Stock Market Close: రష్యా-ఉక్రెయిన్ వివాదంపై అనిశ్చితి నెలకొన్న వేళ దేశీయ స్టాక్ మార్కెట్ సూచీలు గురువారం కూడా తీవ్ర ఒడుదొడుకులకు లోనయ్యాయి. బొంబాయి స్టాక్ ఎక్స్చేంజి సూచీ సెన్సెక్స్ 105 పాయింట్లు కోల్పోయి.. 57 వేల 892 వద్ద స్థిరపడింది.
జాతీయ స్టాక్ ఎక్స్చేంజి సూచీ నిఫ్టీ 18 పాయింట్ల నష్టంతో.. 17 వేల 305 వద్ద సెషన్ను ముగించింది.
మార్కెట్లు ఇవాళ్టి సెషన్లో తీవ్ర ఒత్తిడిని ఎదుర్కొన్నాయి. పలుమార్లు లాభనష్టాల మధ్య ఊగిసలాడాయి.
దాదాపు 200 పాయింట్లకుపైగా లాభంతో ప్రారంభమైన సెన్సెక్స్.. కాసేపటికే నష్టాల్లోకి వెళ్లింది. ఓ దశలో 350 పాయింట్లకుపైగా కోల్పోయి 57 వేల 635 వద్ద సెషన్ కనిష్ఠాన్ని తాకింది. మళ్లీ పుంజుకొని 350 పాయింట్ల లాభంతో.. 58 వేల 346 పాయింట్ల వద్ద గరిష్ఠాన్ని చేరింది. గత సెషన్ మాదిరిగానే ఆఖరి గంటలో అమ్మకాల ఒత్తిడితో సూచీలు మళ్లీ నష్టాల బాట పట్టాయి. భారీ కుదుపునకు లోనయ్యాయి.
బ్యాంకింగ్ షేర్లు దారుణంగా నిరాశపర్చాయి. ఒక శాతం మేర పడిపోయాయి. విద్యుత్తు రంగం షేర్లు రాణించాయి. బీఎస్ఈ మిడ్, స్మాల్ క్యాప్ సూచీలు ప్రతికూలంగా ట్రేడయ్యాయి.