మార్కెట్ల కొత్త రికార్డు- 45 వేలపైకి సెన్సెక్స్

వారాంతపు సెషన్​లో స్టాక్ మార్కెట్లలో బుల్​ దూకుడు కొనసాగింది. సెన్సెక్స్ 447 పాయింట్లు పెరిగి.. చరిత్రలో తొలిసారి 45,050 మార్క్​పైన స్థిరపడింది. నిఫ్టీ 125 పాయింట్ల లాభంతో జీవనకాల గరిష్ఠం వద్దకు చేరింది. మార్కెట్లు లాభాలతో ముగియడం ఇది వరుసగా ఐదో వారం కావడం విశేషం.

స్టాక్ మార్కెట్లు వారాంతాన్ని సరికొత్త రికార్డు స్థాయి వద్ద ముగించాయి. బీఎస్​ఈ-సెన్సెక్స్ 447 పాయింట్లు బలపడి జీవనకాల గరిష్ఠమైన 45,079 వద్ద స్థిరపడింది. ఎన్​ఎస్​ఈ-నిఫ్టీ 125 పాయింట్లు పెరిగి సరికొత్త జీవనకాల రికార్డు స్థాయి అయిన 13,258 వద్దకు చేరింది.

ఆర్​బీఐ జోష్​..

ఆర్​బీఐ వడ్డీ రేట్లను యథాతథంగా ఉంచడం, దేశ ఆర్థిక వ్యవస్థ రికవరీపై అంచనాలు సానుకూలంగా ఉన్నట్లు ప్రకటించడం లాభాలకు కలిసొచ్చినట్లు విశ్లేషకులు చెబుతున్నారు. అంతర్జాతీయంగా ఇతర సానుకూలతలు మార్కెట్లను లాభాల బాట పట్టించినట్లు చెబుతున్నారు. బ్యాంకింగ్​ షేర్లు లాభాలకు ప్రధానంగా ఊతమందించాయి.

ఇంట్రాడే సాగిందిలా..

సెన్సెక్స్ 45,148 పాయింట్ల అత్యధిక స్థాయి (జీవనకాల గరిష్ఠం), 44,665 పాయింట్ల అత్యల్ప స్థాయిలను నమోదు చేసింది.

నిఫ్టీ 13,280 పాయింట్ల గరిష్ఠ స్థాయి(సరికొత్త రికార్డు స్థాయి), 13,152 పాయింట్ల కనిష్ఠ స్థాయిల మధ్య కదలాడింది.

లాభనష్టాల్లోనివి ఇవే..

ఐసీఐసీఐ బ్యాంక్, అల్ట్రాటెక్ సిమెంట్, సన్​ఫార్మా, భారతీ ఎయిర్​టెల్, హెచ్​యూఎల్, ఎస్​బీఐ షేర్లు భారీగా లాభాలను నమోదు చేశాయి.

రిలయన్స్ ఇండస్ట్రీస్, బజాజ్ ఫిన్​సర్వ్, హెచ్​సీఎల్​టెక్, హెచ్​డీఎఫ్​సీ, ఎన్​టీపీసీ షేర్లు నష్టపోయాయి.

ఇతర మార్కెట్లు

ఆసియాలో ఇతర ప్రధాన మార్కెట్లలో టోక్యో సూచీ మినహా.. షాంఘై, సియోల్, హాంకాంగ్ సూచీలు లాభాలను గడించాయి.

రూపాయి, ముడిచమురు..

కరెన్సీ మార్కెట్​లో రూపాయి 13 పైసలు బలపడింది. డాలర్​తో పోలిస్తే మారకం విలువ 73.80 వద్దకు చేరింది.

ముడిచమురు ధరల సూచీ-బ్రెంట్ 1.81 శాతం పెరిగింది. అంతర్జాతీయ మార్కెట్​లో బ్యారెల్ ముడి చమురు ధర 49.59 డాలర్ల వద్దకు చేరింది.

ఇదీ చూడండి:దిగొచ్చిన బంగారం, వెండి ధరలు