PAN Activation Process : మీరు జులై 30లోపు ఆధార్-పాన్ కార్డులను లింక్ చేయడం మర్చిపోయారా? అయితే జులై 1 నుంచి మీ పాన్ పనిచేయడం ఆగిపోయి ఉంటుంది. దీని వల్ల మీపై అధిక టీడీఎస్, టీసీఎస్ భారం పడుతుంది.
ఆదాయపన్ను చట్టం 1961 ప్రకారం, ప్రతి ఒక్కరూ కచ్చితంగా ఆధార్-పాన్ కార్డులను అనుసంధానం చేసుకోవాలి. 80ఏళ్లు పైబడిన వృద్ధులకు మాత్రం దీని నుంచి మినహాయింపు ఉంది. అలాగే అసోం, జమ్ము కశ్మీర్, మేఘాలయ ప్రజలకు కూడా మినహాయింపు ఇచ్చారు. కానీ మిగిలిన ప్రాంతాల ప్రజలు తప్పనిసరిగా ఆధార్-పాన్ అనుసంధానం చేసుకుని తీరాలి. అయితే పలుమార్లు ప్రభుత్వం గడువు పొడిగించినప్పటికీ.. చాలా మంది పాన్-ఆధార్ అనుసంధానం చేయలేదు. దీనితో 2023 జూన్ 30 వరకు రూ.1000 అపరాధ రుసుముతో ఆ రెండు కార్డులను లింక్ చేసుకోవడానికి మరో అవకాశం కూడా కల్పించడం జరిగింది. ఇప్పుడు ఆ గడువు కూడా ముగిసిపోయింది.
పెనాల్టీ కట్టి 'పాన్'ను యాక్టివేట్ చేసుకోండి!
Activate PAN Card online : ఒక వేళ మీరు గడువులోగా పాన్-ఆధార్ అనుసంధానం చేయకపోతే, జులై 1 నుంచి మీ పాన్ కార్డు ఇన్ఆపిరేటివ్ అయిపోయి ఉంటుంది. అంటే పాన్ పనిచేయడం ఆగిపోయి ఉంటుంది. కానీ మీరు ఇప్పుడు కూడా దానిని యాక్టివేట్ చేసుకోవడానికి అవకాశం ఉంది. ఇందుకోసం సెక్యూరిటీస్ డిపాజిటరీ లిమిటెడ్ (NSDL) పోర్టల్లో చలాన్ నంబర్ ITNS 280 కింద రూ.1000 పెనాల్టీ చెల్లిస్తే సరిపోతుంది.
పెనాల్టీ చెల్లించినా పాన్-ఆధార్ లింక్ కాలేదా?
PAN reactivation penalty : కొంత మంది అపరాధ రుసుము రూ.1000 చెల్లించినప్పటికీ ఆధార్-పాన్ కార్డు అనుసంధానం జరగలేదు. ముఖ్యంగా పెనాల్టీ చెల్లించినప్పటికీ, చలాన్ డౌన్లౌడ్ కావడం లేదు. ఈ సమస్యపై ఆదాయపన్ను శాఖ స్పందించింది. యూజర్లు ఇన్కం-టాక్స్ వెబ్సైట్లో లాగిన్ అయిన తరువాత పోర్టల్లో 'ఈ-పే ట్యాక్స్' ట్యాబ్లో చలానా స్టేటస్ను తనిఖీ చేసుకోవచ్చని పేర్కొంది. అలాగే చలానా చెల్లింపు విజయవంతమైతే, పాన్ హోల్డర్లు.. ఆధార్తో పాన్ను లింక్ చేసుకోవచ్చని స్పష్టం చేసింది.
ఆధార్ - పాన్ లింక్ చేయకపోతే ఏమవుతుంది?
