Rainbow Childrens Medicare IPO: మల్టీస్పెషాలిటీ పీడియాట్రిక్ హాస్పిటల్ చెయిన్ రెయిన్బో చిల్డ్రన్ మెడికేర్ లిమిటెడ్.. ఐపీఓకు వస్తోంది. ఇనీషియల్ పబ్లిష్ ఆఫర్ ఏప్రిల్ 27న ప్రారంభమై.. ఏప్రిల్ 29న ముగియనుంది. ఈ ఐపీఓ ద్వారా మొత్తం రూ.2,000 కోట్లకుపైగా సమీకరించాలని లక్ష్యంగా పెట్టుకుంది. వీటిలో తాజా షేర్ల ద్వారా రూ.280 కోట్లు సమీకరించనుంది.
ఆఫర్ ఫర్ సేల్ కింద మరో 2.4 కోట్ల షేర్లను వాటాదారులు ఐపీఓలో విక్రయానికి ఉంచనున్నారు. ఆఫర్ ఫర్ సేల్ ద్వారా కంపెనీ ప్రమోటర్లు.. రమేశ్ కంచర్ల, దినేశ్ కుమార్ చిర్లా, ఆదర్శ్ కంచర్ల, పద్మ కంచర్ల సహా ఇన్వెస్టర్లు సీడీసీ గ్రూప్ లిమిటెడ్, సీడీసీ ఇండియా కూడా తమ వాటాలను విక్రయించనున్నాయి.
బ్రిటన్కు చెందిన ఫైనాన్స్ సంస్థ సీడీసీ గ్రూపు.. 1999లో హైదరాబాద్లో 50 పడకలతో తొలి రెయిన్బో పిల్లల స్పెషాలిటీ ఆస్పత్రిని స్థాపించింది. అప్పటి నుంచి సమర్థంగా సేవలందిస్తూ.. మల్టీస్పెషాలిటీ పీడియాట్రిక్ సేవల్లో అగ్రగామిగా ఎదిగింది. 2021 డిసెంబర్ 20 నాటికి.. రెయిన్‌బోకు దేశంలో ఆరు నగరాల్లో 14 ఆస్పత్రులు, మూడు క్లినిక్‌లు ఉన్నాయి. మొత్తం 1500 పడకల సామర్థ్యం దీని సొంతం.
Campus Activewear IPO: ప్రముఖ ఫుట్వేర్ కంపెనీ క్యాంపస్ యాక్టివ్వేర్ ఐపీఓ కూడా ఏప్రిల్ 26న ప్రారంభం కానుంది. యాంకర్ ఇన్వెస్టర్ల కోసం బిడ్డింగ్ ఏప్రిల్ 25న మొదలవనుంది. ఐపీఓతో రూ. 1400 కోట్లు సమీకరించాలని కంపెనీ లక్ష్యంగా పెట్టుకుంది. పబ్లిక్ ఇష్యూ ధరను రూ. 278- 292గా నిర్ణయించింది సంస్థ.