Digital Financial Planning: డిజిటల్‌ సేవలను వినియోగించుకోవడం ద్వారా వ్యక్తిగత ఆర్థిక ప్రణాళికల్లో ఎన్నో మార్పులు కనిపిస్తున్నాయి. ఆర్థిక క్రమశిక్షణకు ఇది తోడుగా నిలుస్తోందని చెప్పొచ్చు. వ్యక్తిగత ఆర్థిక ప్రణాళికలను సమర్థంగా రూపొందించుకునేందుకూ, వాటిని ఆచరించేందుకూ సాంకేతికతను ఎలా వినియోగించుకోవాలన్నది ముఖ్యం.
బడ్జెటింగ్‌ యాప్‌లతో..
భవిష్యత్‌ కోసం పెట్టుబడులు పెట్టాలంటే.. వచ్చిన ఆదాయాన్ని స్మార్ట్‌గా ఖర్చు చేయాలి. ప్రతి రూపాయి ఖర్చుకూ పద్దు రాయాలి. ఇది ఖర్చుల పుస్తకంలో రాయడం ఈ రోజుల్లో సాధ్యం కాదు. కానీ, చేతిలో ఉండే మొబైల్‌లో ఈ పనిని సులభంగా చేయొచ్చు. ఇప్పుడు ఎన్నో యాప్‌లు దీనికోసం అందుబాటులో ఉన్నాయి. నమ్మకమైన సంస్థ రూపొందించిన బడ్జెటింగ్‌ యాప్‌లో మీ ఆదాయ, వ్యయాలను ఎప్పటికప్పుడు నమోదు చేసుకోవచ్చు. కొన్ని యాప్‌లు నేరుగా మీ క్రెడిట్, డెబిట్‌ కార్డుల ద్వారా ఖర్చు చేసిన మొత్తాలను నమోదు చేస్తుంటాయి. ఇలాంటి యాప్‌ల విషయంలో కాస్త అప్రమత్తత అవసరం.
పెట్టుబడుల కోసం..
క్రమశిక్షణతో మదుపు చేయడం ఎప్పుడూ అవసరం. కొంతమంది ఈ విషయంలో నిర్లక్ష్యంగా ఉంటారు. ఇలాంటి వారు ఆన్‌లైన్‌ మార్గాన్ని ఎంచుకోవచ్చు. ఎంపిక చేసుకున్న పెట్టుబడులకు మీరు నెలనెలా డబ్బును బదిలీ చేయాల్సిన అవసరం లేకుండా.. బ్యాంకులకు స్టాండింగ్‌ ఇన్‌స్ట్రక్షన్స్‌ ఇవ్వాలి. మీ ఖాతా నుంచి నేరుగా నిర్ణీత మొత్తాన్ని పెట్టుబడులకు వెళ్లే ఏర్పాటు చేయడం దీని లక్ష్యం. మీ వేతనం జమ అయ్యే తేదీకి ఒకటి రెండు రోజుల తర్వాత ఇది జరిగేలా చూసుకోవాలి. దీనివల్ల ఖర్చులకన్నా ముందే పెట్టుబడులకు డబ్బు వెళ్తుంది. సిప్‌, బీమా పాలసీల ప్రీమియాలు సకాలంలో చెల్లించేందుకు ఇది సరైన మార్గం.