'జీఎస్​టీతో రాష్ట్రాల లోటు తగ్గదు'

జీఎస్​టీ వల్ల రాష్ట్రాల లోటు తగ్గే అవకాశం లేనట్లు రేటింగ్​ సంస్థ 'ఎస్​ అండ్​ పీ' తెలిపింది. సామాజిక, మూలధన వ్యయాల పెరుగదలే దీనికి కారణమని వెల్లడించింది.

వస్తు సేవల పన్ను (జీఎస్​టీ) వల్ల రాష్ట్రాల లోటు తగ్గుతుందని అంచనా వేసినప్పటికీ ఆ అవకాశం లేదని అంతర్జాతీయ రేటింగ్​ సంస్థ ఎస్​ అండ్​ పీ తెలిపింది. దీనికి సామాజిక, మూలధన వ్యయాల పెరుగుదలే కారణమని 'పబ్లిక్​ ఫినాన్స్​ సిస్టమ్​ ఓవర్​వ్యూ: ఇండియన్​ స్టేట్స్​' అనే నివేదికలో వెల్లడించింది.

" జీఎస్​టీ వల్ల పన్ను కట్టే వారి సంఖ్య పెరిగి... ప్రభుత్వ ఆదాయం కూడా అధికమౌతుందని రాష్ట్రాలు అంచనా వేశాయి. రాష్ట్ర ప్రభుత్వాలు సామాజిక, మూలధన వ్యయం చేయాల్సిన పరిస్థితి ఉన్న దృష్ట్యా అవి ఖర్చును తగ్గించుకోలేకపోతున్నాయి. దీనివల్ల ఆదాయం, వ్యయం మధ్య వ్యత్యాసం మునుపటిలానే అధికంగానే ఉంది " అని తెలిపింది.

భారత్​లో విధానాల అమలు ఇంకా తగిన స్థాయిలో జరగడంలేదని నివేదిక స్పష్టం చేసింది. ఎఫ్​ఆర్​బీఎమ్​ చట్టానికి ఇటీవల చేసిన సవరణలు కీలక విధాన నిర్ణయమని తెలిపింది. దీని ప్రకారం ప్రభుత్వ రుణ లక్ష్యం జీడీపీలో 60 శాతం. ఇందులో కేంద్ర, రాష్ట్ర ప్రభుత్వాల వాటాల నిష్పత్తి 40:20గా ఉండొచ్చు.

ప్రభుత్వ ద్రవ్య లోటును కీలక లక్ష్యంగా పరిగణించినప్పటికీ... ఎఫ్​ఆర్​బీఎమ్​ కమిటీకి ప్రతిపాదనలు అమలు చేసే అధికారం లేదని తెలిపింది.

ఇదీ చూడండి: రైతులకే కాదు... సామాన్యులకూ రుణమాఫీ!