'రిలయన్స్, ఫ్యూచర్​ మధ్య నారదుడిలా బెజోస్!'

రిలయన్స్, ఫ్యూచర్ రిటైల్​ మధ్య ఒప్పందానికి అనవసరంగా అడ్డుతగులుతున్నారంటూ ఎఫ్​ఎంసీజీ పంపిణీదారుల సంఘం అమెజాన్​ అధినేత జెఫ్​ బెజోస్​కు లేఖ రాసింది. దీని వల్ల చాలా మంది ఆర్థికంగా ఇబ్బందులు పడుతున్నారని లేఖలో తెలిపింది. ఇరు సంస్థల ఒప్పందంపై అనవసర రాద్దాంతం అపాలని.. కావాలంటే కిశోర్​ బియానీపై కేసు వేసుకోమని సూచించింది.

రిలయన్స్ రిటైల్​, ఫ్యూచర్​ రిటైల్​ లిమిటెడ్​ మధ్య ఒప్పందం విషయంలో 'నారదుడి'లా వ్యవహరిస్తున్నారంటూ.. అమెజాన్ అధినేత జెఫ్​ బెజోస్​కు అఖిల భారత ఎఫ్​ఎంసీజీ పంపిణీదారుల సంఘం లేఖ రాసింది. అమెజాన్​ సృష్టిస్తున్న అడ్డంకుల వల్ల సంఘంలోని​ సభ్యులు, వారి కుటుంబాలు ఇబ్బందులు ఎదుర్కొంటున్నట్లు అందులో పేర్కొంది.

ఈ ఒప్పందం పూర్తవ్వని కారణంగా దాదాపు 6,000 మంది సభ్యులకు ఫ్యూచర్ గ్రూప్​ అధిపతి కిశోర్​ బియానీ నుంచి రావాల్సిన రూ.6,000 కోట్ల చెల్లింపులు ఆగిపోయాయని వివరించింది సంఘం​. 2020 మార్చి నుంచి ఈ మొత్తం బకాయి ఉన్నట్లు తెలిపింది. ఆగస్టులో రిలయన్స్​తో కుదిరిన ఒప్పందంతో తమ ఆశలు చిగురించాయని, అయితే వాటికి అమెజాన్​ అడ్డంకులు సృష్టిస్తున్నట్లు పేర్కొంది.

'అమెజాన్​ ప్రపంచవ్యాప్తంగా ఆధిపత్యం కోసం ప్రయత్నిస్తుండం వల్ల పంపిణీదారులకు చెల్లింపుల విషయంలో జాప్యం జరుగుతోంది. ఫలితంగా వారి కుటుంబాలు ఆర్థికంగా ఇబ్బందులు ఎదుర్కోవాల్సి వస్తోంది' అని వివరించింది అఖిల భారత ఎఫ్​ఎంసీజీ పంపిణీదారుల సంఘం. ఈ విషయం దృష్టిలో ఉంచుకుని అనవసర రాద్దాంతం అపాలని అమెజాన్​ను కోరింది. అంతగా కావాలంటే కిశోర్​ బియానీపై దిల్లీ, సింగపూర్​, సియాటెల్.. ఇలా​ ఎక్కడ కావాలంటే అక్కడ కేసు వేసుకోమని బెజోస్​కు సూచించింది.

ఈ కేసులో అమెజాన్ తీరుకు వ్యతిరేకంగా బెంగళూరులోని ఇండియా పోస్ట్​ నుంచి 'గెట్​ వెల్ సూన్​' గ్రీటింగ్ కార్డ్​లను పంపించాలని కూడా సంఘంలోని సభ్యులు నిర్ణయించారు.

ఇదీ చదవండి:'ఉద్యోగుల టీకా ఖర్చులు మేమే భరిస్తాం'