వ్యక్తిగత పాలసీ vs ఫ్యామిలీ ఫ్లోటర్.. ఏది బెటర్​?

కరోనా వల్ల ఆరోగ్య బీమా అవసరం ప్రతి ఒక్కరికీ తెలిసివచ్చింది. దీనితో చాలా మంది ఆరోగ్య బీమా తీసుకునేందుకు చూస్తున్నారు. కుటుంబ సభ్యులందరికీ బీమా అందేలా ఫ్యామిలీ ఫ్లోటర్ పాలసీ తీసుకోవటం ఉత్తమమా? లేక వ్యక్తిగత పాలసీ ఉత్తమమా?

పెట్టుబడులు ప్రారంభించటం కంటే ముందే ఆరోగ్య బీమా తీసుకోవాలని వ్యక్తిగత ఆర్థిక సలహాదారులు సూచిస్తుంటారు. వ్యక్తిగత ఆరోగ్య బీమా లేదా కుటుంబానికి వర్తించేలా పాలసీ తీసుకోవటంపై నిర్ణయం తీసుకోవాలి. ఈ రెండూ కూడా వైద్యచికిత్సకు పెట్టిన ఖర్చులను పాలసీదారుడికి అందిస్తుంటాయి. బీమా మొత్తం(సమ్ ఇన్సూర్డ్) అంటే గరిష్ఠంగా బీమా కంపెనీ పాలసీదారుడికి చెల్లించే మొత్తం. ఉదాహరణకు రూ. 10 లక్షల బీమా ఉంటే ఆస్పత్రి బిల్లు రూ. 2 లక్షలు అయినట్లయితే ఆ మేరకు బీమా సంస్థ చెల్లిస్తుంది. మిగతా రూ. 8 లక్షలు మరో చికిత్సకు ఉపయోగించుకోవచ్చు.

ఫ్యామిలీ ఫ్లోటర్, వ్యక్తిగత ఆరోగ్య బీమాలో ఎంపిక చేసుకోవటం ఒక్కోసారి కష్టం అవుతుంది. కింది అంశాల ఆధారంగా నిర్ణయించుకోవటం ఉత్తమం.

వ్యక్తిగత ఆరోగ్య బీమా

దీన్ని ఒక్కొక్కరు వ్యక్తిగతంగా తీసుకోవాల్సి ఉంటుంది. భార్యాభర్తలు, పిల్లలు, తల్లిదండ్రులు.. ఇలా ఎంత మంది ఉంటే అన్ని పాలసీలు తీసుకోవాల్సి ఉంటుంది. ప్రతి వ్యక్తి వయస్సు, సంబంధిత బీమా ప్రకారం ప్రీమియం ఉంటుంది. కుటుంబంలోని ఒకరి కంటే ఎక్కువ మంది సభ్యులకు ఒకేసారి బీమా చేయించుకుంటే ప్రీమియంపై బీమా కంపెనీలు 10 శాతం డిస్కౌంట్ ఇస్తున్నాయి. ఒక్క సభ్యుడు క్లెయిమ్ చేసుకుంటే మరో వ్యక్తి క్లెయిమ్​పై ఎలాంటి ప్రభావం ఉండదు.

ఫ్యామిలీ ఫ్లోటర్ పాలసీ

ఇందులో ఒకే పాలసీ ద్వారా ఒకటి కంటే ఎక్కువమంది కుటుంబ సభ్యులకు ఆరోగ్య బీమా కవరేజీ ఉంటుంది. దీనికి సంబంధించి ఒకే ప్రీమియం చెల్లించాల్సి ఉంటుంది. అంటే ఇంట్లో తల్లిదండ్రులు, పిల్లలు ఉంటే.. అందరు కలిసి ఒకే పాలసీ తీసుకోవచ్చు. సాధారణంగా ఆరోగ్య బీమా పాలసీల ప్రీమియం కుటుంబంలోని పెద్ద వారి వయస్కుల వారి ఆధారంగా నిర్ణయమవుతుంటుంది.

తేడా..

