How to get Educational Loans from Banks : ఉన్నత చదువులకు 'ఎడ్యుకేషన్​ లోన్'..​ ఎలా పొందాలో తెలుసా..?

Best Education Loan Banks in India : నేటి కాలంలో ఉన్నత విద్య ఎంతో ఖర్చుతో కూడుకున్న వ్యవహారంగా మారింది. దాంతో అనివార్యంగా ఎడ్యుకేషన్​ లోన్స్ తీసుకోవాల్సిన పరిస్థితి ఎదురవుతోంది. మరి ప్రభుత్వ రంగ బ్యాంకుల్లో రుణం తీసుకోవాలా? లేదా ప్రైవేట్​ బ్యాంకుల్లో రుణం తీసుకోవాలా? అనే విషయంలో చాలా మందికి క్లారిటీ ఉండదు. మరి, ఏది బెటరో తెలుసుకోండి.

Best Education Loan Banks : ప్రస్తుత కాలంలో ఉన్నత విద్య చాలా ఖర్చుతో కూడుకున్న వ్యవహారంగా మారిపోయింది. నాణ్యమైన చదువు కోసం లక్షలు వెచ్చించాల్సిన పరిస్థితి. తమ లాగా బిడ్డలు కష్టపడొద్దని తల్లిదండ్రులు పిల్లల ఉన్నత చదువుల కోసం ఆస్తులు అమ్ముకుంటున్నారు. అయితే.. ఎంత చేసినా విదేశాలకు వెళ్లి చదువుకోవాలంటే భారీగా ఖర్చవుతుంది. ఇలాంటి వారు ఖచ్చితంగా అప్పులు తీసుకోవాల్సిన పరిస్థితి ఏర్పడుతుంది.

Which Banks Better for Educational Loans in India :ఇలాంటి సమయంలో ప్రభుత్వ, ప్రైవేట్ రంగ బ్యాంకులు అందించే విద్యా రుణాలు ఒకింత ఊరట కలిగించే విషయం. అలాగే.. సెక్షన్ 80(E) కింద విద్యా రుణాలు పొందడం ద్వారా ఆదాయ పన్ను మినహాయింపుతోపాటు పలు ప్రయోజనాలూ ఉండటంతో చాలా మంది ఎడ్యుకేషన్​ లోన్ల వైపు ఆసక్తి చూపుతున్నారు. అయితే.. బ్యాంకులు అంత సులువుగా ఈ లోన్లు మంజూరు చేయడం లేదు. ష్యూరిటీ అడుగుతున్నాయి. అధిక వడ్డీని వసూలు చేస్తున్నాయి. ఈ క్రమంలో ప్రభుత్వ రంగ బ్యాంకుల్లో ఎడ్యూకేషనల్​ లోన్స్ తీసుకుంటే మంచిదా? లేదా ప్రైవేట్ రంగ బ్యాంకు(Private Banks)ల్లో విద్యా రుణాలు తీసుకుంటే బెటర్​గా ఉంటుందా? అనే సందేహం వస్తోంది. మరి, ఏ బ్యాంకుల్లో విద్యా రుణం తీసుకుంటే తక్కువ వడ్డీరేటుతో లబ్ధి చేకూరుతుందో ఇప్పుడు తెలుసుకుందాం.

లోన్ ఎవరికి ఇస్తారు?

Which Courses Eligible for Educational Loans :ఎడ్యుకేషన్ లోన్ పొందడానికి అభ్యర్థి ముందుగా గుర్తింపు పొందిన కాలేజీ లేదా యూనివర్సిటీలో అడ్మిషన్ పొందిన వారికి ఎడ్యుకేషన్ లోన్ ఇస్తారు. చాలా బ్యాంకులు సాధారణంగా ప్రముఖ విశ్వవిద్యాలయాలు అందించే అండర్ గ్రాడ్యుయేట్, పోస్ట్ గ్రాడ్యుయేట్ స్థాయిలలో దీర్ఘకాలిక ఉద్యోగ ఆధారిత వృత్తిపరమైన, సాంకేతిక కోర్సులకు విద్యా రుణాలను మంజూరు చేస్తూ ఉంటాయి. UGC/AICTE లేదా ప్రభుత్వం గుర్తించిన చాలా దేశీయ కోర్సులకు బ్యాంకులు సాధారణంగా రుణాలను అందిస్తాయి. అలాగే.. బాగా మంచి పేరున్న యూనివర్సిటీల్లో సీటు లభిస్తే ఆ విద్యార్థులకు త్వరగానే లోన్ లభించే ఛాన్స్ ఉంటుంది.

