కరోనా వైరస్ ప్రపంచదేశాలను వణికిస్తున్న వేళ ఆ ప్రభావం ఆర్థిక వ్యవస్థపై పడుతోంది. ఈ కారణంగా ప్రపంచమంతా ఆర్థిక మాంద్యానికి చేరువవుతున్నట్లు నిపుణులు ఆందోళన వ్యక్తం చేస్తున్నారు.
కొవిడ్ 19 నేపథ్యంలో భారత వృద్ధి రేటును దిగువకు సవరిస్తూ నివేదిక విడుదల చేసింది ఎస్&పీ గ్లోబల్ రేటింగ్స్. ఈ ఏడాది దేశ ఆర్థిక వృద్ధి రేటు 5.2 శాతానికే పరిమితం కావచ్చని తాజా అంచనాల్లో తెలిపింది.
ఇంతకు ముందు 2020లో భారత్ 5.7 శాతం వృద్ధి రేటును సాధిస్తుందని ఎస్&పీ అంచనా వేయడం గమనార్హం.
మాంద్యం భయాలు పెరుగుతున్నాయ్..
ఇదే సమయంలో ఆసియా-పసిఫిక్ ప్రాంతంలో ఆర్థిక వృద్ధి రేటు 3 శాతానికన్నా తక్కువగా నమోదు కావచ్చని అంచనా వేసింది ఎస్&పీ. కరోనా కారణంగా ఈ ఏడాది తొలి త్రైమాసికంలో చైనాలో నెలకొన్న పరిస్థితులు, అమెరికా, ఐరోపాల్లో మూసివేతలు, వైరస్ వ్యాప్తి వంటి పరిణామాలు ఈ ప్రాంతంలో మాంద్యం భయాలు పెంచుతున్నట్లు పేర్కొంది.
ఆ దేశాలకూ ఆందోళనే..
చైనా, జపాన్ వృద్ధి రేటు అంచనాలను 2020కి గాను 2.9 శాతం, -1.2 శాతానికి తగ్గించింది ఎస్&పీ గ్లోబల్ రేటింగ్స్. ఇంతకు ముందు అ దేశాల వృద్ధి రేటు అంచనాలు 4.9 శాతం, -0.4 శాతంగా ఉండటం గమనార్హం.
ఇదీ చూడండి:కార్యాలయాల స్థలాలకు పెట్టుబడుల వెల్లువ