కరోనా కట్టడికి విధించిన లాక్డౌన్ ప్రభావం రాష్ట్రాల ఆర్థిక వ్యవస్థపై తీవ్రంగా పడనున్నట్లు తెలుస్తోంది. ప్రస్తుత ఆర్థిక సంవత్సరంలో రాష్ట్రాల స్థూల రాష్ట్రీయోత్పత్తి (జీఎస్డీపీ) 1.4 శాతం నుంచి 14.3 శాతం వరకు క్షీణించొచ్చని ఇండియా రేటింగ్స్, రీసెర్చ్ నివేదిక అంచనా వేసింది.
అసోం, గోవా, గుజరాత్, సిక్కిం వంటి రాష్ట్రాలు రెండంకెల వృద్ధి రేటు క్షీణత నమోదు చేయొచ్చని ఆందోళన వ్యక్తం చేసింది నివేదిక.
రాష్ట్రాల వారీగా..
కర్ణాటక, ఝార్ఖండ్, తమిళనాడు, కేరళ, ఒడిశాపై అధికంగా.. మధ్యప్రదేశ్, పంజాబ్, బిహార్, ఆంధ్రప్రదేశ్, ఉత్తర్ప్రదేశ్లపై తక్కువగా లాక్డౌన్ ప్రభావం ఉన్నట్లు నివేదిక పేర్కొంది.
ఏ రంగంపై ఎంత ప్రభావం
వ్యవసాయం, పరిశ్రమలు, సేవా రంగపై లాక్డౌన్ ప్రభావం భిన్నంగా ఉన్నట్లు నివేదిక వెల్లడించింది.
వ్యవసాయ ఆధారిత రాష్ట్రాలు.. వ్యవసాయంపై తక్కువ ఆధారపడే రాష్ట్రాలతో పోలిస్తే.. వ్యవసాయ కార్యకలాకపాల పరంగా తక్కువగా ప్రభావితం అయినట్లు నివేదిక పేర్కొంది.
బ్యాంకింగ్, ఫినాన్సియల్, సేవ, ఐటీ, ఐటీ ఆధారిత రంగాలపై కూడా లాక్డౌన్ ప్రభావం పాక్షికంగానే పడినట్లు నివేదిక అభిప్రాయపడింది. డిజిటల్ సాంకేతికతతో ఈ రంగాల్లో కార్యకలాపాలు సాగించేందుకు ఎక్కువ అవకాశాలు ఉండటమే ఇందుకు కారణంగా పేర్కొంది.
ఆదాయానికి గండి..
లాక్డౌన్ కారణంగా రాష్ట్రాలకు పన్నుల ద్వారా వచ్చే ఆదాయం భారీగా తగ్గినట్లు నివేదిక పేర్కొంది. ఈ ఆర్థిక సంవత్సరంలో ఈ ప్రభావం ఇంకా పెరిగొచ్చని అంచనా వేసింది.
పన్నుల ద్వారా వచ్చే ఆదాయం భారీగా తగ్గే రాష్ట్రాల్లో మహారాష్ట్ర, గుజరాత్, తమిళనాడు, కేరళ, తెలంగాణ, హరియాణా ప్రధానంగా ఉన్నట్లు నివేదిక పేర్కొంది.
ఇదీ చూడండి:టిక్టాక్కు 'స్వదేశీ' సవాల్- దూసుకెళ్తున్న చింగారీ!