ఈ కోర్సులకు లోన్స్ ఇవ్వడం కష్టం :సంప్రదాయేతర కోర్సులైన సంగీతం, ఫైన్​ ఆర్ట్స్​, ఫొటోగ్రఫీ, థియేటర్ వంటి నాన్ టెక్నికల్ కోర్సులు తీసుకున్న వారికి, అలాగే సాంఘిక శాస్త్రాలు అభ్యసించాలని అనుకునే వారికి మాత్రం విద్యారుణాలు లభించడం అంత సులభం కాదు. ముఖ్యంగా ఇలాంటి కోర్సులకు ప్రభుత్వ రంగ బ్యాంకులు లోన్​లు ఇవ్వడం చాలా అరుదుగా చెప్పుకోవచ్చు. అలాగే ప్రైవేట్​ బ్యాంకులు, నాన్​-బ్యాంకింగ్​ ఫైనాన్స్​ కంపెనీలు ఇలాంటి సంప్రదాయేతర కోర్సులకు లోనులు ఇస్తాయి. కానీ అధిక వడ్డీలు వసూలు చేస్తాయనే విషయం గుర్తుంచుకోవాలి.

ఎంత లోన్ వస్తుంది?

విద్యార్థులకు ఇచ్చే ఎడ్యూకేషన్ లోన్స్ ఎంత మొత్తం వరకు ఇవ్వాలనే విషయంలో ప్రభుత్వ రంగ బ్యాంకులకు ఒక పరిమితి ఉంటుంది. కానీ అదే ప్రైవేట్​ బ్యాంకులు లోన్ తీసుకునే విద్యార్థుల కాలేజ్​-కోర్స్​ కాంబినేషన్​ చూసుకుంటాయి. అదే విధంగా విద్యార్థికి ఆ కోర్సులు చేయడం వల్ల భవిష్యత్​లో ఎంత మేరకు ఉద్యోగ అవకాశాలు మెరుగ్గా ఉంటాయో కూడా అంచనా వేస్తాయి. వాటి ఆధారంగానే విద్యారుణాలు ప్రైవేట్ బ్యాంకులు ఎక్కువ మొత్తంలో మంజూరు చేస్తూ ఉంటాయి.

లోన్ అందుకోవడానికి ఎంత సమయం పడుతుంది?

ప్రైవేట్​ బ్యాంకులతో పోలిస్తే సాధారణంగా ప్రభుత్వ రంగ బ్యాంకుల్లో వడ్డీ రేట్లు తక్కువగానే ఉంటాయి. కానీ ఈ బ్యాంకుల నుంచి లోన్ తీసుకోవడం అంత సులభమైన పని కాదు. విద్యా రుణం పొందడానికి చాలా ప్రాసెస్​ ఉంటుంది. ప్రైవేట్ బ్యాంకుల్లో విద్యారుణాలు చాలా త్వరగానే లభిస్తాయి. కానీ వడ్డీ రేట్లు మాత్రం కాస్త ఎక్కువ మొత్తంలో ఉంటాయి.

వడ్డీ రేట్లు ఎలా ఉంటాయి..?

Education Loan Interest Rate : సాధారణంగా ప్రైవేట్ బ్యాంకులతో పోలిస్తే ప్రభుత్వరంగ బ్యాంకులు తక్కువ వడ్డీకే విద్యా రుణాలు అందిస్తూ ఉంటాయి. కానీ ఇక్కడ ఒక విషయం తెలుసుకోవాలి. వడ్డీ రేటు.. రుణం తీసుకుంటున్నవారి క్రెడిట్ స్కోర్(Credit Score), ఆర్థిక స్థితిగతులు, కోర్స్​ తీసుకున్న విద్యా సంస్థ పేరు, ప్రఖ్యాతులపైన ఆధారపడి ఉంటుందనే విషయం గుర్తుంచుకోవాలి. బ్యాంకులు రుణాలు మంజూరు చేసేటప్పుడు లోన్స్​కి తోడు ప్రాసెసింగ్​ ఫీజునూ వసూలు చేస్తాయి.

ప్రభుత్వ బ్యాంకుల్లో వడ్డీ ఇలా..

