కరోనా మహమ్మరి వల్ల దేశ ఆర్థిక వ్యవస్థ తీవ్రంగా ప్రభావితమైందని కేంద్ర ఆర్థిక మంత్రి నిర్మలా సీతారామన్ అన్నారు. ఈ నేపథ్యంలో వృద్ధి ఊతమందించేందుకు పలు ఉద్దీపనలు ప్రకటించారు. కేంద్ర ప్రభుత్వ ఉద్యోగులకు సెలవు ప్రయాణ రాయితీ (ఎల్టీసీ) ఛార్జీలకు బదులుగా.. అంతే మొత్తంలో నగదు ఓచర్లు ఇవ్వనున్నట్లు తెలిపారు. ఈ ఓచర్లను జీఎస్టీ వర్తించే.. ఆహారేతర వస్తువులను కొనేందుకు మాత్రమే వినియోగించాలని స్పష్టం చేశారు.
ఉద్యోగులు 12 శాతం, అంతకన్నా ఎక్కువ జీఎస్టీ ఉన్న వస్తువులను కొనుగోలు చేయొచ్చని కేంద్రం వెల్లడించింది. జీఎస్టీ నమోదిత ఔట్లెట్లలో.. డిజిటల్ మోడ్ ద్వారానే ఈ కొనుగోళ్లు జరపాలని కేంద్రం స్పష్టం చేసింది.
ఏమిటీ ఎల్టీసీ?
ప్రతి నాలుగు సంవత్సరాలకు ఓ సారి కేంద్ర ప్రభుత్వ ఉద్యోగులకు తమకు నచ్చిన ప్రాంతాలకు విహార యాత్రకు వెళ్లేందుకు, తమ సొంత ఊరికి వెళ్లేందుకు ప్రయాణ రాయితీలను ప్రకటిస్తుంటుంది. దీనినే ఎల్టీసీ అంటారు. అయితే ప్రస్తుతం కరోనా వల్ల నెలకొన్న పరిస్థితుల్లో ప్రయాణాలు చేయడం క్లిష్టంగా మారింది. ఈ నేపథ్యంలో ఆ మొత్తాన్ని ఓచర్ల రూపంలో ఇచ్చేందుకు సిద్ధమైంది కేంద్రం. ఈ మొత్తాన్ని 2021 మార్చి 31 లోపు వినియోగించుకోవాల్సి ఉంటుంది.
ఎల్టీసీకి బదులు కేంద్రం రూ.5,675 కోట్లు, ప్రభుత్వ రంగ సంస్థలు, బ్యాంకులు రూ.1,900 కోట్లు చెల్లించనున్నాయని ఆర్థిక మంత్రి నిర్మలా సీతారామన్ వివరించారు.
ఈ విధానంతో డిమాండ్ రూ.19,000 కోట్లు, సగం రాష్ట్రాలు ఇదే మార్గదర్శకాలను అనుసరిస్తే మరో రూ.9,000 కోట్ల డిమాండ్ పెరుగుతుందని నిర్మలా సీతారామన్ తెలిపారు.