PAN inoperative effects : వాస్తవానికి బయోమెట్రిక్ ఆధార్తో పాన్ను లింక్ చేయకుండానే ఆదాయపన్ను రిటర్నులు (ఐటీఆర్) దాఖలు చేయవచ్చు. కానీ ఆధార్-పాన్ అనుసంధానం చేసేవరకు.. ఆదాయపన్ను శాఖ ఈ ఐటీఆర్ను ప్రాసెస్ చేయదు. వాస్తవానికి ఆదాయపన్ను చట్టంలోని 114బీ ప్రకారం, పాన్ లేకపోతే దాదాపు 15 రకాల లావాదేవీలు నిర్వహించలేము. అవేంటో ఇప్పుడు చూద్దాం.
- బ్యాంకు అకౌంట్ ప్రారంభించలేము.
- క్రెడిట్ లేదా డెబిట్ కార్డు దరఖాస్తు దాఖలు చేయలేము.
- స్టాక్ బ్రోకింగ్, డీమ్యాట్ అకౌంట్ ఓపెన్ చేయలేము.
- హోటల్ లేదా రెస్టారెంట్లో రూ.50,000 కంటే మించిన బిల్లులు నగదు రూపంలో చెల్లించలేము.
- రూ.50,000 కంటే ఎక్కువ సొమ్ముతో మ్యూచువల్ ఫండ్ యూనిట్స్ కొనుగోలు చేయలేము.
- రూ.50,000 కంటే ఎక్కువ సొమ్ముతో డిబెంచర్లు, బాండ్లు తీసుకోలేము.
- బ్యాంకులో ఒక రోజులో రూ.50,000 కంటే ఎక్కువ సొమ్ము డిపాజిట్ చేయలేము.
- రూ.50,000కు మంచిన బ్యాంకు డ్రాఫ్ట్, పే ఆర్డర్, బ్యాంకర్స్ చెక్ తీసుకోవడం కుదరదు.
- రూ.50,000కు మించిన టైమ్ డిపాజిట్ చేయడానికి వీలుపడదు.
- రూ.50,000 కంటే ఎక్కువ మొత్తం ప్రీమియం ఉన్న బీమా పాలసీలను కొనుగోలు చేయలేము.
- రూ.1,00,000కు మించిన సెక్యూరిటీలు (షేర్లు) కొనడం, అమ్మడం చేయలేము.
- స్టాక్ మార్కెట్లో నమోదుకాని కంపెనీల్లో రూ.1,00,000 విలువకు మించి ఈక్విటీ షేర్లు కొనుగోలు చేయడానికి వీలుపడదు.
పన్నుల భారం పడుతుంది!
పాన్ కార్డు క్రియాశీలకంగా లేకపోతే కొన్ని రకాల పనులకు అధిక పన్ను చెల్లించాల్సి వస్తుంది. అవి ఏమిటంటే..
- మోటార్ వాహనాలు కొనుగోలు చేస్తే, అధిక పన్ను చెల్లించాల్సి వస్తుంది. అయితే ద్విచక్ర వాహనాలకు ఈ విషయంలో మినహాయింపు ఉంది.
- రూ.10 లక్షలు కంటే ఎక్కవ విలువైన స్థిరాస్తిని కొనుగోలు చేసినప్పుడు అధికంగా పన్నులు చెల్లించాల్సి వస్తుంది.
- రూ.2 లక్షలకు మించిన విలువైన వస్తువులను కొనుగోలు చేయడానికి, సేవలను పొందడానికి అధికంగా పన్నులు చెల్లించాల్సి ఉంటుంది.
ఇంకా అవకాశం ఉంది!
Aadhaar PAN linking : పాన్-ఆధార్ అనుసంధానం చేయడానికి ఇంకా అవకాశం ఉంది. రూ.1000 అపరాధ రుసుము చెల్లించి పాన్-ఆధార్ అనుసంధానం కోసం దరఖాస్తు చేసుకోవచ్చు. అందుకే ఇప్పటికైనా త్వరపడడం మేలు.
