Cement price per bag: దేశవ్యాప్తంగా నిర్మాణ వ్యయాలు గణనీయంగా పెరిగాయి. కొవిడ్‌ సంక్షోభం తర్వాత ఒక్కసారిగా డిమాండ్ పెరగడం వల్ల సరఫరా తగ్గి సిమెంటు, స్టీలు ధరలు భారీగా ఎగబాకాయి. సరిగ్గా ఇదే సమయంలో రష్యా-ఉక్రెయిన్ యుద్ధం రావడం అగ్నికి ఆజ్యం పోసినట్లయింది. యుద్ధం ఆరంభమైన తర్వాత బొగ్గు, పెట్రోలియం కోక్‌ ధరలు భారీగా పెరిగాయి. ఈ రెండూ సిమెంటు తయారీలో కీలక ముడిపదార్థాలు. పరిశ్రమ వర్గాల ప్రకారం.. పెట్‌కోక్‌ ధరలు గత ఆరు నెలల్లో 30-50 శాతం పెరిగాయి. ప్రముఖ రేటింగ్స్ సంస్థ క్రిసిల్ నివేదిక ప్రకారం.. దేశవ్యాప్తంగా గత ఏడాది వ్యవధిలో బస్తా సిమెంటు ధర రూ.390కు చేరింది. రానున్న రోజుల్లో ఈ ధర మరో రూ.25-50 పెరిగే అవకాశం ఉందని అంచనా వేసింది.
పెట్రో ధరల పెరుగుదలా ఓ కారణం:బొగ్గు, పెట్‌కోక్‌తో పాటు పెట్రోల్‌, డీజిల్‌ ధరలు అటు అంతర్జాతీయ మార్కెట్‌తో పాటు దేశీయంగానూ ఎగబాకుతున్నాయి. ఫలితంగా సిమెంటు తయారీ వ్యయం గణనీయంగా పెరుగుతోంది. ఇంధన ధరలు పెరగడం వల్ల సిమెంట్ ముడి పదార్థాల శుద్ధి, ప్యాకింగ్‌ మెటీరియల్‌ తయారీ, సరఫరా, ప్రయాణ ఖర్చులన్నీ పెరిగిపోతాయి. దీంతో ఈ భారాన్ని కంపెనీలు వినియోగదారులపై మోపే అవకాశం ఉంటుంది.
ముడిపదార్థాల ధరలు ఇలా:యుద్ధం ప్రారంభమైన తర్వాత అంతర్జాతీయ మార్కెట్‌లో బ్రెంట్‌ క్రూడ్‌ ఆయిల్‌ బ్యారెల్‌ సగటు ధర 21 శాతం పెరిగి 115 డాలర్లకు చేరింది. గత ఆర్థిక సంవత్సరం మొత్తంలో ధరలు 79 శాతం పెరగడం గమనార్హం. అదే సమయంలో అంతర్జాతీయ స్థాయిలో మార్చితో ముగిసిన త్రైమాసికంలో పెట్‌ కోక్‌ ధర 43 శాతం పెరిగింది. అమెరికా పెట్‌కోక్‌ గత ఏడాది ఏకంగా 96 శాతం ఎగబాకింది. దీంతో దేశీయ సంస్థలు మార్చిలో పెట్‌కోక్‌ ధరను 26 శాతం, ఏప్రిల్‌లో 21 శాతం పెంచాయి. సముద్ర రవాణా ఖర్చులు పెరగడం, సరఫరా వ్యవస్థల్లో ఇబ్బందుల వల్ల పెట్‌కోక్‌ దిగుమతి వ్యయం ఒక్కో టన్నుపై 130 డాలర్లు పెరిగినట్లు పరిశ్రమ వర్గాలు తెలిపాయి.