ఆ విమాన సంస్థకు డీజీసీఏ షాక్.. 90 మంది పైలట్లపై నిషేధం

DGCA SpiceJet pilots: ప్రముఖ ఎయిర్​లైన్ సంస్థ స్పైస్​జెట్​కు డీజీసీఏ షాక్ ఇచ్చింది. 90 మంది పైలట్లపై నిషేధం విధించింది. బోయింగ్ 737 మ్యాక్స్ విమానాలను వీరు నడపకూడదని స్పష్టం చేసింది.

DGCA SpiceJet pilots: సరైన శిక్షణ పొందని 90 మంది పైలట్లపై విమానయాన నియంత్రణ సంస్థ డీజీసీఏ కొరడా ఝులిపించింది. స్పైస్​జెట్ నియమించుకున్న ఈ పైలట్లు బోయింగ్ 737 మ్యాక్స్ విమానాలు నడపకుండా నిషేధించింది. వీరంతా సరిగా శిక్షణ తీసుకోలేదని గుర్తించిన డీజీసీఏ... ఈ మేరకు చర్యలు తీసుకుంది. 'ప్రస్తుతానికి ఈ పైలట్లు 'మ్యాక్స్' విమానాలు నడపకుండా ఆంక్షలు విధిస్తున్నాం. పైలట్లంతా మరోసారి శిక్షణ తీసుకోవాలి. విజయవంతంగా ట్రైనింగ్ పూర్తి చేసినవారు విమానాలు నడపొచ్చు' అని డీజీసీఏ చీఫ్ అరుణ్ కుమార్ పేర్కొన్నారు. ఇలాంటి పైలట్ల నియామకం వెనక ప్రధాన కారకులను గుర్తించి కఠిన చర్యలు తీసుకుంటామని అరుణ్ కుమార్ స్పష్టం చేశారు.

స్పైస్​జెట్ విమానం

విమాన ప్రమాదం నేపథ్యంలో చర్యలు:ఇథియోపియా ఎయిర్​లైన్​కు చెందిన 737 బోయింగ్ మ్యాక్స్ ఎయిర్​క్రాఫ్ట్ 2019 మార్చి 13లో కుప్పకూలింది. ఈ ప్రమాదంలో 157 మంది ప్రాణాలు కోల్పోయారు. ఈ ఘటన జరిగిన మూడు రోజుల తర్వాత ఈ తరహా విమానాలను డీజీసీఏ నిషేధించింది. బోయింగ్ సంస్థ సాఫ్ట్​వేర్​లో మార్పులు చేసిన తర్వాత గతేడాది ఆగస్టులో నిషేధాన్ని ఎత్తివేసింది. ఈ విమానాలు నడిపే పైలట్లు అందరూ సరైన శిక్షణ తీసుకోవాలని అప్పట్లోనే స్పష్టంగా చెప్పింది.

Boeing 737 max planes SpiceJet: బోయింగ్ 737 మ్యాక్స్ విమానాన్ని నడిపే పైలట్లు స్పైస్​జెట్​కు 650 మంది ఉన్నారు. అయితే, డీజీసీఐ తాజా ఆదేశాల నేపథ్యంలో 90 మందిని విధులకు దూరంగా ఉంచింది. శిక్షణ పూర్తి అయిన తర్వాత నియంత్రణ సంస్థ నుంచి అనుమతులు తీసుకొని వీరిని విధుల్లోకి తీసుకోనుంది. అయితే, దీని వల్ల సేవలకు అంతరాయం కలగడం లేదని స్పైస్​జెట్ స్పష్టం చేసింది. శిక్షణ పొందిన 560 మంది పైలట్లు అందుబాటులోనే ఉన్నారని వెల్లడించింది. 11 మ్యాక్స్ ఎయిర్​క్రాఫ్ట్​లు యథావిధిగా నడుస్తున్నాయని తెలిపింది. వీటిని నడిపేందుకు 144 మంది పైలట్లు అవసరం ఉంటుందని పేర్కొంది. ఇండియాలోని ఎయిర్​లైన్లలో స్పైస్​జెట్ మాత్రమే బోయింగ్ మ్యాక్స్ విమానాలను నడిపిస్తోంది.

ఇదీ చదవండి:ప్రపంచ కుబేరుల జాబితాలో ఆరో స్థానానికి అదానీ