V-ఆకారపు రికవరీతో జీ-20 దేశాల్లో భారత్ భేష్​!

భారత ఆర్థిక వ్యవస్థను కరోనా మహమ్మారి గత ఆర్థిక సంవత్సరం అతలాకుతలం చేసినా.. ఆ తర్వాత వేగంగా పుంజుకున్న దేశంగా నిలిచినట్లు ఆర్థిక శాఖ పేర్కొంది. గత ఆర్థిక సంవత్సరం మొత్తం మీద చివరి త్రైమాసికంలో 1 శాతం కన్నా ఎక్కువగా వృద్ధి రేటును సాధించిన ఆరు ప్రధాన దేశాల్లో భారత్​ కూడా ఒకటని వెల్లడించింది. వృద్ధి రేటు V ఆకారంలో రికవరీ అయినట్లు ఈ గణాంకాలు స్పష్టం చేస్తున్నట్లు వివరించింది.

కరోనా వల్ల దేశ ఆర్థిక వ్యవస్థ గత ఆర్థిక సంవత్సరం ప్రారంభంలో రికార్డు స్థాయిలో క్షీణించినప్పటికీ.. రెండో అర్ధ భాగంలో మాత్రం బలంగా కోలుకుందని ఆర్థిక శాఖ పేర్కొంది. దీనితో కరోనా నుంచి వేగంగా కోలుకుంటున్న జీ-20 కూటమిలోని అతి కొద్ది దేశాల జాబితాలో భారత్​ కూడా ఉన్నట్లు వెల్లడించింది.

తాజాగా విడుదల చేసిన నెలవారీ(మే నెలకు సంబంధించిన) నివేదికలో ఆర్థిక వ్యవస్థ 2020-21లో స్పష్టంగా V ఆకారపు రికవరీని నమోదు చేసినట్లు పేర్కొంది.

'గత ఆర్థిక సంవత్సరం దేశ ఆర్థిక వ్యవస్థ 7.3 శాతం క్షీణించింది. అంతకు ముందు జీడీపీ 8 శాతం క్షీణించొచ్చని అంచనాలు వచ్చినప్పటికీ.. V ఆకారపు రికవరీ వల్ల క్షీణత కాస్త తగ్గింది' అని ఆర్థిక శాఖ వివరించింది.

నిజానికి వృద్ధి రేటులో V ఆకారపు రికవరీ ప్రారంభమైనట్లు గత ఏడాది నవంబర్​లోనే ప్రకటించింది ఆర్థిక శాఖ. పండుగ సీజన్​తో పెరిగిన డిమాండ్ ఇందుకు కారణమని తెలిపింది.

అన్​లాక్​తో వేగంగా రికవరీ..

కరోనా సంక్షోభం వల్ల 2020-21 తొలి త్రైమాసికంలో వృద్ధి రేటు రికార్డు స్థాయిలో 24.4 శాతం క్షీణించింది. జీ 20 కూటమిలో అత్యధికంగా క్షీణతను నమోదు చేసిన దేశాల జాబితాలో అగ్రస్థానంలో నిలిచింది. క్రమంగా అన్​లాక్ ప్రక్రియ ప్రారంభమైన నేపథ్యంలో రెండో త్రైమాసికంలో క్షీణత 7.3 శాతానికి తగ్గింది.

మొత్తం మీద 2020-21 తొలి అర్ధభాగంలో వృద్ధి రేటు 15.9 శాతంగా నమోదైంది. పండుగ సీజన్​లో డిమాండ్ పెరిగిన కారణంగా.. మూడో త్రైమాసికంలో అర శాతం సానుకూల వృద్ధి నమోదైంది. చివరి త్రైమాసికంలో వృద్ధి రేటు 1.6 శాతంగా నమోదైంది. మొత్తం మీద రెండో అర్ధ భాగంలో వృద్ధి రేటు 1.1 శాతంగా నమోదైనట్లు గణంకాలు స్పష్టం చేస్తున్నాయని ఆర్థిక శాఖ వివరించింది.

జీ 20 దేశాల్లో భారత్​ భేష్..

జీ 20 కూటమిలో 16 ప్రధాన దేశాలు ఉండగా అందులో ఆరు దేశాలు మాత్రమే గత ఏడాది చివరి త్రైమాసికంలో సానుకూల వృద్ధిని నమోదు చేసినట్లు ఆర్థిక శాఖ విశ్లేషించింది. అందులో కెనడా, ఫ్రాన్స్, అమెరికా, చైనా, భారత్​, టర్కీ ఉన్నట్లు వివరించింది.

అందులోనూ చైనా, భారత్​, ఫ్రాన్స్, టర్కీ మాత్రమే 2020-21 చివరి త్రైమాసికంలో 1 శాతం కన్నా అధిక వృద్ధి రేటును నమోదు చేసినట్లు పేర్కొంది. చివరి రెండు త్రైమాసికాల్లోనూ సానుకూల వృద్ధిని నమోదు చేసిన దేశాల జాబితాలో చైనా, భారత్​, టర్కీ మాత్రమే చోటు దక్కించుకున్నట్లు వెల్లడించింది.

ప్రపంచవ్యాప్తంగా జీడీపీలో 80 శాతం వాటా, వాణిజ్యంలో 60 శాతం వాటా, జనాభాలో 60 శాతం వాటా జీ 20 దేశాలదే కావడం గమనార్హం.

ఇవీ చదవండి: