ఈ సారైనా పరిహారానికి పరిష్కారం లభించేనా?

జీఎస్​టీ నష్టపరిహారాన్ని కేంద్రమే భరించాలని పలు భాజపాయేతర పాలిత రాష్ట్రాలు డిమాండ్ చేస్తున్న వేళ సోమవారం జీఎస్​టీ మండలి 43వ భేటీ జరగనుంది. ఇప్పటికే పలుసార్లు ఈ అంశంపై మండలిలో చర్చ జరగగా ఏ నిర్ణయం తీసుకోలేదు. ఈ సారైనా దీనిపై కేంద్రం, రాష్ట్రాల మధ్య ఏకాభిప్రాయం కుదురుతుందా లేదా అనేది వేచి చూడాలి.

రాష్ట్రాలకు వస్తు, సేవల పన్ను (జీఎస్​టీ) పరిహారం చెల్లింపు అంశంపై చర్చించేందుకు.. జీఎస్​టీ మండలి సోమవారం మరోసారి భేటీ కానుంది. కేంద్ర ఆర్థిక మంత్రి నిర్మలా సీతారామన్ అధ్యక్షతన ఈ సమావేశం జరగనుంది. ఈ అంశంపై చర్చకు రావడం ఇది వరుసగా మూడో సారి. రాష్ట్రాల ఆర్థిక మంత్రులు కూడా ఈ సమావేశంలో పాల్గొననున్నారు.

పరిహారంపై ఏకాభిప్రాయానికి ప్యానెల్​ను ఏర్పాటు చేయాలన్న భాజపాయేతర పాలిత రాష్ట్రాలు సూచించిన అంశంపై చర్చించే అవకాశముందని విశ్వసనీయ వర్గాల సమాచారం.

గత వారం సమావేశంలో చర్చాంశాలు..

గత వారం జరిగిన 42వ సమావేశంలో కార్లు, పొగాకు వంటి ఉత్పత్తులపై సర్​ ఛార్జీని 2022 వరకు పెంచాలని మండలి నిర్ణయం తీసుకుంది. కానీ రాష్ట్రాలకు కలిగే జీఎస్​టీ నష్టాన్ని భర్తీ చేసే అంశంపై ఏకాభిప్రాయం కుదరలేదు.

• గత వారం జీఎస్​టీ మండలి భేటీ పూర్తి వివరాలను ఇక్కడ చూడండి