వరుసగా రెండో నెలలో పెరిగిన ద్రవ్యోల్బణం

ఆహార పదార్థాలు, ఇంధన ధరలు పెరుగుదలతో మార్చిలో టోకు ద్రవ్యోల్బణం  క్రితం నెలకంటే ఎక్కువగా నమోదైంది. ఫిబ్రవరిలో 2.93 శాతంగా ఉన్న ద్రవ్యోల్బణం మార్చిలో 3.18 శాతానికి చేరింది.

టోకు ధరల ఆధారిత ద్రవ్యోల్బణం వరుసగా 2వ నెలలోనూ పెరిగింది. ఆహారపదార్థాలు, ఇంధన ధరలు పెరగటం వల్ల మార్చిలో డబ్ల్యూపీఐ 3.18 శాతానికి చేరింది. ఇది ఫిబ్రవరిలో 2.93 శాతంగా ఉండగా... గత సంవత్సరం మార్చిలో 2.74 శాతంగా ఉంది.

కూరగాయలు, ఇంధనం ఇలా...

కూరగాయల ధరల పెరుగుదలతో ఆహార పదార్థాల ద్రవ్యోల్బణం క్రితం నెల కంటే ఎక్కువైంది. మార్చిలో కూరగాయల ధర 28.13 శాతం పెరిగింది. ఫిబ్రవరి కంటే ఇది 6.82 శాతం ఎక్కువ. బంగాళదుంప ధరల్లో పెరుగుదల మాత్రం 23.40 శాతం నుంచి 1.30 శాతానికి తగ్గింది.

మొత్తం ఆహారపదార్థాల ద్రవ్యోల్బణం 5.68 శాతంగా ఉంది. ఇంధనం, విద్యుచ్ఛక్తి విభాగంలో ధరల పెరుగుదల 5.41 శాతానికి ఎగబాకింది. ఇది గత నెలలో 2.23 శాతంగా ఉంది.

ఆర్బీఐకి 'చిల్లరే' కీలకం...

చిల్లర ధరల ఆధారిత​ ద్రవ్యోల్బణాన్ని ఆధారంగా తీసుకునే రిజర్వుబ్యాంకు ఈ నెల మొదట్లో వడ్డీ రేట్లను 0.25 శాతం తగ్గించింది.

ఫిబ్రవరిలో 2.57 శాతంగా ఉన్న రిటైల్​ ద్రవ్యోల్బణం మార్చిలో 2.86 శాతానికి పెరిగినట్లు గత వారం విడుదలైన గణాంకాలు వెల్లడించాయి.

ఏప్రిల్​-సెప్టెంబర్​ కాలానికి రిటైల్​ ద్రవ్యోల్బణం 2.9 నుంచి 3 శాతం ఉంటుందని లెక్కగట్టింది ఆర్బీఐ. రుతుపవనాల సమయంలో ఆహార, ఇంధన ధరలు తక్కువగా ఉంటాయని అంచనా వేసింది.