Amazon Layoffs : అమెరికా ఇ-కామర్స్‌ దిగ్గజ సంస్థ అమెజాన్ 10,000 మంది ఉద్యోగులను తగ్గించుకోనున్నట్లు తెలుస్తోంది. కార్పొరేట్‌, టెక్నాలజీ ఉద్యోగులను ఈ వారం నుంచే తొలగిస్తున్నట్లు సమాచారం. ఆర్థిక మందగమనం నేపథ్యంలో కొత్త నియామకాలు చేపట్టడాన్ని ఆపేసినట్లు, గతవారం అమెజాన్ ఓ ఉన్నతాధికారికి పంపిన అంతర్గత మెమో ద్వారా తెలుస్తోంది. అమెజాన్ రోబోటిక్స్‌ బృందంలో పనిచేస్తున్న వారికి పింక్‌ స్లిప్‌ (తొలగింపు లేఖ)లు ఇచ్చారని ఆ అధికారి చెప్పినట్లు ఓ ఆంగ్ల వెబ్‌సైట్‌ వెల్లడించింది. లింక్డ్‌ఇన్‌ ప్రకారం.. అమెజాన్ రోబోటిక్స్‌ విభాగంలో 3,766 మంది పనిచేస్తున్నారు. వీరిలో ఎంత మందిని ఇంటికి పంపించారనే విషయంపై ఆ ఆంగ్ల వెబ్‌సైట్‌ కచ్చిత వివరాలను వెల్లడించలేదు. లాభదాయకత లేని కొన్ని విభాగాల్లోని ఉద్యోగులను, కొత్త ఉద్యోగాలు వెతుక్కోవాల్సిందిగా సూచించినట్లు, 'లక్ష్యిత' ప్రాజెక్టుల్లో మాత్రం కొత్త నియామకాల ప్రక్రియను అమెజాన్ కొనసాగించనున్నట్లు తెలుస్తోంది.
ట్విట్టర్లో ఒప్పంద ఉద్యోగుల తొలగింపు
ట్విట్టర్ కొత్త యజమాని ఎలాన్‌ మస్క్‌, సంస్థను తన చేతుల్లోకి తీసుకున్న వారానికే దాదాపు సగం మంది ఉద్యోగులకు ఉద్వాసన పలికారు. తాజాగా పొరుగు సేవల విభాగంలోనూ ఉద్యోగులను తొలగిస్తున్నట్లు తెలుస్తోంది. ఈ విభాగంలో సుమారు 3,000 మందిని ముందస్తు నోటీసులు ఇవ్వకుండానే తొలగించినట్లు సమాచారం. కంపెనీ ఇ-మెయిల్‌, ఇంటర్నల్‌ కమ్యూనికేషన్‌ సిస్టమ్స్‌తో ఉద్యోగులు యాక్సెస్‌ కోల్పోయిన తర్వాతే, తాము లేఆఫ్‌లకు గురైనట్లు గుర్తించామని వారు చెప్పడం గమనార్హం. అమెరికాతో పాటు ఇతర దేశాల్లోని ట్విట్టర్ కార్యాలయాల్లో ఈ లేఆఫ్‌లు ఉన్నట్లు అంతర్జాతీయంగా కథనాలు వెలువడ్డాయి. ట్విట్టర్కు చెందిన కంటెంట్‌ మోడరేషన్‌, స్థిరాస్తి, మార్కెటింగ్‌, ఇంజినీరింగ్‌, ఇతర విభాగాల్లోని పొరుగు సేవల ఉద్యోగులు తొలగింపునకు గురయ్యారు. వారిని తొలగించినట్లు కాంట్రాక్టర్లకు ఇ-మెయిల్‌ ద్వారా సమాచారమిచ్చారట. తాజా ఉద్యోగ కోతలపై ట్విట్టర్ /మస్క్‌ నుంచి అధికారిక ప్రకటన ఏదీ రాలేదు.