fed interest rate hike: అమెరికా కేంద్ర బ్యాంకు అయిన ఫెడరల్ రిజర్వ్ అందరూ ఊహించినట్లుగానే బుధవారం అర్ధరాత్రి (భారత కాలమానం ప్రకారం) కీలక రేటును 75 బేసిస్ పాయింట్లు పెంచింది. దీంతో ఫెడ్ ఫండ్ రేటు 2.25-2.75 శాతం శ్రేణికి చేరింది. 40 ఏళ్ల గరిష్ఠానికి చేరిన ధరల కట్టడి కోసమే, ఫెడ్ కఠిన వైఖరి అవలంబిస్తోంది. అయితే రేట్ల పెంపు వల్ల ఆర్థిక వ్యవస్థపై భారం పడే అవకాశం ఉందని విశ్లేషకులు అంటున్నారు.
మొత్తం మీద ఫెడ్ జూన్-జులై నెలల్లో కలిపి 1.5 శాతం మేర వడ్డీ రేటు పెంచినట్లయింది. పాల్ వాకర్ ఫెడ్ ఛైర్గా ఉన్నప్పుడు 1980ల్లో చేసిన పెంపు తర్వాత ఇదే అత్యధికం కావడం గమనార్హం. దీర్ఘకాలంలో ద్రవ్యోల్బణ రేటును 2 శాతానికి తగ్గించడమే లక్ష్యంగా ఈ నిర్ణయం తీసుకున్నట్లు ఎఫ్ఓఎమ్సీ ప్రకటన వెల్లడించింది.