సెన్సెక్స్@70,000; నిఫ్టీ@21,000 - విజయ ప్రస్థానం మొదలైంది ఇలా!

Journey Of Sensex From 1000 To 70000 In Telugu : దేశీయ స్టాక్ మార్కెట్ సూచీలు సెన్సెక్స్, నిఫ్టీలు తమ జీవన కాల గరిష్ఠాలను నమోదు చేశాయి. సెన్సెక్స్ @70,000; నిఫ్టీ@21,000 వద్ద ఆల్​ టైమ్​ హై లెవెల్స్​ క్రాస్ చేశాయి. అందుకే కేవలం 100 వద్ద ప్రారంభమైన సెన్సెక్స్​, 1000 వద్ద మొదలైన నిఫ్టీల.. విజయ ప్రస్థానం గురించి ఇప్పుడు వివరంగా తెలుసుకుందాం.

Journey Of Sensex From 1000 To 70000 :బొంబాయి స్టాక్ ఎక్స్ఛేంజ్​ సూచీ సెన్సెక్స్​ మొదటిసారిగా 70,000 లెవెల్​ను క్రాస్ చేసింది. జాతీయ స్టాక్​ ఎక్స్ఛేంజ్​ సూచీ నిఫ్టీ తాజాగా 21,000 వద్ద జీవనకాల గరిష్ఠాలను నమోదు చేసింది. ఈ విజయ ప్రస్థానం వెనుక పెద్ద చరిత్రే ఉంది.

విజయ ప్రస్థానం
Timeline Of Sensex From 100 To 70000 :

• 1979లో 100 వద్ద తన ప్రయాణాన్ని ప్రారంభించిన సెన్సెక్స్​.. ఈ 2023 డిసెంబర్​ నాటికి 70,000కు చేరుకుంది. అంటే గత 44 ఏళ్లలో సెన్సెక్స్ మదుపరులకు​ 700 రెట్లు లాభాలను పంచిపెట్టింది.
• బొంబాయి స్టాక్ ఎక్స్ఛేంజ్​ సూచీ సెన్సెక్​ 1990లో మొదటిసారిగా 1000 లెవెల్​ను క్రాస్ చేసింది. అక్కడి నుంచి నేటి వరకు ఈ విజయ ప్రస్థానం కొనసాగుతూనే ఉంది.
• మాజీ ప్రధాని డాక్టర్​ మన్మోహన్ సింగ్ భారతదేశంలో సరళీకృత ఆర్థిక విధానాన్ని తీసుకొచ్చిన తరువాత.. దేశ పురోభివృద్ధి మరింత ముందుకు సాగింది. ఫలితంగానే స్టాక్ మార్కెట్లు అంచెలంచెలుగా ఎదుగుతూ వచ్చాయి.

దూకుడు పెరుగుతోంది!

• సెన్సెక్స్​ 100 నుంచి 1,000 లెవెల్​ను క్రాస్ చేయడానికి 11 ఏళ్లు పట్టింది. ఈ కాలంలో మదుపరులకు 23.3 శాతం చొప్పున వార్షిక​ రాబడి (CAGR) లభించింది.
• సెన్సెక్స్​ 2006 ఫిబ్రవరిలో మొదటిసారి 10,000కు చేరింది. అంటే సెన్సెక్స్​ 1,000 నుంచి 10,000 లెవెల్​ను క్రాస్ చేయడానికి 16 ఏళ్లు పట్టింది. ఈ 16 ఏళ్లలో మదుపరులకు 15.5 శాతం చొప్పున వార్షిక​ రాబడి (CAGR) లభించింది.
• సెన్సెక్స్​ 2007 అక్టోబర్​లో 20,000 అత్యున్నత శిఖరాన్ని తాకింది. అంటే కేవలం 21 నెలల్లోనే రెట్టింపు అయ్యింది.

ఆర్థిక సంక్షోభం..

