ఖర్చు చేయకుండానే రూ.1000కోట్లు లెక్క.. 'హీరో' మెడకు ఐటీ ఉచ్చు!

Hero Motocorp News: హీరో మోటోకార్ప్ వేర్వేరు అవసరాల కోసం దాదాపు రూ.1000కోట్లకుపైగా ఖర్చు చేసినట్లు తప్పుడు లెక్కలు చూపించిందని ఐటీశాఖ సోదాల్లో తేలింది. కంపెనీకి సంబంధించిన ఆర్థిక దస్త్రాలు, డిజిటల్ డేటాను అధికారులు జప్తుచేసి, మరింత దర్యాప్తు చేస్తున్నారు.

Hero Motocorp News: దేశంలోనే అతిపెద్ద ద్విచక్రవాహన తయారీ సంస్థ హీరో మోటోకార్ప్​ కార్యాలయాలపై దాడులు చేసిన ఐటీ శాఖ కీలక విషయాలు కనుగొంది. రూ.1000 కోట్లను వేర్వేరు అవసరాల కోసం ఖర్చు చేసినట్లు ఆ సంస్థ తప్పుడు లెక్కలు చూపించినట్లు ఆదాయ పన్నుశాఖ గుర్తించింది. స్థిరాస్తుల కొనుగోలు కోసం నిబంధనలకు విరుద్ధంగా రూ.100 కోట్లు నగదు లావాదేవీలు జరిపినట్లు తేల్చింది. కంపెనీకి సంబంధించిన ఆర్థిక దస్త్రాలు, డిజిటల్ డేటాను జప్తుచేశారు.

హీరో మోటోకార్ప్ ఛైర్మన్​, ఎండీ పవన్ ముంజల్ ఛత్తర్​పుర్​లో ఓ ఫార్మ్​హౌస్​ను నల్లధనంతో కొనుగోలు చేశారని, పన్ను ఎగవేసేందుకు మార్కెట్​ ధరలో మార్పులు చేశారని అధికార వర్గాలు తెలిపాయి. ఆదాయ పన్ను చట్టంలోని సెక్షన్ 269ఎస్​ఎస్ ప్రకారం స్థిరాస్థి లావాదేవీల్లో రూ.20వేలు అంతకంటే ఎక్కువ నగదు రూపంలో స్వీకరిస్తే శిక్ష ఉంటుంది. అయితే.. ఫామ్​హౌస్​ కోసం రూ.100 కోట్లు నగదు రూపంలో చెల్లించినట్లు ఐటీ శాఖ గుర్తించింది.

పన్ను ఎగవేత ఆరోపణలతో మార్చి 23న హీరో మోటో కార్ప్​ కార్యాయాలపై ఐటీ శాఖ దాడులు నిర్వహించింది. పవన్ ముంజల్​ సహా ఇతర అధికారుల నివాసాల్లోనూ సోదాలు జరిపింది. దిల్లీలోని 40కి పైగా కార్యాలయాల్లో మార్చి 26న సోదాలు పూర్తయ్యాయి.

ఇదీ చూడండి:మరో దిగ్గజ సంస్థకు సీఈఓగా భారత సంతతి వ్యక్తి ​