గతంలో మస్క్ చేసిన ట్వీట్లు వీచాట్ లాంటి యాప్ కోసం..
చైనాలో ఉండే వీచాట్ తరహాలో ఓ యాప్ను రూపొందించాలని మస్క్ సుదీర్ఘ కాలంగా ప్రణాళికలు రచిస్తున్నారు. ఆన్లైన్లో అన్ని పనులు చేసుకునే విధంగా ఓ సూపర్ యాప్ను అందుబాటులోకి తీసుకురావాలని ప్రయత్నాలు చేశారు. అమెరికాకు ఓ సూపర్ యాప్ అవసరం ఉందంటూ గతంలో ఓ పాడ్కాస్ట్లో వివరించారు.
"చైనా ప్రజలకు వీచాట్ ఉంది. ఆ యాప్ అన్ని పనులు చేస్తుంది. ట్విట్టర్, పేపాల్ వంటి కంపెనీలు అందించే సేవలన్నీ అందులోనే చేసుకోవచ్చు. యాప్ ఇంటర్ఫేస్ సైతం బాగుంటుంది. కానీ, చైనా అవతల అలాంటి యాప్లు లేవు. అన్ని పనులు చేసే ఓ సూపర్ యాప్ అవసరం అమెరికాకు ఉంది. ట్విట్టర్నే సూపర్ యాప్గా మార్చాలి. లేదంటే కొత్తది ఏదైనా క్రియేట్ చేయాలి. ఎలాగైనా సూపర్ యాప్ను అందుబాటులోకి తేవాలి."
-ఎలాన్ మస్క్
1999లోనే ఎక్స్ పేరుతో ఓ ఆన్లైన్ బ్యాంకును ఏర్పాటు చేశారు మస్క్. అనంతరం జరిగిన పరిణామాల్లో దాన్ని పేపాల్లో విలీనం చేశారు. తర్వాత ఎక్స్.కామ్ అనే డొమైన్ను కొనుగోలు చేశారు. ఎక్స్ కంపెనీని స్వతంత్రంగా అభివృద్ధి చేసే ఉద్దేశంతోనే డొమైన్ను కొనుగోలు చేశారని అప్పట్లో వార్తలు వచ్చాయి. తాజాగా, ట్విట్టర్ను ఎక్స్ యాప్లో విలీనం చేసి సూపర్ యాప్ రూపొందించే దిశగా దూసుకెళ్తున్నారు.
ట్విట్టర్ను 44 బిలియన్ డాలర్లకు మస్క్ కొనుగోలు చేశారు. స్పామ్ అకౌంట్లను తగ్గించేందుకు, ఫ్రీ స్పీచ్ను ప్రోత్సహించేందుకు ట్విట్టర్ను కొనుగోలు చేస్తున్నట్లు అప్పట్లో వెల్లడించారు.
