Credit Score : క్రెడిట్ స్కోర్ ప్రాధాన్యం గురించి చెప్పాల్సిన అవసరం లేదు. రుణ మంజూరులో ఇది ఎంత కీలక పాత్ర పోషిస్తుందో అందరికీ తెలిసిందే. వడ్డీరేటు నిర్ధారణకు బ్యాంకులు పరిగణనలోకి తీసుకుంటున్న అంశాల్లో ఇదొకటి. రుణ రేటు ఏమాత్రం తగ్గినా అది మన ఈఎంఐని.. తద్వారా మన నెలవారీ వ్యయాన్ని తగ్గిస్తుంది. ఇలా క్రెడిట్ స్కోర్ మన ఆర్థిక జీవితంలో ఒక ప్రధానమైన అంశంగా మారిపోయింది. అయితే, దీనికి సంబంధించి చాలా మందికి అన్ని విషయాలు తెలియవు. ఈ క్రమంలో క్రెడిట్ స్కోర్‌కు సంబంధించి అనేక అపోహలు ప్రచారంలో ఉన్నాయి. అవేంటి.. మరి నిజాలేంటో చూద్దాం..
క్రెడిట్ నివేదికను తరచూ తనిఖీ చేస్తే స్కోర్‌పై ప్రభావం పడుతుంది
అది నిజం కాదు. మీ క్రెడిట్ స్కోర్ ప్రభావితం అవుతుందనే ఆందోళన లేకుండా మీరు మీ క్రెడిట్ నివేదికను క్రమం తప్పకుండా తనిఖీ చేసుకోవచ్చు. ఒకవేళ బ్యాంకులు లేదా ఆర్థిక సంస్థలు ఒక నిర్ధిష్ట వ్యవధిలో ఒకేసారి మీ క్రెడిట్ వివరాల గురించి అడిగితే, అది మీ స్కోర్‌ను కొన్ని పాయింట్లు తగ్గించవచ్చు. అంతే తప్ప తరచూ తనిఖీ చేసుకోవడం మంచిదే అని నిపుణులు సైతం సూచిస్తున్నారు. ఫలితంగా ఎక్కడ లోపాలున్నాయో తెలుసుకొని వాటిని సరిదిద్దుకునే వెసులుబాటు ఉంటుంది.
మెరుగైన క్రెడిట్ స్కోర్‌కు దోహదపడే అంశాల్లో ఆదాయం ఒకటి
మీ క్రెడిట్ రిపోర్ట్ ఆధారంగానే మీ క్రెడిట్ స్కోర్‌ను నిర్ణయిస్తారు. క్రెడిట్ నివేదికలో అసలు ఆదాయానికి సంబంధించిన వివరాలు ఉండవు. మీరు నెలకు రూ.లక్షల్లో సంపాదిస్తున్నా.. మీ ఆర్థిక క్రమశిక్షణ, డబ్బు నిర్వహణ సరైన పద్ధతిలో లేకపోతే మీ క్రెడిట్ స్కోర్ తగ్గిపోతుంది.
పేలవమైన క్రెడిట్ స్కోర్ ఉంటే లోన్ రాదు
మీరు రుణం కోసం దరఖాస్తు చేసుకుంటే.. క్రెడిట్ స్కోర్ ఒక్కదాన్నే ప్రామాణికంగా తీసుకోరు. మీ ఆర్థిక చరిత్రను తెలియజేసే అనేక ఇతర అంశాలను కూడా పరిగణనలోకి తీసుకుంటారు. ఆదాయం, సహ దరఖాస్తుదారుడి క్రెడిట్ స్కోర్, బ్యాంకులకు మీపై ఉన్న నమ్మకం కూడా ప్రధాన పాత్ర పోషిస్తాయి. ఒకవేళ బ్యాంకు లేదా ఏదైనా ఆర్థిక సంస్థ క్రెడిట్ స్కోర్ తక్కువగా ఉందని మీ రుణ దరఖాస్తును తిరస్కరిస్తే ఇతర బ్యాంకులను సంప్రదించొచ్చు. అయితే, రుణరేటు మాత్రం అధికంగా ఉండే అవకాశం ఉంది.
డెబిట్ కార్డ్ ఉంటే క్రెడిట్ స్కోర్ మెరుగవుతుంది
డెబిట్ కార్డ్ అనేది సేవింగ్స్ ఖాతాను యాక్సెస్ చేయడానికి ఒక సాధనం మాత్రమే. క్రెడిట్ స్కోర్‌కు ఎలాంటి సంబంధం ఉండదు. బలమైన క్రెడిట్ స్కోర్‌ను నిర్మించుకోవాలంటే.. క్రెడిట్ కార్డును నిర్వహిస్తూ ఉండాలి. లేదా రుణం తీసుకొని దాన్ని సకాలంలో చెల్లించాలి. అయితే, క్రెడిట్ కార్డు పొందగానే లేక రుణం మంజూరు కాగానే స్కోర్ మెరుగవ్వదు. కొంత సమయం పడుతుంది.