అదానీ ఎంటర్‌ప్రైజెస్‌కు బలమైన బ్యాలెన్స్ షీట్, సురక్షితమై ఆస్తులు ఉన్నాయని.. తీసుకున్న రుణాలు తిరిగి చెల్లించడంలో అద్భుతమైన ట్రాక్ రికార్డ్ ఉందని ఆ సంస్థ అధిపతి గౌతమ్ అదానీ పేర్కొన్నారు. ఫాలో ఆన్ పబ్లిక్ ఆఫర్(ఎఫ్పీఓ)పై ముందుకు వెళ్లకూడదని తీసుకున్న నిర్ణయం.. సంస్థపై, కంపెనీ భవిష్యత్తు ప్రణాళికలపై ఎలాంటి ప్రభావం చూపదని స్పష్టం చేశారు. గత కొద్దిరోజులుగా అదానీ షేర్లు తీవ్రంగా నష్టపోతున్న నేపథ్యంలో ఆయన ప్రత్యేక వీడియో సందేశం విడుదల చేశారు.
"ఫాలో ఆన్ పబ్లిక్ ఆఫర్ ద్వారా సేకరించిన నిధులను ఖర్చు చేయకూడదని తీసుకున్న నిర్ణయం చాలా మందికి ఆశ్చర్యపరిచేదే. కానీ మార్కెట్ అస్థిరతను చూసుకుంటే ఎఫ్పీఓతో కొనసాగడం నైతికంగా సరైనది కాదని బోర్డు భావించింది. పెట్టుబడిదారుల ప్రయోజనాలను దృష్టిలో ఉంచుకుని ఎఫ్పీఓతో ముందుకు సాగకూడదని నిర్ణయించుకున్నాం. మార్కెట్లలో అస్థిరత ఉన్నప్పటికీ పెట్టుబడిదారులు.. కంపెనీపై ఉంచిన విశ్వాసం, నమ్మకం.. మాకు భరోసా కలిగించింది. పెట్టుబడిదారుల నుంచి అధిక మద్దతు పొందడం ఆశీర్వాదంగా భావిస్తున్నాను. వారి విశ్వాసం వల్లే నేను జీవితంలో చాలా సాధించాను. వారి పట్ల ఎప్పటికీ రుణపడి ఉంటాను. నా పెట్టుబడిదారుల ఆసక్తి నాకు చాలా ముఖ్యమైనది."
--గౌతమ్ అదానీ, అదానీ గ్రూప్ ఛైర్మన్