దేశంలోని సామాన్య, మధ్య తరగతికి ఊరట కలిగించేలా కేంద్రం నిర్ణయం తీసుకుంది. చిన్న మొత్తాల పొదుపు పథకాల వడ్డీ రేట్లను యథాతథంగా ఉంచుతున్నట్లు తెలిపింది. 2021 జులై-సెప్టెంబర్ త్రైమాసికానికి వడ్డీ రేట్లలో ఎలాంటి మార్పులు ఉండబోవని స్పష్టం చేసింది. ఇందుకు సంబంధించి కేంద్ర ఆర్థిక శాఖ నోటిఫికేషన్ జారీ చేసింది. ఇప్పటివరకు కొనసాగిన రేట్లే.. రెండో త్రైమాసికానికీ వర్తిస్తాయని వివరించింది.
2021-22 ఆర్థిక సంవత్సరానికి డిపాజిట్ల వడ్డీ రేట్లను తగ్గిస్తూ ఈ ఏడాది ఏప్రిల్కు ముందు కేంద్ర ఆర్థిక శాఖ నోటిఫికేషన్ జారీ చేసింది. అయితే, 12 గంటలు గడవకుండానే ఆ నోటిఫికేషన్ను వెనక్కి తీసుకుంది. 2020-21 నాలుగో త్రైమాసికంలో ఉన్న వడ్డీ రేట్లనే ఈ ఆర్థిక సంవత్సరం క్యూ1కు కొనసాగించింది. తాజాగా వాటినే క్యూ2కూ వర్తింపజేయనున్నట్లు స్పష్టం చేసింది.