మార్కెట్లపై బేర్​ పంజా.. 56వేల దిగువకు సెన్సెక్స్​

15:51 December 20

మార్కెట్లపై బేర్​ పంజా- 1190 మైనస్​

ఒమిక్రాన్​ భయాలు, అంతర్జాతీయ మార్కెట్ల నుంచి ప్రతికూల పవనాలు, ద్రవ్యోల్బణ భయాలతో దేశీయ స్టాక్​ మార్కెట్లు సోమవారం భారీ నష్టాల్లో ముగిశాయి. సెన్సెక్స్​ 1190 పాయింట్లు కోల్పోయింది. నిఫ్టీ 371 పాయింట్లు దిగజారింది.

విదేశీ సంస్థాగత మదుపరులు సొమ్మును తరలించటమూ మార్కెట్లను దెబ్బతీసింది. దాదాపు అన్ని రంగాల షేర్లలో వెల్లువెత్తిన అమ్మకాలు మార్కెట్లను కుదిపేసింది. 1000 పాయింట్లకుపైగా ట్రేడింగ్​ను మొదలు పెట్టిన సెన్సెక్స్​ అంతకంతకూ దిగజారి.. ఒకానొక దశలో బీఎస్​ఈ సెన్సెక్స్​ 1,849 పాయింట్లు(3.24 శాతం) నష్టపోయి.. 55,162కు పడిపోయింది. ఆ తర్వాత క్రమంగా పుంజుకుని.. 1189 పాయింట్ల నష్టంతో.. 55,822 వద్ద స్థిరపడింది.

జాతీయ స్టాక్​ ఎక్సేంజీ సూచీ నిఫ్టీ.. 371 పాయింట్ల నష్టంతో.. 16,614 వద్ద ముగిసింది. ఒకానొక దశలో.. 566 పాయింట్లు(3.3 శాతం) మేర నష్టపోయి 16,418కు పడిపోయింది. ఆ తర్వాత కొనుగోళ్ల మద్దతు లభించటం వల్ల.. 16,614 వద్దకు చేరుకుని స్థిరపడింది.

లాభనష్టాల్లోనివి...

సిప్లా, హెచ్​యూఎల్​, డాక్టర్​ రెడ్డీస్​ ల్యాబ్స్​ లాభాలతో ముగిశాయి. బీపీసీఎల్​, టాటాస్టీల్​, టాటా మోటార్స్​, ఇండస్​ ఇండ్​ బ్యాంక్​, ఎస్​బీఐలు 4 శాతానికిపైగా నష్టాలను మూటగట్టుకున్నాయి.

12:36 December 20

స్టాక్​ మార్కెట్లు అంతకంతకు కుంగిపోతున్నాయి. బీఎస్​ఈ-సెన్సెక్స్​ 1600 పాయింట్లకుపైగా కుప్పకూలి.. 55,384 వద్ద కొనసాగుతోంది. నిఫ్టీ 510 పాయింట్లు పతనమై.. 16,474 వద్ద కదలాడుతోంది.

అంతర్జాతీయ మార్కెట్ల ప్రతికూల సంకేతాలతో పాటు, ఒమిక్రాన్‌ కేసుల పెరుగుదల, ద్రవ్యోల్బణ భయాలు సూచీలపై పెను ప్రభావాన్ని చూపిస్తున్నాయి. దాదాపు అన్ని రంగాల షేర్లలో వెల్లువెత్తిన అమ్మకాలు మార్కెట్లను కుదిపేస్తున్నాయి.

11:55 December 20

దేశీయ మార్కెట్లపై బేర్‌ పట్టు బిగించింది. ఐరోపా సమాఖ్య దేశాల్లో ఒమిక్రాన్‌ భయాలు.. ప్రభుత్వ నిర్ణయాలు సూచీలను కుదిపేశాయి. ఫలితంగా సూచీలు నేల చూపులు చూస్తున్నాయి. దీంతో ఆరంభంలో కేవలం 15 నిమిషాల వ్యవధిలోనే రూ.5.2లక్షల కోట్ల మేరకు పెట్టుబడిదారుల సంపద ఆవిరైపోయింది.

