'బ్యాంకులకు నిరర్థక ఆస్తులు భారీగా పెరగొచ్చు'

కరోనా వల్ల ప్రపంచవ్యాప్తంగా తీవ్ర సంక్షోభ పరిస్థితులు నెలకొన్నట్లు ఆర్​బీఐ గవర్నర్ శక్తికాంతదాస్ వెల్లడించారు. దేశంలో గత వందేళ్లలో ఎన్నడూ ఇలాంటి సంక్షోభం ఎదురవ్వలేదని తెలిపారు. ప్రస్తుత సంక్లిష్ట పరిస్థితుల్లో తాము ఆర్థిక స్థిరత్వం కోసం అనేక చర్యలు చేపట్టినట్లు పేర్కొన్నారు.

గతేడాది ఫిబ్రవరి నుంచి ఇప్పటి వరకు వడ్డీ రేట్లను 250 బేసిస్ పాయింట్లు తగ్గించినట్లు రిజర్వు బ్యాంక్ గవర్నర్ శక్తికాంత దాస్ వెల్లడించారు. ద్రవ్యలభ్యత పెంచడం, ఆర్థిక స్థిరత్వం కాపాడేందుకు ఈ స్థాయిలో వడ్డీ రేట్లు తగ్గించినట్లు తెలిపారు. కరోనా సంక్షోభం వల్ల ఈ ఏడాది ఫిబ్రవరి నుంచే.. 135 బేసిస్ పాయింట్ల వడ్డీ తగ్గించిన విషయాన్ని దాస్ గుర్తు చేశారు. ఎస్​బీఐ బ్యాంకింగ్, ఎకనమిక్​ కాం​క్లేవ్​లో పాల్గొన్న ఆయన ఈ విషయాలు చెప్పుకొచ్చారు.

మార్కెట్లో విశ్వాసం నింపేందుకు ద్రవ్య లభ్యత పెంచే దిశగా అనేక నిర్ణయాలు తీసుకున్నామని చెప్పారు. ఇప్పటి వరకు ఆర్‌బీఐ తీసుకున్న విధానపరమైన నిర్ణయాలు ఫలితాలిస్తున్నాయని చెప్పారు దాస్​.

''గడిచిన వందేళ్ల కాలంలోనే ఆరోగ్యం, ఆర్థిక పరంగా కొవిడ్-19 అతిపెద్ద సంక్షోభం. ఉపాధి, సహా ఉత్పత్తిపై ఇది ప్రభావం చూపింది. ప్రపంచవ్యాప్తంగా కార్మిక కారక్యకలాపాలు, పెట్టుబడులపై కరోనా సంక్షోభం తీవ్రంగా పడింది. ఈ సంక్షోభం వల్ల బ్యాంకులకు నిరర్థక ఆస్తులు (ఎన్​పీఏలు)పెరగటం, మూలధనం వ్యయాల్లో తగ్గుదల వంటి సమస్యలు ఎదురుకావచ్చు.''

-శక్తికాంత దాస్​, ఆర్​బీఐ గవర్నర్.

ఇదీ చూడండి:జీవనకాల గరిష్ఠాలకు ప్రభుత్వ రుణాలు, ద్రవ్యలోటు!