Mukesh Ambani Children Salary : జీతం తీసుకోకుండా పనిచేస్తున్న అంబానీ పిల్లలు.. మరి వీరికి ఆదాయం ఎలా వస్తుందో తెలుసా?

Mukesh Ambani Children Salary In Telugu : ముకేశ్ అంబానీ ముగ్గురు పిల్లలను కంపెనీ బోర్డ్​లో చేర్చుకునేందుకు వాటాదారుల అనుమతి కోరుతూ రిలయన్స్ ఇండస్ట్రీస్​ లిమిటెడ్​ ఒక తీర్మానం చేసింది. ఇందులో ఆకాశ్​, ఇషా, అనంత్​ ముగ్గురూ కంపెనీలో ఎలాంటి జీతం తీసుకోకుండా పనిచేస్తారని పేర్కొంది. మరి వీరికి ఆదాయం ఎలా వస్తుందో తెలుసా?

Mukesh Ambani Children Salary : దిగ్గజ వ్యాపారవేత్త, అపర కుబేరుడు ముకేశ్ అంబానీ ముగ్గురు పిల్లలు కూడా ఎలాంటి జీతం తీసుకోకుండా కంపెనీలో పనిచేస్తారని రిలయన్స్ ఇండస్ట్రీస్​ తెలిపింది. అయితే బోర్డ్ మీటింగ్స్, కమిటీ మీటింగ్స్​లో పాల్గొన్నప్పుడు ఫీజు మాత్రం తీసుకుంటారని స్పష్టం చేసింది.

ముచ్చటగా ముగ్గురు
ముకేశ్ అంబానీకి ఆకాశ్​, ఇషా, అనంత్ అనే ముగ్గురు పిల్లలు ఉన్నారు. వీరిలో ఆకాశ్, ఇషా ఇద్దరూ కవలలు వారి వయస్సు 31 సంవత్సరాలు. అనంత్ అంబానీ వయస్సు 28 సంవత్సరాలు. ఇప్పుడు ఈ ముగ్గురు కూడా రిలయన్స్ ఇండస్ట్రీస్​ కంపెనీ బోర్డ్​లో ఎగ్జిక్యూటివ్ డైరెక్టర్లుగా ఉన్నారు. వీరు బోర్డ్​లో చేరినప్పుడే.. తాము ఎలాంటి జీతం తీసుకోకుండా పనిచేస్తామని తీర్మానించుకున్నట్లు రిలయన్స్​ కంపెనీ తాజాగా తెలిపింది.

జీతం తీసుకోని అంబానీలు
Nita Ambani Children Salaries : రిలయన్స్ ఇండస్ట్రీస్​ అధినేత ముకేశ్ అంబానీ 2020-21 ఆర్థిక సంవత్సరం నుంచి జీతం లేకుండా కంపెనీలో పనిచేస్తున్నారు. కానీ కంపెనీలో ఎగ్జిక్యూటివ్ డైరెక్టర్లుగా పనిచేస్తున్న అతని సమీప బంధువులు నికిల్​, హితల్​ మాత్రం జీతంతో పాటు, అలవెన్సులు, కమీషన్లు సహా ఇతర బెనిఫిట్స్ పొందుతున్నారు.

ఆదాయం వస్తుంది ఇలా!
ఆకాశ్​, ఇషా, అనంత్​ అంబానీలు ముగ్గురూ కంపెనీలో జీతం తీసుకోవడం లేదు. అయితే వారికి బోర్డ్ మీటింగ్​లు, కమిటీ మీటింగ్​ల్లో పాల్గొన్నందుకు ఫీజు లభిస్తుంది. అలాగే కంపెనీ లాభాల్లో వాటా లభిస్తుంది. ఎందుకంటే వీరి ముగ్గురికి కంపెనీలో భారీ ఎత్తున వాటాలు ఉన్నాయి.

మరో ఐదేళ్లు అయనే!
Reliance Industries CEO : రిలయన్స్ కంపెనీ ఇటీవలే ముకేశ్ అంబానీని మరో 5 ఏళ్లపాటు కంపెనీ ఛైర్మన్​, సీఈఓగా కొనసాగిస్తూ నిర్ణయం తీసుకుంది. అలాగే ముకేశ్ అంబానీ ముగ్గురు పిల్లలను బోర్డ్​లో ఎగ్జిక్యూటివ్ డైరెక్టర్లుగా నియమించింది. అయితే తాజాగా ఈ నియామకానికి షేర్​హాల్డర్ల ఆమోదం కోసం పోస్టల్​ బ్యాలెట్​లను పంపించింది.

శాశ్వత ఆహ్వానితురాలు
ఇటీవల ముకేశ్ అంబానీ భార్య నీతా అంబానీ కంపెనీ బోర్డ్​ నుంచి తప్పుకున్నారు. కానీ ఆమె కంపెనీ బోర్డ్ మీటింగ్​లకు ఆమె శాశ్వత ఆహ్వానితురాలిగా ఉంటారు. ఈ ప్రత్యేకమైన వెసులుబాటు ముకేశ్ అంబానీ సహా కంపెనీలోని మరెవ్వరికీ లేకపోవడం విశేషం.