• ప్రపంచ ఆర్థిక సంక్షోభం కారణంగా సెన్సెక్స్​ 30,000 లెవెల్​ చేరడానికి సుమారుగా 7 సంవత్సరాలు పట్టింది.
• సెన్సెక్స్ 2019 మే నెలలో​ 40,000 లెవెల్​ను క్రాస్ చేసింది. అంటే 30,000 నుంచి 40,000 లెవెల్​ను చేరడానికి కేవలం 4 ఏళ్లు మాత్రమే పట్టింది.
• సెన్సెక్స్​ 40,000 నుంచి 50,000 చేరడానికి కేవలం 17 నెలలే పట్టింది.

కొవిడ్ దెబ్బకు విలవిల

• కొవిడ్ మహమ్మారి విజృంభించిన తరువాత 2020 మార్చిలో దేశీయ స్టాక్​ మార్కెట్లు తీవ్రమైన నష్టాలకు గురయ్యాయి. దీనితో సెన్సెక్స్​ 35 శాతం కరెక్షన్​ను గురై 25,700 లెవెల్​కు పడిపోయింది. దీనితో మదుపరుల సంపద భారీగా ఆవిరైంది.

తగ్గేదేలే!

• కొవిడ్ భయాలు తెరమరుగైన తరువాత దేశీయ స్టాక్​ మార్కెట్లు మళ్లీ విజృంభించాయి. సెన్సెక్స్​ 2021 జనవరిలో 50,000 మార్కును దాటితే.. 2021 సెప్టెంబర్​లోనే 60,000 లెవెల్​ను దాటింది. అంటే కేవలం 8 నెలల్లోనే భారీ లాభాలతో సెన్సెక్స్ దూసుకుపోయింది.
• తాజాగా 2023 డిసెంబర్​లో సెన్సెక్స్ జీవన కాల గరిష్ఠం 70,000 లెవెల్​ను క్రాస్ చేసింది.
• ఉదాహరణకు ఎవరైనా ఒక వ్యక్తి 1990లో స్టాక్​ మార్కెట్​లో ఒక లక్ష రూపాయలు పెట్టుబడి పెట్టి ఉంటే.. నేడు అది 7 కోట్ల రూపాయలు అయ్యుండేది.

నిఫ్టీ ఎపిక్​ బుల్ రన్
Timeline Of Nifty 50 From 1000 To 21000 :​

• జాతీయ స్టాక్ ఎక్స్ఛేంజీ సూజీ నిఫ్టీ కేవలం 28 ఏళ్లలోనే 1000 నుంచి 21,000 లెవెల్​ను చేరుకుంది. ఈ విజయ ప్రస్థానం ఎలా కొనసాగిందంటే..
• నేషనల్​ స్టాక్​ ఎక్స్ఛేంజ్​ సూచీ నిఫ్టీ 1995లో బేస్ వాల్యూ 1000తో తన ప్రస్థానాన్ని ప్రారంభించింది.
• నిఫ్టీ 2017 జులై 26న 10,000 లెవెల్​ను దాటింది. అంటే నిఫ్టీ 1000 నుంచి 10,000 లెవెల్​ను చేరడానికి 21 సంవత్సరాలు పట్టింది.
• నిఫ్టీ 2023 సెప్టెంబర్​ నాటికి 10,000 నుంచి 20,000 లెవెల్​ను క్రాస్​ చేసింది.
• తాజాగా 2023 డిసెంబర్​ 12న నిఫ్టీ 21,000 లెవెల్​ను దాటి ఆల్​టైల్ హై రికార్డ్​ను నెలకొల్పింది. అంటే 10,000 నుంచి 21,000 లెవెల్​ చేరడానికి కేవలం 6 సంవత్సరాల 4 నెలల సమయం మాత్రమే పట్టింది. అంటే మదుపరుల సంపద ఈ ఆరేళ్లలో విపరీతంగా పెరిగింది. ఈ విధంగా దేశీయ స్టాక్ మార్కెట్ల విజయ ప్రస్థానం అప్రతిహతంగా కొనసాగుతూనే ఉంది.