ఏప్రిల్​లో ఎగుమతులు పెరిగినా.. వాణిజ్య లోటు 120%

భారత్​ నుంచి గత నెల మొత్తం 30.21 బిలియన్​ డాలర్ల విలువైన ఎగుమతులు జరిగినట్లు వాణిజ్య మంత్రిత్వ శాఖ వెల్లడించింది. ఇదే సమయంలో దిగుమతుల విలువ 45.45 బిలియన్ డాలర్లుగా నమోదైనట్లు తెలిపింది. ఫలితంగా వాణిజ్యలోటు.. 2020 ఏప్రిల్​ నెలతో పోలిస్తే.. గత నెల 120 శాతం పెరిగినట్లు వివరించింది.

ఏప్రిల్​లో భారత ఎగుమతులు రికార్డు స్థాయిలో మూడు రెట్లు పెరిగాయి. గత నెల మొత్తం 30.21 బిలియన్ డాలర్ల విలువైన ఎగుమతులు జరిగినట్లు ఆదివారం విడుదలైన ప్రభుత్వ డేటాలో వెల్లడైంది. గత ఏడాది ఏప్రిల్​లో 10.17 బిలియన్ డాలర్ల విలువైన ఎగుమతులు మాత్రమే జరిగాయి.

దిగుమతుల్లోనూ..

ఏప్రిల్​లో 45.45 బిలియన్​ డాలర్ల విలువైన దిగుమతులు జరిగాయి. గత ఏడాది ఇదే నెలలో 17.09 బిలియన్ డాలర్ల దిగుమతులు చేసుకుంది భారత్.

ఎగుమతులు పెరిగినప్పటికీ.. దిగుమతులూ ఎక్కువగా ఉన్న కారణంగా ఏప్రిల్​లో వాణిజ్యలోటు 15.24 బిలియన్ డాలర్లుగా నమోదైంది. గత ఏడాది ఏప్రిల్​తో (6.92 బిలియన్ డాలర్లు) పోలిస్తే వాణిజ్యలోటు 120.34 శాతం అధికంగా ఉన్నట్లు ప్రభుత్వ డేటా స్పష్టం చేస్తోంది.

మరిన్ని..

• గత నెల 10.8 బిలియన్​ డాలర్ల చమురు దిగుమతి జరిగింది.
• రత్నాలు, ఆభరణాలు, జనపనార, ఇంజనీరింగ్ ఉత్పత్తులు, పెట్రోలియం ఉత్పత్తులు, హ్యాండీక్రాఫ్ట్స్​, లెదర్ వంటి ప్రధాన ఉత్పత్తుల ఎగుమతులు గత నెల సానుకూలంగా ఉన్నాయి.

ఇదీ చదవండి:కారుకు మళ్లీ 'కరోనా' బ్రేకులు- తగ్గిన విక్రయాలు