దేశంలో లాక్డౌన్ కారణంగా మే నెలకు గాను కొన్ని వస్తువుల రిటైల్ ద్రవ్యోల్బణ గణాంకాలను విడుదల చేసింది ప్రభుత్వం. వీటిలో ఆహార ద్రవ్యోల్బణం 9.28 శాతం నమోదైనట్లు తెలిపింది.
వినియోగదారుల ఆహార ధరల సూచీ (సీఎఫ్పీఐ) గ్రామీణ ప్రాంతాల్లో 9.69 శాతం, పట్టణాల్లో 8.36 శాతంగా నమోదయ్యాయి. మొత్తంగా ఆహార ద్రవ్యోల్బణం 9.28 శాతంగా ఉంది.
గతేడాది మే నెలలో ఆహార ద్రవ్యోల్బణం 1.83 శాతం ఉన్నట్లు తెలిపింది.
పరిమిత లావాదేవీల కారణంగా..
కరోనా లాక్డౌన్ నేపథ్యంలో ప్రభుత్వం వరుసగా రెండో నెల రిటైల్ ద్రవ్యోల్బణంలో కొన్ని వస్తువుల డేటానే విడుదల చేసింది. మార్కెట్లలో ఉత్పత్తులకు సంబంధించి పరిమిత లావాదేవీల కారణంగా రిటైల్ ద్రవ్యోల్బణంలోని కొన్ని సమూహాల రేట్లనే లెక్కించామని జాతీయ గణాంకాల కార్యాలయం (ఎన్ఎస్ఓ) తెలిపింది.
