stock market crash today: ఒమిక్రాన్ భయాలతో పాటు అంతర్జాతీయ ప్రతికూలతల కారణంగా దేశీయ సూచీలు సోమవారం భారీ నష్టాల్లో చవిచూస్తున్నాయి. బీఎస్ఈ సెన్సెక్స్ 1061 పాయింట్ల నష్టంతో 55,951 వద్ద కొనసాగుతోంది. ఎన్ఎస్ఈ నిఫ్టీ 313 పాయింట్ల నష్టంతో 16,672 వద్ద ట్రేడ్ అవుతోంది.
56,517 వద్ద ప్రారంభమైన బీఎస్ఈ సెన్సెక్స్.. 56,538కు చేరి ఆ వెంటనే మరింత నష్టాల్లోకి జారుకుంది. నిఫ్టీ 50.. 16,824 పాయింట్ల వద్ద ప్రారంభమై.. నష్టాల్లో ట్రేడ్ అవుతోంది.
కారణాలు..
- ప్రపంచవ్యాప్తంగా ఒమిక్రాన్ కేసులు భారీ స్థాయిలో పెరుగుతున్నాయి. వీటిపై ఆందోళనకర వార్తలు బయటకొస్తున్నాయి. భవిష్యత్తుపై అనిశ్చితి నెలకొంది. దీంతో శుక్రవారం అమెరికా మార్కెట్లు భారీ నష్టాల్లో ట్రేడింగ్‌ను ముగించాయి. ప్రస్తుతం షాంఘై, హాంగ్కాంగ్, టోక్యో మార్కెట్లు భారీ నష్టాల్లో ట్రేడ్ అవుతున్నాయి. ఫలితంగా దేశీయ సూచీలు కూడా అమ్మకాల ఒత్తిడిని ఎదుర్కొంటున్నాయి.
- దేశీయ మార్కెట్లలో.. గత కొంతకాలంగా విదేశీ మదుపర్లు అమ్మకాలవైపే మొగ్గుచూపుతున్నారు.
- కేంద్ర ఆర్థిక శాఖ వరి, గోధుమ, శనగలు, ఆవాలు, సోయాబీన్స్‌, ముడి పామాయిల్‌, పెసర్ల కమోడిటీ ట్రేడింగ్‌ను ఏడాది పాటు నిలిపివేయాలని సెబీని కోరినట్లు వార్తలు వస్తున్నాయి. ఈ ప్రభావం మార్కెట్లపై ప్రతికూలంగా పడింది.
15 నినిషాల్లో రూ. 5.19లక్షల కోట్లు...
ఉదయం 9.30 గంటల ప్రాంతంలో సెన్సెక్స్ 1000 పాయింట్లకు పైగా నష్టపోయింది. దీంతో బీఎసీఈలోని లిస్టెడ్‌ కంపెనీల మొత్తం మార్కెట్‌ విలువ రూ.5.19లక్షల కోట్లు తగ్గి రూ.254.08లక్షల కోట్లకు పడిపోయింది.