జూన్​లోనూ పారిశ్రామికోత్పత్తి నేల చూపులు

పారిశ్రామికోత్పత్తి సూచీ గత ఏడాది 6వ నెలతో పోలిస్తే.. 2020 జూన్​లో 16.6 శాతం తగ్గింది. లాక్​డౌన్​ కారణంగా తయారీ, గనులు, విద్యుత్​ రంగాల్లో కార్యకలాపాలు తగ్గిపోవడం ఇందుకు ప్రధాన కారణం.

లాక్‌డౌన్‌ కారణంగా తయారీ రంగం, గనుల తవ్వకం, విద్యుత్‌ ఉత్పాదన మందగించి.. జూన్​లో(గత ఏడాది ఇదే సమయంతో పోలిస్తే) పారిశ్రామికోత్పత్తి 16.6 శాతం తగ్గింది. కేంద్రం విడుదల చేసిన తాజా గణాంకాల్లో ఈ విషయం వెల్లడైంది.

పారిశ్రామికోత్పత్తి సూచీ (ఐఐపీ) ప్రకారం.. జూన్​లో తయారీ రంగంలో 17.1 శాతం తగ్గుదల నమోదైంది. గనుల రంగంలో 19.8 శాతం, విద్యుత్‌ ఉత్పాదన రంగంలో 10 శాతం క్షీణత నమోదైంది.

నెలవారీ ప్రాతిపదికన మాత్రం ఐఐపీ భారీగా మెరుగైంది. ఏప్రిల్​లో 53.6 వద్ద ఉన్న సూచీ.. మేలో 89.5 వద్దకు.. జూన్​లో 107.8 వద్దకు పెరిగింది. అయితే లాక్​డౌన్​ సమయంలో గణాంకాలతో.. లాక్​డౌన్ తర్వాతి లెక్కలను పోల్చడం సరికాదని కేంద్రం అభిప్రాయపడింది.

ఇదీ చూడండి:లాక్​డౌన్ సడలించినా ఆఫీసుకు వెళ్లాలంటే భయమే!