ప్రపంచ ఆర్థిక వ్యవస్థకు కరోనా వైరస్ రూపంలో భారీ స్థాయిలో ప్రమాదం ఏర్పడిందని అంతర్జాతీయ ద్రవ్య నిధి (ఐఎంఎఫ్) సంస్థ హెచ్చరించింది. కరోనా ప్రభావంతో ప్రపంచ ఆర్థిక వ్యవస్థ ఈ ఏడాది నెమ్మదిస్తుందని తెలిపింది. గతేడాది వృద్ధి రేటు 2.9 శాతానికన్నా తక్కువగా నమోదవుతుందని తెలిపింది.
కరోనాపై స్పందించిన ఐఎంఎఫ్ అధ్యక్షుడు క్రిస్టాలినా జార్జీవా పరిస్థితులపై ఆందోళన వ్యక్తం చేశారు.
"కరోనా ప్రాంతీయ సమస్య కాదు. ప్రపంచానికే ప్రమాదం. దీని పరిష్కారానికి అన్ని దేశాలు కలిసిరావాలి. 2020లో ప్రపంచ వృద్ధి రేటు గతేడాది కన్నా కుదించుకుపోతుంది. "
-క్రిస్టాలినా జార్జీవా, ఐఎంఎఫ్ అధ్యక్షుడు
ఈ ఏడాది ప్రపంచ వృద్ధి రేటు 3.3 శాతంగా ఉంటుందని జనవరిలో ఐఎంఎఫ్ ప్రకటించింది. కొత్త అంచనాలను బట్టి చూస్తే అరశాతం వృద్ధి రేటు తగ్గిపోతుంది.
ఫెడరల్ బ్యాంక్ ఆందోళన..
అమెరికా పరిశ్రమలపై కరోనా ప్రభావం తీవ్రంగా ఉంటుందని ఫెడరల్ బ్యాంక్ ఆందోళన వ్యక్తం చేసింది. ఇప్పటికే పర్యటకం, ప్రయాణ రంగాలను దెబ్బతీసిన వైరస్.. అమెరికా పరిశ్రమలకు సరుకుల రవాణా, దేశవ్యాప్త వ్యాపారాలపై ప్రభావం చూపిస్తుందని హెచ్చరించింది.
ఇతర దేశాల్లో వేగంగా..
చైనాలో కరోనా ప్రభావం రోజురోజుకు తగ్గుముఖం పడుతున్నా... ఇతర దేశాలకు వేగంగా వ్యాపిస్తోంది. వైరస్ వ్యాప్తి చెందిన దేశాల్లో మరణాల సంఖ్య పెరుగుతోంది. చైనా తర్వాత ఇటలీలో 107 మంది మరణించారు. ఇరాన్లో మృతుల సంఖ్య 92కు చేరుకుంది. ప్రపంచవ్యాప్తంగా 3,100 మందికిపైగా కరోనా బారిన పడి మృతిచెందారు.
