అంధుల కోసం ఆర్బీఐ 'కరెన్సీ యాప్​'!

అంధులు మరింత సులభంగా నోట్లు గుర్తించేందుకు ఓ మొబైల్ యాప్​ను అందుబాటులోకి తేవాలని ప్రయత్నిస్తోంది ఆర్బీఐ. ఇందుకు మొదటగా బిడ్​లను ఆహ్వానించింది కేంద్ర బ్యాంకు. అయితే ఆ నిర్ణయాన్ని మార్చుకుని ప్రత్యామ్నాయాలపై దృష్టి పెట్టింది ఆర్బీఐ.

కరెన్సీ నోట్లను గుర్తించేందుకు సరికొత్త మొబైల్​ యాప్​ను రూపొందించాలని ప్రతిపాదనలు తీసుకువచ్చింది భారతీయ రిజర్వు బ్యాంకు. అంధులు సులభంగా నోట్లను గుర్తించేందుకు ఈ యాప్​ను తీసుకురానున్నట్లు ఆర్బీఐ పేర్కొంది.

దేశంలో ప్రస్తుతం రూ.10, రూ.20, రూ.50, రూ.100, రూ.200, రూ.500, రూ.2,000 నోట్లు వాడుకలో ఉన్నాయి. వీటితో పాటు రూ.1 నోటునూ భారత ప్రభుత్వం జారీ చేస్తోంది.

ఇంటాగ్లియోతో ముద్రిస్తున్న గుర్తింపు చిహ్నాలతో అంధులు ప్రస్తుతం నోట్లను గుర్తిస్తున్నారు. అయితే ఈ చిహ్నాలు రూ.100కు పైబడిన నోట్లపైనే ఉన్నాయి. అన్ని నోట్లను ఫోన్​​ ద్వారా గుర్తించే ఏర్పాటు చేసే యాప్​ను రూపొందించాలని కేంద్ర బ్యాంకు నూతన ప్రతిపాదనలు చేసింది.

• యాప్​ ద్వారా మహాత్మా గాంధీ కొత్త, పాత శ్రేణి నోట్లను మొబైల్​ కెమెరా ముందు ఉంచి స్కాన్​ చేస్తే వాటి విలువను చెప్పాలి.
• నోట్ల గుర్తింపునకు 2 సెకన్లు లేదా అంతకన్నా తక్కువ సమయం పట్టాలి.
• అన్ని యాప్​ స్టోర్​లలో వాయిస్​ సెర్చ్​కు అనుకూలంగా ఈ యాప్​ ఉండాలి.
• మొదట కనీసం హిందీ, ఇంగ్లీష్​ భాషల్లో నోటిఫికేషన్లకు యాప్​ సపోర్ట్​ చేయాలి. ఆ తర్వాత ఇతర భాషలకు విస్తరించాలి.

ప్రతిపాదిత యాప్​ను రూపొందించేందుకు టెక్​ సంస్థల నుంచి బిడ్​లు ఆహ్వానిస్తున్నట్లు ఆర్బీఐ వెల్లడించింది. ఈ ప్రయత్నాన్ని తాజాగా విరమించుకున్న ఆర్బీఐ.. ప్రత్యమ్నాయ మార్గాలపై దృష్టి పెట్టింది.

80 లక్షల మందికి లాభం

దేశంలో లావాదేవీలకు నగదు వినియోగమే అత్యధికంగా ఉంది. 2018 మార్చి 31 నాటికి.. 102 బిలియన్ల బ్యాంకు నోట్లు మనుగడలో ఉన్నాయి. వీటి విలువ రూ.18 లక్షల కోట్లు. ప్రస్తుతం దేశంలో 80లక్షలకుపైగా అంధులు ఉన్నారు. ఆర్బీఐ ప్రతిపాదించిన యాప్ వాడుకలోకి వస్తే కరెన్సీ నోట్లు గుర్తించడం వీరికి మరింత సులభం కానుంది.

ఇదీ చూడండి: ఒక్కసారిగా దిగొచ్చిన బంగారం ధర