ప్రముఖ వార్తా సంస్థ న్యూదిల్లీ టెలివిజన్(ఎన్డీటీవీ) ప్రమోటర్ గ్రూప్ అయిన 'ఆర్ఆర్పీఆర్'కు ఎన్డీటీవీ వ్యవస్థాపకులు ప్రణయ్ రాయ్, ఆయన భార్య రాధికా రాయ్ రాజీనామా చేశారు. స్టాక్ మార్కెట్ ఫైలింగ్ ద్వారా ఈ విషయం వెల్లడైంది. వీరి స్థానంలో సుదీప్త భట్టాచార్య, సంజయ్ పుగాలియా, సెంథిల్ సినియా చెంగల్వరయన్ను డైరెక్టర్లుగా నియమించేందుకు ఆర్ఆర్పీఆర్ బోర్డు మంగళవారం ఆమోదం తెలిపింది.
ఆర్ఆర్పీఆర్ సంస్థను అదానీ గ్రూప్ ఇప్పటికే టేకోవర్ చేసుకుంది. ఎన్డీటీవీలో ఆర్ఆర్పీఆర్కు 29.18 శాతం, ప్రణయ్, రాధిక వద్ద 32.26 శాతం వాటాలు ఉన్నాయి. ప్రణయ్ రాయ్ ప్రస్తుతం.. ఎన్డీటీవీ ఛైర్పర్సన్గా ఉన్నారు. రాధికా రాయ్.. ఛానల్కు ఎగ్జిక్యూటివ్ డైరెక్టర్గా వ్యవహరిస్తున్నారు. అయితే, న్యూస్ ఛానల్ బోర్డు నుంచి మాత్రం వీరిద్దరూ తప్పుకోలేదు.
షేరు రయ్ రయ్
మరోవైపు, స్టాక్ మార్కెట్లో ఎన్డీటీవీ షేరు జోరు కొనసాగుతోంది. బుధవారం మరో 5 శాతం ఎగబాకి.. అప్పర్ సర్క్యూట్ను తాకింది. ప్రస్తుతం బీఎస్ఈలో కంపెనీ షేరు విలువ రూ.447.50కు చేరగా.. ఎన్ఎస్ఈలో రూ.446.30గా ఉంది. ఐదు రోజుల్లో ఎన్డీటీవీ షేరు 24.74 శాతం వృద్ధి సాధించింది.
ఎన్డీటీవీ ప్రమోటర్ కంపెనీ అయిన ఆర్ఆర్పీఆర్ హోల్డింగ్‌ ప్రైవేట్‌ లిమిటెడ్‌కు విశ్వప్రధాన్‌ కమర్షియల్‌ ప్రైవేట్‌ లిమిటెడ్‌ రూ.403.85 కోట్లు రుణం ఇచ్చింది. తర్వాతి కాలంలో వీసీపీఎల్ యాజమాన్యం చేతులు మారి.. అదానీ గ్రూప్నకు చెందిన సంస్థ దాన్ని కొనుగోలు చేసింది. ముందస్తుగా చేసుకున్న ఒప్పందం ప్రకారం.. రుణాన్ని 29.18 శాతం వాటాగా మార్చుకొని ఎన్డీటీవీలో అదానీ గ్రూప్ వాటాలు పొందింది. దీనికి అదనంగా 26 శాతం వాటా కొనుగోలు కోసం ఓపెన్‌ ఆఫర్‌ ప్రకటించింది. ఈ ఆఫర్‌ పూర్తయితే ఎన్డీటీవీలో మెజార్టీ వాటాదారుగా అదానీ గ్రూప్ అవతరిస్తుంది.
