Invest in foreign stocks from India : దేశీయంగా ఉన్న స్టాక్ మార్కెట్కే పరిమితం కాకుండా. అంతర్జాతీయంగా ఉన్న అవకాశాలనూ ఉపయోగించుకోవాలని ఆలోచించే మదుపరులకు ఇంటర్నేషనల్ ఫండ్ పథకాలు అనుకూలంగా ఉంటాయి. తమ పోర్ట్ఫోలియోకు మరింత బలం చేకూర్చాలనుకునే మదుపరులు, కాస్త నష్టభయం ఉన్నా ఇబ్బంది లేదు అనుకునే వారూ వీటిని పరిశీలించవచ్చు. తద్వారా దేశీయ మార్కెట్ పరిధిని దాటి మదుపు అవకాశాలను చేజిక్కించుకోవచ్చు.
పెట్టుబడుల్లో వైవిధ్యం ఉన్నప్పుడే మంచి రాబడిని ఆర్జించగలం. అంతర్జాతీయ ఫండ్లను ఎంచుకోవడమూ ఇందులో భాగంగానే అనుకోవచ్చు. ఒకే పెట్టుబడి పథకం లేదా భౌగోళిక మార్కెట్లకు పరిమితం కాకుండా.. దీర్ఘకాలిక దృష్టితో మదుపు చేయాలనుకున్న వారు.. వీటిని ఎంచుకోవచ్చు. భారత దేశ ఆర్థిక వృద్ధి పట్ల ఆశాజనకంగా ఉన్నప్పటికీ.. పెట్టుబడి మొత్తంలో కొంత శాతాన్ని విదేశీ మార్కెట్లలో మదుపు చేసే ఫండ్లకు మళ్లించడం ద్వారా అధిక రాబడులను ఆర్జించేందుకు ప్రయత్నించవచ్చు.
అన్ని దేశాల మార్కెట్లూ ఎప్పుడూ ఒకేలా ఉండవు. వాటిని అర్థం చేసుకోవాలంటే ఎంతో అవగాహన ఉండాలి. స్థూల ఆర్థిక వ్యవస్థ, ప్రభుత్వ విధానాలు, భౌగోళిక, రాజకీయ గందరగోళాలపై ఆధారపడి మార్కెట్లు పనిచేస్తుంటాయి. కొన్ని దేశాల మార్కెట్లు ఆకర్షణీయంగా ఉంటే.. మరికొన్ని పతనం దిశగా సాగుతుంటాయి. బలమైన ఆర్థిక వ్యవస్థ ఉన్న మార్కెట్లలోనూ కొన్నిసార్లు దిద్దుబాటు తప్పదు. ఉదాహరణకు అమెరికా మార్కెట్లను చూస్తే.. గరిష్ఠ స్థాయి నుంచి దాదాపు 32 శాతం వరకు దిద్దుబాటు వచ్చింది. అదే సమయంలో భారతీయ స్మాల్, మిడ్ క్యాప్ సూచీలు అంతగా పతనమవ్వలేదు. ఇలాంటివి మనం గమనిస్తూ మదుపు వ్యూహాన్ని రచించుకోవాలి.
పెట్టుబడి ఎలా..
అంతర్జాతీయ ఫండ్లను దేశీయ మ్యూచువల్ ఫండ్ సంస్థలే అందిస్తున్నాయి. ఇప్పుడు దాదాపు అన్ని ఫండ్ సంస్థలూ ఇలాంటి పథకాలను తీసుకొచ్చాయి. మంచి పనితీరున్న సంస్థను ఎంచుకొని, మదుపు ప్రారంభించవచ్చు. ఏ మార్కెట్లలోని సూచీ ఫండ్లలో మదుపు చేస్తుందో ముందు తెలుసుకోవడం మర్చిపోవద్దు. నేరుగా ఆన్లైన్లో లేదా ఫండ్ సంస్థ శాఖకు వెళ్లి, సలహాదారుడి ద్వారా పెట్టుబడులు ప్రారంభించవచ్చు. క్రమానుగత పెట్టుబడి విధానం (సిప్)లో పెట్టుబడులు పెట్టడం వల్ల సగటు ప్రయోజనం లభిస్తుంది. ఏక మొత్తంలోనూ మదుపు చేయొచ్చు. వీలైనంత వరకూ సిప్ చేయడమే ఉత్తమం.