'రెపోరేటు ఆధారంగా గృహ, వాహన వడ్డీ రేట్లు'

అక్టోబరు 1 నుంచి బ్యాంకులు రెపోరేటుకు అనుగుణంగా గృహ, వాహన వడ్డీ రేట్లను లింక్ చేయాలని ఆర్​బీఐ స్పష్టం చేసింది. ఈ మేరకు అధికారిక ప్రకటన విడుదల చేసింది.

రెపోరేటుకు అనుగుణంగా గృహ, వాహన, ఎంఎస్​ఎంఈ రుణాల వడ్డీ రేట్లను లింక్‌ చేయటం తప్పనిసరి అని బ్యాంకులకు స్పష్టంచేసిందిఆర్​బీఐ. ఈ మేరకు ఓ ప్రకటన విడుదల చేసింది. ప్రస్తుత ఎంసీఎల్​ఆర్​ విధానం ప్రకారం బ్యాంకులిచ్చే రుణాలపై వడ్డీ రేట్ల సవరణ సంతృప్తికరంగా లేదని పేర్కొంది. ఈ కొత్త విధానాన్ని అక్టోబర్‌ 1 నుంచి అమలు చేయాలని సూచించింది. వడ్డీ రేట్ల తగ్గింపును వెంటనే రుణగ్రహీతలకు బదలాయించే లక్ష్యంతో ఈ ఉత్తర్వులు జారీ చేసినట్లు తెలుస్తోంది.

ఆర్​బీఐ రెపో రేటుకు అనుగుణంగా బ్యాంకులు వడ్డీ రేట్లను తగ్గించటం లేదని రిటైల్‌, పారిశ్రామికవర్గాల నుంచి ఫిర్యాదులు వెళ్లాయి. ఆర్థిక మందగమనం నేపథ్యంలో ఇటీవల వివిధ రంగాలకు ఉద్దీపనలు ప్రకటించిన కేంద్ర ఆర్థిక మంత్రి నిర్మలా సీతారామన్‌.... కీలక వడ్డీరేట్లనుఆర్​బీఐ సవరించిన మేరకు బ్యాంకులు కూడా అమలు చేస్తాయని ప్రకటించారు.

ఇదీ చూడండి: స్టాక్​ మార్కెట్లు డీలా- ఆర్థిక మాంద్యం తప్పదా!