Education Loan Interest Rates in Public Sector Banks :ప్రస్తుతం ప్రభుత్వరంగ బ్యాంక్ అయిన ఎస్​బీఐ(State Bank of India)లో ఎడ్యుకేషనల్ లోన్స్​ వడ్డీరేటు.. 8.2 శాతం నుంచి ప్రారంభమవుతుంది. యూనియన్​ బ్యాంక్​ ఆఫ్​ ఇండియాలో 8.85 శాతం, పంజాబ్​ నేషనల్ బ్యాంక్​లో 8.55 శాతం నుంచి మొదలవుతాయి. ఎక్కువ మొత్తంలో రుణాలు తీసుకుంటే ఇంకా వడ్డీ రేట్లు పెరిగే అవకాశం ఉంటుంది. అలాగే మహిళా విద్యార్థులు కొన్ని బ్యాంకుల్లో 0.50 శాతం నుంచి 1 శాతం వరకు రాయితీని పొందవచ్చు.

ప్రైవేట్ బ్యాంకుల్లో వడ్డీ రేట్లు..

Education Loan Interest Rates in Private Banks :ప్రైవేట్ బ్యాంకుల్లో విద్యారుణాలపై వడ్డీ రేట్లు ఐసీఐసీఐ బ్యాంకు(ICICI Bank)9.85 శాతం, హెచ్​డీఎఫ్​సీ బ్యాంకు 9.55 శాతం, యాక్సిస్​ బ్యాంకు 13.7 శాతం నుంచి వీటిల్లో వడ్డీరేట్లు ప్రారంభమవుతాయి. అయితే కోర్స్​, విద్యాసంస్థ, ఉద్యోగ అవకాశాలు మొదలైన అంశాలు పరిగణనలోకి తీసుకుని ఈ వడ్డీ రేట్లలో మార్పులు కూడా ఉండాయని రుణగ్రహీతలు గుర్తుంచుకోవాలి.

పూచీకత్తు చూపించాలా..?

Educational Loans Collateral Requirements : ప్రభుత్వ రంగ బ్యాంకుల్లో విద్యార్థులు ఆయా బ్యాంకుల నిర్దిష్ట మొత్తం కంటే అధిక మొత్తం రుణాలు కావాలంటే పూచీకత్తు చూపించాలి. దానికోసం ఆస్తులను ఆ బ్యాంకుల వద్ద తాకట్టు పెట్టాల్సి ఉంటుందనే విషయం తెలుసుకోవాలి. సాధారణంగా ప్రైవేట్ బ్యాంకులు చాలా వరకు ఇలాంటి తాకట్టులు అడగవు. మరో విషయం ఏమిటంటే ఏదే ప్రభుత్వ రంగ బ్యాంకుల వద్ద ఎడ్యూకేషనల్ లోన్ తీసుకోవాలంటే రుణగ్రహీత మార్జిన్​ మనీని చూపించాలి. సాధారణంగా ప్రైవేట్ బ్యాంకులు ఈ మార్జిన్ ​మనీని అడగవు.

ఎంత కాలంలోపు తీర్చాలి..?

విద్యా రుణాలు తీర్చడానికి ప్రభుత్వ రంగ బ్యాంకులు మారటోరియం పీరియడ్, గ్రేస్​ పీరియడ్​ ఇస్తుంటాయి. అంటే ఈ కాలంలో ప్రత్యేకంగా రుణగ్రహీత అదనపు వడ్డీ చెల్లించాల్సిన అవసరం ఉండదు. కానీ ప్రైవేట్​ బ్యాంకులు మాత్రం మారటోరియం సమయంలోనూ కొంత మేరకు లేదా పూర్తి స్థాయిలో వడ్డీని వసూలు చేస్తూ ఉంటాయనే విషయం గుర్తుంచుకోవాలి. అలాగే ప్రైవేట్​ బ్యాంకు తీసుకున్న రుణాలు ముందుగా చెల్లించాలనుకుంటే దానికి కూడా ముందస్తు చెల్లింపు రుసుమును వసూలు చేస్తాయి. కానీ ప్రభుత్వ రంగ బ్యాంకుల్లో ఇలా ముందస్తు చెల్లింపు రుసుములు వసూలు చేయరు. పైన పేర్కొన్న విషయాలను పూర్తిగా అర్థం చేసుకొని ఏ బ్యాంకులో మీకు బెటర్​గా అనిపిస్తే దాంట్లో విద్యారుణాలు తీసుకోండి.