యుద్ధం ఎఫెక్ట్​.. అమ్మకాల వెల్లువ.. మార్కెట్లలో భారీ పతనం

12:44 March 02

సూచీల కుదేలు..

రష్యా- ఉక్రెయిన్​ యుద్ధం.. మండుతున్న చమురు ధరలు.. ఫలితంగా అమ్మకాల ఒత్తిడితో దేశీయ స్టాక్​ మార్కెట్లు కుదేలవుతున్నాయి. ఉదయం నుంచి భారీగా పతనమవుతున్నాయి. సెన్సెక్స్​ ఏకంగా 1200 పాయింట్ల నష్టంతో.. 55 వేల 40 వద్ద కొనసాగుతోంది.

నిఫ్టీ దాదాపు 300 పాయింట్లు కోల్పోయి.. 16 వేల 485 వద్ద ఉంది.

లాభనష్టాల్లో..

యుద్ధం జరుగుతున్నా.. కోల్​ ఇండియా, హిందాల్కో, టాటా స్టీల్​ మాత్రం 5 శాతానికిపైగా పెరిగాయి. ఎస్​బీఐ లైఫ్​, హెచ్​డీఎఫ్​సీ లైఫ్​ 4 శాతం చొప్పున లాభపడ్డాయి.

మారుతీ సుజుకీ, ఏషియన్​ పెయింట్స్​, డాక్టర్​ రెడ్డీస్​ ల్యాబ్స్​, ఐసీఐసీఐ బ్యాంక్​, హెచ్​డీఎఫ్​సీ బ్యాంక్​ డీలాపడ్డాయి.

సెన్సెక్స్​ 30 ప్యాక్​లో ఐదు షేర్లు మినహా అన్నీ నష్టాల్లోనే ఉండటం గమనార్హం.

11:46 March 02

భారీ పతనం..

రష్యా- ఉక్రెయిన్​ తొలి దఫా చర్చల విఫలంతో.. స్టాక్​ మార్కెట్లు కుదేలవుతున్నాయి. సెన్సెక్స్​ 900 పాయింట్లకుపైగా పడిపోయింది. ప్రస్తుతం 940 పాయింట్ల నష్టంతో.. 55 వేల 306 వద్ద ఉంది.

నిఫ్టీ 220 పాయింట్లకుపైగా కోల్పోయి.. 16 వేల 560 వద్ద కొనసాగుతోంది.

ఆర్థిక షేర్లు, ఆటో రంగం షేర్లు ప్రతికూలంగా ట్రేడవుతున్నాయి. లోహ రంగం షేర్లు మాత్రం రాణిస్తున్నాయి.

10:15 March 02

మరింత కిందకు..

అమ్మకాల ఒత్తిడితో దేశీయ స్టాక్​ మార్కెట్లు మరింత నష్టాల్లోకి జారుకున్నాయి. సెన్సెక్స్​ 800 పాయింట్లు కోల్పోయి.. 55 వేల 460 వద్ద కొనసాగుతోంది.

170 పాయింట్లకుపైగా పడిపోయిన నిఫ్టీ.. 16 వేల 600 ఎగువన ట్రేడవుతోంది.

09:04 March 02

Stock market: ఆర్థిక షేర్లు డీలా.. సెన్సెక్స్​ 500 డౌన్​

Stock market: దేశీయ స్టాక్​ మార్కెట్​ సూచీలు భారీ నష్టాల్లో ప్రారంభమయ్యాయి. రష్యా- ఉక్రెయిన్​ యుద్ధ ప్రభావంతో మార్కెట్లకు వరుస నష్టాలు తప్పట్లేవు. అంతర్జాతీయంగా అమ్మకాల ఒత్తిడితో మార్కెట్లు తీవ్ర ఒడుదొడుకులకు లోనవుతున్నాయి. బొంబాయి స్టాక్​ ఎక్స్చేంజి సూచీ సెన్సెక్స్​ ఆరంభంలోనే 600 పాయింట్లకుపైగా నష్టపోయింది. ప్రస్తుతం 55 వేల 630 వద్ద కొనసాగుతోంది.

జాతీయ స్టాక్​ ఎక్స్చేంజి సూచీ నిఫ్టీ 150 పాయింట్లు పడిపోయి.. 16 వేల 640 వద్ద ట్రేడవుతోంది. ఆర్థిక, ఆటో రంగం షేర్లు పడిపోయాయి. లోహ రంగం మాత్రం పుంజుకుంది.

లాభనష్టాల్లో..

కోల్​ ఇండియా, ఓఎన్​జీసీ, హిందాల్కో, టాటా స్టీల్​, జేఎస్​డబ్ల్యూ స్టీల్​ రాణిస్తున్నాయి.

బజాజ్​ ఆటో, ఐసీఐసీఐ బ్యాంక్​, మారుతీ సుజుకీ, హీరో మోటోకార్ప్​, హెచ్​డీఎఫ్​సీ డీలాపడ్డాయి.

ఇవీ చూడండి:ఆ జాబితాలో హైదరాబాద్​కు పట్టం.. ముంబయి తర్వాత మనదే!