'పద్దు 2020తో 5 ట్రిలియన్ల ఆర్థిక వ్యస్థకు పునాది'

దేశ ఆర్థిక వ్యవస్థను 5 ట్రిలియన్​ డాలర్లకు చేర్చేందుకు బడ్జెట్​ 2020-21 ద్వారా పునాదులు వేశామని కేంద్ర ఆర్థిక మంత్రి నిర్మలా సీతారామన్​ తెలిపారు. పద్దులో ప్రవేశపెట్టిన పలు సంస్కరణల ద్వారా ఇది సాధ్యమవుతుందని ఆమె ధీమా వ్యక్తం చేశారు.

2024-25 కల్లా దేశాన్ని 5 ట్రిలియన్​ డాలర్ల ఆర్థిక వ్యవస్థగా తీర్చిదిద్దడమే లక్ష్యంగా ముందుకు సాగుతోంది భాజపా ప్రభుత్వం. ఇటీవలే ప్రవేశ పెట్టిన వార్షిక బడ్జెట్​ను 5 ట్రిలియన్​ డాలర్ల ఆర్థిక వ్యవస్థ సంకల్పానికి పునాదిగా అభివర్ణించారు ఆర్థికమంత్రి నిర్మలా సీతారామన్.

వినియోగం పెంచడం, మౌలిక సదుపాయాల కల్పనపై పెట్టబడుల ద్వారా ఆస్తులు కూడబెట్టడం వంటివాటిపై దృష్టి సారించినట్లు కోల్​కతాలో నిర్వహించిన సమావేశంలో ఆమె పేర్కొన్నారు.

అదే విధంగా జీఎస్టీ రేట్లను ప్రతి మూడు నెలలకోసారి కాకుండా.. ఏడాదిలో ఒకసారి నిర్వహించే విదంగా హేతుబద్దీకరించాలని జీఎస్టీ మండలికి ప్రతిపాదన పంపినట్లు తెలిపారు.

గ్రామీణ ప్రాంతాల సమస్యల గురించి మాట్లాడుతూ.. ఈ పరిస్థితిని ఎదుర్కొనేందుకు 16 ప్రధాన 'యాక్షన్​ పాయింట్ల'ను పద్దులో ప్రకటించినట్లు ఆర్థిక మంత్రి తెలిపారు. ఇవన్నీ కలిసి దేశాన్ని 5 ట్రిలియన్​ డాలర్ల ఆర్థిక వ్యవస్థగా రూపొందించేందుకు ఉపయోగపడతాయని ఆమె ఆశాభావం వ్యక్తం చేశారు.

జీఎస్టీ పరిధిలోకి పెట్రోలియం ఉత్పత్తులు రావాలంటే..

పెట్రోలియం ఉత్పత్తులపై జీఎస్టీ అమలు కావాలంటే రాష్ట్రాలు, జీఎస్టీ కౌన్సిల్‌ కలిసి అంగీకారం తెలిపాల్సి ఉంటుందన్నారు ఆర్థిక మంత్రి.

‘ఇది జీఎస్టీ కౌన్సిల్‌, రాష్ట్రాలపై ఆధారపడి ఉంటుంది. వాళ్లెప్పుడు అంగీకారం తెలిపితే అప్పుడు అమల్లోకి వస్తుంది’’ అని అన్నారు. పెట్రోలియం ఉత్పత్తులు జీఎస్టీతో కలిపి ఉన్నాయని అయితే, వాటిపై ఎలాంటి పన్ను లేదని తెలిపారు. రేటుపై జీఎస్టీ కౌన్సిల్‌ తుది నిర్ణయం తీసుకుంటుందని పేర్కొన్నారు. అదే సమయంలో పెట్రోలియం ఉత్పత్తులు జీఎస్టీ కిందకు తెచ్చేందుకు రాష్ట్రాలు అంగీకరిస్తే అందుకు చట్ట సవరణ అవసరం లేదని నిర్మలా సీతారామన్‌ వెల్లడించారు.

ఇదీ చూడండి:సర్జికల్​ మాస్క్​ల ఎగుమతిపై​ నిషేధం ఎత్తివేత