HDFC AND HDFC BANK MERGER : హెచ్డీఎఫ్సీ బ్యాంకు త్వరలో ప్రపంచ బ్యాంకుల సరసన నిలువనుంది. ముఖ్యంగా హెచ్డీఎఫ్సీ ట్విన్స్ విలీనం తరువాత విలువపరంగా దేశంలో అతిపెద్ద ప్రైవేట్ బ్యాంకుగా అవతరించనుంది.
దేశీయ ప్రైవేట్ రంగ బ్యాంకింగ్ దిగ్గజం హెచ్డీఎఫ్సీ బ్యాంక్.. మోర్టగేజ్ లెండర్ హెచ్డీఎఫ్సీ విలీన ప్రక్రియ జులై 1న పూర్తికానుంది. జులై 13న హెచ్డీఎఫ్సీ రికార్డ్ తేదీగా ఉంటుంది.
నంబర్ వన్ స్థానంలో..
HDFC Bank net worth : ఒకసారి హెచ్డీఎఫ్సీ, హెచ్డీఎఫ్సీ బ్యాంకు విలీనం పూర్తి అయితే వీటి సంయుక్త విలువ.. దేశీయ ప్రైవేట్ బ్యాంకులు ఐసీఐసీఐ బ్యాంకు, కోటక్ మహీంద్రా బ్యాంకు, యాక్సిస్ బ్యాంకు, ఇండస్ఇండ్ బ్యాంకుల సంయుక్త విలువ కంటే చాలా ఎక్కువ అవుతుంది. అంతే కాదు అన్ని ప్రభుత్వ రంగ బ్యాంకుల సంయుక్త విలువ కంటే కూడా చాలా అధికంగా ఉంటుంది.
స్టాక్ మార్కెట్లో హెచ్డీఎఫ్సీ లిమిటెడ్ ట్రేడింగ్కు శనివారమే (జులై 1) చివరి రోజు. హెచ్డీఎఫ్సీ మార్కెట్ విలువ రూ.5.19 లక్షల కోట్లు; హెచ్డీఎఫ్సీ బ్యాంకు మార్కెట్ విలువ రూ.9.47 లక్షల కోట్లు. ఈ రెండూ కలిస్తే మొత్తంగా వీటి మార్కెట్ విలువ రూ.14.7 లక్షల కోట్లు అవుతుంది. మరోవైపు భారతదేశంలోని ప్రభుత్వ రంగ బ్యాంకులన్నింటి మార్కెట్ విలువ రూ.9.77 లక్షల కోట్లు మాత్రమే. దేశీయ ప్రైవేట్ రంగ బ్యాంకుల విషయానికి వస్తే.. ఐసీఐసీఐ బ్యాంకు, కోటక్ మహీంద్రా బ్యాంకు, యాక్సిస్ బ్యాంకు, ఇండస్ఇండ్ బ్యాంకుల మొత్తం మార్కెట్ విలువ రూ.14.3 లక్షల కోట్లు.
వరల్డ్స్ టాప్ 61 కంపెనీగా..
HDFC bank rank in world : హెచ్డీఎఫ్సీ ట్విన్స్ మెర్జర్ తరువాత ప్రపంచంలోని అత్యంత విలువైన టాప్ 100 కంపెనీల్లో.. హెచ్డీఎఫ్సీ 61వ స్థానంలో నిలువనుంది. ప్రస్తుతం ఈ లిస్ట్లో 3 ట్రిలియన్ డాలర్ల మార్కెట్ వాల్యూతో యాపిల్ అగ్రస్థానంలో ఉంది. దీని తరువాత మైక్రోసాఫ్ట్ 2.50 ట్రిలియన్ డాలర్లు, సౌదీ ఆరాంకో 2.08 ట్రిలియన్ డాలర్ల మార్కెట్ క్యాప్తో రెండు, మూడు స్థానాల్లో ఉన్నాయి.
మోర్గాన్ స్టాన్లీని దాటేసి..
త్వరలో ప్రపంచంలోని అత్యంత పెద్ద బ్యాంకుల్లో హెచ్డీఎఫ్సీ నాల్గన స్థానాన్ని కైవసం చేసుకోనుంది. ప్రస్తుతం జేపీ మోర్గాన్ 405 బిలియన్ డాలర్ల మార్కెట్ వాల్యూతో ప్రపంచంలోనే అగ్రగామి బ్యాంకుగా కొనసాగుతోంది. బ్యాంక్ ఆఫ్ అమెరికా 223 బిలియన్ డాలర్లు, ఇండస్ట్రియల్ అండ్ కమర్షియల్ బ్యాంక్ ఆఫ్ చైనా 223 బిలియన్ డాలర్ల మార్కెట్ విలువతో తరువాతి స్థానాల్లో ఉన్నాయి.
త్వరలోనే హెచ్ఎస్బీసీ హోల్డింగ్స్, బ్యాంక్ ఆఫ్ చైనా, మోర్గాన్ స్టాన్లీ, రాయల్ బ్యాంక్ ఆఫ్ కెనడా బ్యాంకులను మార్కెట్ వాల్యూ పరంగా హెచ్డీఎఫ్సీ వెనక్కు నెట్టివేయనుంది.
ఇప్పటికే హెచ్డీఎఫ్సీ లిమిటెడ్, హెచ్డీఎఫ్సీ బ్యాంకులు దాదాపుగా అన్ని ఫార్మాలిటీలను పూర్తి చేశాయి. అధికారికంగా జులై 13న విలీన ప్రక్రియ పూర్తవుతుంది. ఒకసారి విలీనం అయిన తరువాత హెచ్డీఎఫ్సీ షేర్ హోల్డర్లు.. హెచ్డీఎఫ్సీ బ్యాంకులో 41 శాతం వరకు పొందుతారు. ముఖ్యంగా స్వాప్ రేషియో 25:42గా ఉంటుంది. అంటే హెచ్డీఎఫ్సీ లిమిటెడ్కు చెందిన ప్రతి 25 షేర్లకు.. హెచ్డీఎఫ్సీ బ్యాంకుకు చెందిన 42 షేర్లు ఇవ్వడం జరుగుతుంది.