వ్యక్తిగత పాలసీ ద్వారా ఒక్కరు మాత్రమే క్లెయిమ్ చేసుకోవచ్చు. ఫ్యామిలీ ఫ్లోటర్ హెల్త్ ప్లాన్ ప్రకారం, బీమా మొత్తం ఒక్కరే క్లెయిమ్ చేసుకోవచ్చు లేదా అందరూ కలిసి మొత్తంగా క్లెయిమ్ చేసుకోవచ్చు. కుటుంబంలోని సభ్యులందరూ ఒకేసారి అనారోగ్యం పాలయ్యే అవకాశాలు చాలా తక్కువ. ఇదే సూత్రాన్ని ఫ్యామిలీ ఫ్లోటర్ పాలసీ ఉపయోగించుకుంటుంది.

కుటుంబంలో నలుగురు సభ్యులు ఉన్నట్లయితే ఒక్కొక్కరికి రూ. 2 లక్షల వ్యక్తిగత పాలసీ తీసుకోవటం కంటే కుటుంబం మొత్తానికి రూ. 8 లక్షల పాలసీ తీసుకోవటం ఉత్తమమని వ్యక్తిగత ఆర్థిక నిపుణులు సూచిస్తున్నారు. దీనివల్ల ఒక్కరి చికిత్స కోసం రూ. 2 లక్షల కంటే ఎక్కువ అవసరం అయినా కూడా బీమా సంస్థ భరిస్తుంది.

ధర

30 ఏళ్ల వ్యక్తికి రూ. 10 లక్షల కవరేజీకి వార్షికంగా ప్రీమియం కంపెనీని బట్టి రూ. 9వేల నుంచి రూ. 12వేల వరకు ఉంది. డిస్కౌంట్ తీసేస్తే ఇంకా కొంచెం తగ్గుతుంది. భార్యాభర్తలు ఇద్దరికి ఫ్యామిలీ ఫ్లోటర్ పాలసీ ప్రీమియం కూడా అదే స్థాయిలో ఉంటుంది. కొన్ని సందర్భాల్లో ఇంకా తగొచ్చు అని వ్యక్తిగత ఆర్థిక విశ్లేషకులు చెబుతున్నారు.

పిల్లల వయసు

ఫ్యామిలీ ఫ్లోటర్ పాలసీలో తల్లిదండ్రులు వయసు పెరిగినా అందులోనే కొనసాగవచ్చు. కానీ పిల్లల కొంత వయసు అనంతరం వేరే పాలసీ తీసుకోవాల్సి ఉంటుంది. కంపెనీని బట్టి ఈ వయస్సు 18, 25గా ఉంటుంది. ఈ వయసు అనంతరం వాళ్లను పెద్ద వారిగా కంపెనీలు భావిస్తాయి. పిల్లలు పెళ్లి చేసుకున్నట్లయితే వారికి ప్రత్యేకంగా ఫ్యామిలీ ఫ్లోటర్ పాలసీ తీసుకోవటం ఉత్తమం. పిల్లలు ఫ్యామిలీ ఫ్లోటర్ నుంచి వ్యక్తిగత పాలసీకి మారితే.. వెయిటింగ్ పీరియడ్ ఉండదు.

ఏం చేయాలి?

చిన్న పిల్లలు ఉన్నట్లయితే ఫ్యామిలీ ఫ్లోటర్ ఉత్తమమని బీమా నిపుణులు చెబుతున్నారు. తక్కువ ప్రీమియంతో ఫ్లోటర్ పాలసీ ద్వారా మంచి కవరేజీ పొందొచ్చని అంటున్నారు. ఎలాంటి ప్రధాన అనారోగ్య చరిత్ర లేనటువంటి వారికి ఫ్యామిలీ ఫ్లోటర్ మంచి ఎంపిక అని వారు సూచిస్తున్నారు. ఎవరికైనా ప్రధాన అనారోగ్య సమస్య ఉన్న చరిత్ర ఉంటే వ్యక్తిగత పాలసీ తీసుకోవాలని వారు చెబుతున్నారు.

ఇదీ చదవండి:విద్యుత్ వాహనాలే కాదు.. ఇవీ పర్యావరణ హితమే..!