బీఎస్​ఈ-సెన్సెక్స్ 1,400 పాయింట్లకుపైగా కుప్పకూలింది. ప్రస్తుతం 55,610 వద్ద కదలాడుతోంది. ​మరో సూచీ ఎన్​ఎస్​ఈ- నిఫ్టీ 430 పాయింట్ల కోల్పోయి.. 16,554 వద్ద కొనసాగుతున్నాయి.

అన్ని రంగాల షేర్లు అమ్మకాల ఒత్తిడిని ఎదుర్కొంటున్నాయి.

10:15 December 20

దేశీయ స్టాక్​ మార్కెట్​ సూచీలు భారీ నష్టాల్లో కొనసాగుతున్నాయి. బీఎస్​ఈ సెన్సెక్స్​ 1,300 పాయింట్లకుపైగా కోల్పోయి.. 55,672 వద్ద ట్రేడవుతోంది. జాతీయ స్టాక్​ ఎక్చేంజీ- నిఫ్టీ 574 పాయింట్లు 16,410 వద్ద కొనసాగుతోంది.

అన్ని రంగాల షేర్లు నష్టాల్లోనే కదలాడుతున్నాయి. బ్యాంకింగ్​, రియాల్టీ, ఆటో, పవర్​, ఆయిల్​ అండ్​ గ్యాస్​, లోహ రంగాలు దాదాపు 2 నుంచి 3 శాతం పతనమయ్యాయి. బీఎస్​ఈ మిడ్​క్యాప్, స్మాల్​క్యాప్​ సూచీలు సైతం డీలా పడ్డాయి.

కారణాలు..

• ప్రపంచవ్యాప్తంగా ఒమిక్రాన్​ కేసులు భారీ స్థాయిలో పెరుగుతున్నాయి. వీటిపై ఆందోళనకర వార్తలు బయటకొస్తున్నాయి. భవిష్యత్తుపై అనిశ్చితి నెలకొంది. దీంతో శుక్రవారం అమెరికా మార్కెట్లు భారీ నష్టాల్లో ట్రేడింగ్‌ను ముగించాయి. ప్రస్తుతం షాంఘై, హాంగ్​కాంగ్​, టోక్యో మార్కెట్లు భారీ నష్టాల్లో ట్రేడ్​ అవుతున్నాయి. ఫలితంగా దేశీయ సూచీలు కూడా అమ్మకాల ఒత్తిడిని ఎదుర్కొంటున్నాయి.
• దేశీయ మార్కెట్లలో.. గత కొంతకాలంగా విదేశీ మదుపర్లు అమ్మకాలవైపే మొగ్గుచూపుతున్నారు.
• కేంద్ర ఆర్థిక శాఖ వరి, గోధుమ, శనగలు, ఆవాలు, సోయాబీన్స్‌, ముడి పామాయిల్‌, పెసర్ల కమోడిటీ ట్రేడింగ్‌ను ఏడాది పాటు నిలిపివేయాలని సెబీని కోరినట్లు వార్తలు వస్తున్నాయి. ఈ ప్రభావం మార్కెట్లపై ప్రతికూలంగా పడింది.

08:58 December 20

స్టాక్ ​మార్కెట్​ లైవ్​ అప్​డేట్స్​

స్టాక్​ మార్కెట్లు సోమవారం సెషన్​ భారీ నష్టాలతో ప్రారంభించాయి. ఒమిక్రాన్ భయాలు, అంతర్జాతీయంగా ప్రతికూల సంకేతాల నేపథ్యంలో సూచీలు కుప్పకూలాయి.

బీఎస్​ఈ-సెన్సెక్స్​ 1000 పాయింట్లు పతనమై.. 55,975 వద్ద కొనసాగుతోంది. మరో సూచీ నిప్టీ 291 పాయింట్ల నష్టంతో.. 16,693 కదలాడుతోంది.