కొంత కాలంగా పడిపోతున్న ప్రపంచ వృద్ధి ఈ ఏడాది చివరి ఆరు నెలల్లో మళ్లీ పుంజుకోనుందని జీ20 దేశాల ఆర్థిక వేత్తలు అంచనా వేశారు. వివిధ దేశాల కేంద్ర బ్యాంకులు వడ్డీ రేట్లు తగ్గించడం, అమెరికా - చైనా మధ్య వాణిజ్య ఒప్పందం కుదిరే అవకాశాలు ఉన్నందున ఇది సాధ్యమౌతుందని అభిప్రాయపడ్డారు.
అంతర్జాతీయ ద్రవ్య నిధి(ఐఎంఎఫ్), ప్రపంచ బ్యాంకు వసంత కాల సమావేశం వాషింగ్టన్లో జరిగింది. దీనికి వివిధ దేశాల ఆర్థిక ప్రతినిధులు హాజరయ్యారు. వీరంతా ప్రపంచ వృద్ధి నెమ్మదించినట్లు అంగీకరించారు. అమెరికా - చైనా మధ్య వాణిజ్య యుద్ధం వల్ల ప్రపంచ వృద్ధికి ముప్పు పొంచి ఉందని ఆందోళన వ్యక్తం చేశారు.
ఈ సందర్భంగా జీ20 దేశాల ప్రతినిధులు భేటీ అయ్యారు. జీ20 దేశాలకు ప్రస్తుతం జపాన్ అధ్యక్షత వహిస్తోంది. ఇటీవల ప్రపంచ వృద్ధిని తగ్గిస్తూ ఐఎంఎఫ్ అంచనాలు విడుదల చేసింది. ఈ గణాంకాలు నిజమయ్యే ఆస్కారం ఎక్కువగా ఉందని జీ20 దేశాల అధికారులు ఆశిస్తున్నట్లు.. జపాన్ కేంద్ర బ్యాంకు సారథి తెలిపారు. అదే సమయంలో ప్రతీ దేశం తనవంతు ప్రయత్నం చేయాలని సూచించారు.
తగ్గిన వృద్ధి
ఇటీవల 2019కి సంబంధించి ప్రపంచ వృద్ధిని 3.6 శాతం నుంచి 3.3 శాతానికి సవరించింది ఐఎంఎఫ్. ఆర్థిక మాంద్యం సంభవించిన 2009 అనంతరం ఇదే అత్యల్పం. కానీ 2020లో వృద్ధి మళ్లీ 3.6 శాతానికి ఎగబాకుతుందని ఆశాభావం వ్యక్తం చేసింది ఈ సంస్థ.