నీతా అంబానీ లాగానే!
Nita Ambani Salary : ముకేశ్ అంబానీ భార్య నీతా అంబానీ 2014లో రిలయన్స్ ఇండస్ట్రీస్​ కంపెనీ బోర్డ్​లో చేరారు. ఆమె 2022-23 ఆర్థిక సంవత్సరంలో సిట్టింగ్ ఫీజుగా రూ.6 లక్షలు, కమీషన్​గా రూ.2 కోట్లు తీసుకున్నారు. ఇదే విధంగా ఆకాశ్​, ఇషా, అనంత్​లకు కూడా సిట్టింగ్​ ఫీజు, కమీషన్​ లభిస్తాయి.

5 భిన్నమైన వ్యాపారాలు!
Reliance Industries Businesses : రిలయన్స్ కంపెనీ ఐదు భిన్నమైన వ్యాపారాలను నిర్వహిస్తోంది. ముఖ్యంగా చమురు వ్యాపారం చేస్తోంది. ప్రపంచంలోనే అతిపెద్ద సింగిల్-లొకేషన్​ రిఫైనింగ్ కాంప్లెక్స్​, పెట్రో కెమికల్​ ప్లాంట్స్​ రిలయన్స్ కంపెనీ చేతిలో ఉన్నాయి. అలాగే టెలికాం అండ్​ డిజిటల్ బిజినెస్, రిటైల్​ బిజినెస్​ (ఆన్​లైన్​ & ఆఫ్​లైన్​), న్యూ ఎనర్జీ వ్యాపారం ఉన్నాయి. ఇటీవలే ఫైనాన్సియల్​ సర్వీసులు కూడా ప్రారంభించడం జరిగింది.

ప్రతి ఒక్కరికీ బాధ్యతలు అప్పగించారు!
ముకేశ్ అంబానీ తన వారసత్వాన్ని కొనసాగించేందుకు తగిన వ్యూహాన్ని అమలు చేస్తున్నారు. అందులో భాగంగా తన పెద్దకుమారుడైన ఆకాశ్​కు టెలికాం బిజినెస్​ను, కుమార్తె ఇషాకు రిటైల్​ వ్యాపారాన్ని, చిన్న కుమారుడు అనంత్​కు న్యూ ఎనర్జీ వ్యాపార బాధ్యతలను అప్పగించారు. అయితే రిలయన్స్ ప్రధాన వ్యాపారమైన 'ఆయిల్-టు-కెమికల్​' వ్యాపార బాధ్యతలను మాత్రం ఇంకా ఎవరికీ అప్పగించలేదు.

ఇషా అంబానీ : ఇషా అంబానీ యేల్ యూనివర్సిటీలో సైకాలజీ, సౌత్​ ఏసియా స్టడీస్​ చేశారు. స్టాన్​ఫోర్డ్ యూనివర్సిటీలో ఎంబీఏ చదివారు. 'ఇండిపెండెన్స్' అనే బ్రాండ్​ను లాంఛ్ చేయడంలో కీలకమైన పాత్ర పోషించారు. వాస్తవానికి రిలయన్స్ ఇండస్ట్రీస్​ కంపెనీలో అంబానీ కుటుంబానికి 41.46 శాతం వాటా ఉంది. ఇవి కాకుండా రిలయన్స్ ఇండస్ట్రీస్​ కంపెనీలో ఇషాకు నేరుగా 0.12 శాతం మేర ఈక్విటీ షేర్లు ఉన్నాయి.​

ఆకాశ్ అంబానీ : అమెరికాలోని బ్రౌన్​ యూనివర్సిటీలో ఆకాశ్ అంబానీ ఎకనామిక్స్​ డిగ్రీ చదివారు. ఇప్పుడు భారతదేశంలోని అతిపెద్ద టెలికాం కంపెనీ జియోకు హెడ్​గా ఉన్నారు. ముఖ్యంగా భారత్​లో 5జీ ఇంటర్నెట్​, ఆర్టిఫీషియల్ ఇంటెలిజెన్స్​, బ్లాక్​చైన్​, ఇంటర్నెట్ ఆఫ్​ థింగ్స్​ను లాంటి డిజిటల్ టెక్నాలజీలను మరింత విస్తృతం చేయడంలో కీలకపాత్ర పోషిస్తున్నారు.

అనంత్ అంబానీ : ఈయన కూడా బ్రౌన్ యూనివర్సిటీలోనే గ్రాడ్యుయేషన్ పూర్తి చేశారు. ప్రస్తుతం రెనీవబుల్, గ్రీన్ ఎనర్జీ బిజినెస్​ను చూసుకుంటున్నారు.