SIP investment: క్రమానుగత పెట్టుబడి విధానం (సిప్)లో పెట్టుబడులు పెట్టినప్పుడు ఆర్థిక లక్ష్యాలన్నీ సులభంగా సాధించొచ్చు.. ఈ మాట ఎన్నోసార్లు వినే ఉంటారు. ఆర్థిక ప్రణాళికలో 'సిప్' ప్రాధాన్యం అంతాఇంతా కాదు. ఇది కొంతమేరకు నిజమే. కానీ, ఇక్కడ ముఖ్యమైన ప్రశ్న మరోటి ఉంది.. నెలకు ఎంత మొత్తం సిప్ చేస్తే మంచిది? దీనికి సమాధానం అందరికీ ఒకటిగానే ఉండదు. అవసరాన్ని బట్టి, దీర్ఘకాలిక లక్ష్యంతో, తగిన మొత్తాన్ని పెట్టుబడి పెట్టినప్పుడే ఆశించిన లక్ష్యం నెరవేరుతుంది. పదిహేనేళ్ల తర్వాత మీకు రూ.1 కోటి అవసరం అనుకుందాం. మ్యూచువల్‌ ఫండ్లలో అధిక రాబడి వస్తుంది కాబట్టి, ఏదో కొంత మొత్తాన్ని మదుపు చేస్తూ వెళ్తే.. ఈ లక్ష్యాన్ని సులభంగానే సాధించే అవకాశం ఉందని చాలామంది అనుకుంటారు. కానీ, ఇది అనుకున్నంత సులువు కాదు. వ్యక్తిగత ఆర్థిక విషయాల్లో అంచనాల కన్నా ఆచరణ ప్రధానం.
నెలకు రూ.10వేల చొప్పున 15 ఏళ్లపాటు క్రమం తప్పకుండా మదుపు చేశారనుకుందాం.. 10-12 శాతం రాబడి అంచనాతో మీకు వచ్చే మొత్తం రూ.41-50లక్షల మధ్య ఉంటుంది. ఇక్కడ దీర్ఘకాలంలో మంచి మొత్తాన్ని జమ చేసేందుకు సిప్ ఉపయోగపడిందనే చెప్పాలి. కానీ, మీ లక్ష్యం 15 ఏళ్లలో రూ. కోటి. మరి దాన్ని సాధించే లక్ష్యానికి దూరంగా ఉండిపోయాం కదా. దీనికోసం.. నెలకు రూ.20,000-రూ.24,000 వరకూ మదుపు చేస్తే.. కనీసం 10-12 శాతం రాబడి అంచనాతో.. 15 ఏళ్ల తర్వాత రూ. కోటి జమయ్యేందుకు ఆస్కారం ఉంటుంది. అందుకే, దీర్ఘకాలంలో పెట్టుబడులు పెట్టేటప్పుడు సరైన మొత్తాన్ని నిర్ణయించుకొని, దాన్ని మదుపు చేస్తూ వెళ్లాలి. కుదిరినప్పుడు మదుపు చేస్తాం.. లేకపోతే లేదు అంటే లక్ష్యం సాధించడం కష్టమే.