ఉద్యోగుల భవిష్యనిధి సంస్థ (ఈపీఎఫ్ఓ) చందాదారులకు కీలక విజ్ఞప్తి చేసింది. 2020-21 ఆర్థిక సంవత్సరానికి సంబంధించి.. 6 కోట్ల లబ్దిదారులకు వడ్డీని త్వరలోనే జమ చేయనున్నట్లు ప్రకటించింది. వడ్డీ రేట్ల జమ గురించిన ప్రక్రియ కొనసాగుతోందని.. అప్పటి వరకు చందాదారులు సహనం పాటించాలని ట్విట్టర్ ద్వారా కోరింది. వడ్డీ జమ ఆలస్యంపై పలువురు ఈపీఎఫ్ఓను ప్రశ్నించగా.. ఈ వివరణ ఇచ్చింది.
వడ్డీ రేట్లు ఇలా..
2020-21 ఆర్థిక సంవత్సరానికి చందాదారులకు 8.5 శాతం వడ్డీ రేటును చెల్లించాలని నిర్ణయించింది ఈపీఎఫ్ఓ.
2018-19 ఆర్థిక సంవత్సరంలో పీఎఫ్పై వడ్డీ రేటు 8.65 శాతం ఉండగా, 2019-20 ఆర్థిక సంవత్సరంలో ధర్మకర్తల బోర్డు దాన్ని 8.5 శాతానికి తగ్గించింది. అంతకు ముందు ఏడేళ్లతో పోలిస్తే ఇదే అత్యల్ప వడ్డీ రేటు. కరోనా కారణంగానే.. 2020-21 వడ్డీ రేట్లలో ఎలాంటి మార్పులు చేయలేదని ఈపీఎఫ్ఓ వివరించింది.
వడ్డీ జమ అయిన వెంటనే..చందాదారులంతా.. నాలుగు మార్గాల ద్వారా ఆ వివరాలను తెలుసుకునే వీలుంది. అయితే ఇందుకు వారి యూఏఎన్ యాక్టివేట్ అయ్యుండాలి అనే విషయం గుర్తుంచుకోవాలి.
వడ్డీ జమ, ప్రస్తుత బ్యాలెన్స్ తెలుసుకునే మార్గాలు..
మిస్డ్ కాల్ సర్వీస్..
ఈపీఎఫ్ఓ వద్ద రిజిస్టర్ అయిన మొబైల్ నంబర్ నుంచి '011-22901406' నంబర్కు మిస్డ్ కాల్ ఇవ్వాలి. దీని ద్వారా ఈపీఎఫ్ఓ నుంచి ఎస్ఎంఎస్ రూపంలో బ్యాలెన్స్ వివరాలు అందుతాయి. ఇది ఉచిత సర్వీస్. దీనిని వినియోగించుకోవాలంటే.. చందాదారుడు కేవైసీ పూర్తి చేసి ఉండాలి.
ఎస్ఎంఎస్ సర్వీస్..
ఈపీఎఎఫ్ఓ చందాదారులు.. EPFOHO UAN అని టైప్ చేసి 7738299899 నంబర్కు ఎస్ఎంఎస్ పంపడం ద్వారా కూడా.. బ్యాలెన్స్ వివరాలు తెలుసుకోవచ్చు.
ఈపీఎఫ్ఓ పోర్టల్..
ఈపీఎఫ్ఓ మెంబర్ పోర్టల్లో రిజిస్టర్ అయిన చందాదారులు.. యూఏఎన్ నంబర్ పాస్వర్డ్తో లాగిన్ అవడం ద్వారా బ్యాలెన్స్ వివరాలు తెలుసుకోవచ్చు. ఏ నెలలో ఎంత మొత్తం జమ అయ్యిందనే వివరాలు కూడా ఇందులో ఉంటాయి.
ఉమంగ్ యాప్..
ఖాతా బ్యాలెన్స్ సహా.. ఈపీఎఫ్ఓ స్టెట్మెంట్ను ఉమంగ్ మొబైల్ యాప్ ద్వారా తెలుసుకోవచ్చు. ఈ యాప్లో ఎంప్లాయ్ సెంట్రిక్ సర్వీసెస్పై క్లిక్ చేసి.. వ్యూ పాస్ బుక్ ఆప్షన్ను ఎంపిక చేసుకోవాలి. అక్కడ యూఏఎన్ నంబర్ను టైప్ చేసి.. రిజిస్టర్ మొబైల్ నంబర్కు వచ్చిన ఓటీపీని ఎంటర్ చేయడం ద్వారా బ్యాలెన్స్ వివరాలను చూడొచ్చు.
ఇదీ చదవండి:పీఎఫ్ ఖాతాదారులకు ఆగస్టు 31 వరకే ఆఖరి ఛాన్స్
