దేశంలోని ఆరు ప్రభుత్వ రంగ బ్యాంకులు రుణాలపై వడ్డీ రేట్లను తగ్గించాయి. రిజర్వ్ బ్యాంక్ ఆఫ్ ఇండియా(ఆర్బీఐ) రెపో రేటును తగ్గించిన నేపథ్యంలో బ్యాంక్ ఆఫ్ ఇండియా, ఒరియంటల్ బ్యాంక్ ఆఫ్ కామర్స్, బ్యాంక్ ఆఫ్ మహారాష్ట్ర సహా పలు బ్యాంకులు ఎంసీఎల్ఆర్ను సుమారు 25 బేసిస్ పాయింట్లు తగ్గిస్తున్నట్లు ప్రకటించాయి.
బ్యాంకుల తాజా నిర్ణయంతో గృహ, వాహన, ఇతర రుణాలు చౌకగా లభించనున్నాయి.
ఐఓబీ..
ఆర్బీఐ రెపో రేటును 25 బేసిస్ పాయింట్లు తగ్గించిన నేపథ్యంలో రిటైల్, సూక్ష్మ, చిన్న పరిశ్రమలకు ఈ ప్రయోజనం చేకూరేలా వడ్డీ రేట్లను 8 శాతం చేస్తున్నట్లు ఇండియన్ ఓవర్సీస్ బ్యాంకు ప్రకటించింది. ఈ కొత్త వడ్డీ రేట్లు నవంబర్ 1 నుంచి అమలులోకి వస్తాయని తెలిపింది.
బీఓఐ..
బ్యాంక్ ఆఫ్ ఇండియా తన రోజువారీ ఎంసీఎల్ఆర్ను 15 బేసిస్ పాయింట్లు, సంవత్సరకాల ఎంసీఎల్ఆర్ను 5 బేసిస్ పాయింట్లు తగ్గించినట్లు వెల్లడించింది. ఈ కొత్త రేట్లు నేటి నుంచి అమలులోకి వస్తాయని తెలిపింది.
బీఓఎం..
బ్యాంక్ ఆఫ్ మహారాష్ట్ర వడ్డీ రేట్లను 10 బేసిస్ పాయింట్లు తగ్గించింది. ఈ నిర్ణయంతో ఎంసీఎల్ఆర్ 8.40 శాతానికి చేరుకుందని తెలిపింది. అక్టోబర్ 8 నుంచి ఈ నిబంధనలు అమలులోకి వస్తాయని పేర్కొంది.
సీబీఐ..
పండుగ సీజన్, రిటైల్, సూక్ష్మ, చిన్న పరిశ్రమల వర్గాల వినియోగదారులకు ప్రయోజన చేకూర్చేందుకు సెంట్రల్ బ్యాంక్ ఆఫ్ ఇండియా రెపో ఆధారిత వడ్డీ రేట్లు (ఆర్బీఎల్ఆర్)ను 25 బేసిస్ పాయింట్లు తగ్గించింది. నేటి నుంచి అమలులోకి వస్తుంది. ఒరియంటల్ బ్యాంక్ సంవత్సర కాల రుణాల వడ్డీ రేట్లను 8.35 శాతానికి తగ్గించింది.
