కరోనా సంక్షోభం వల్ల ఈ ఏడాది దేశ ఆర్థిక వ్యవస్థ తీవ్రంగా నష్టపోనుంది. ఈ విషయంలో ఎటువంటి సందేహం లేదు. చాలా నివేదికలు, పరిశోధనలు ఈ విషయాన్ని ఇప్పటికే స్పష్టం చేశాయి. ఇటీవల ఓ సర్వే ప్రకారం... దిల్లీ, గోవా, తెలంగాణ, హరియాణాలో నివసించే వారి తలసరి ఆదాయంపై ఈ ప్రభావం ఎక్కువగా ఉండనుందని తెలిసింది.
తలసరి ఆదాయాల్లో తగ్గుదల ఇలా..
ఎస్బీఐ సోమవారం విడుదల చేసిన ఎకోరాప్ నివేదిక ప్రకారం.. దేశ రాజధాని దిల్లీలో నివసించే వారు ఈ ఆర్థిక సంవత్సరంలో తమ సగటు ఆదాయంలో రూ.87,223 కోల్పోవచ్చని వెల్లడైంది. ఇది జాతీయ సగటు రూ.27,000తో పోలిస్తే చాలా ఎక్కువ.
ఈ ఆర్థిక సంవత్సరంలో గోవాలో నివసించే వారి తలసరి ఆదాయం అత్యధికంగా రూ.1,05,906 తగ్గొచ్చని ఎస్బీఐ నివేదిక అంచనా వేసింది.
రెండు తెలుగు రాష్ట్రాలు ఆంధ్రప్రదేశ్, తెలంగాణలో తలసరి ఆదాయం నష్టం వరుసగా రూ.47,727, రూ.67,883గా ఉండొచ్చని పేర్కొంది.
బిహార్, అసోంలో నివసించే వారి తలసరి అదాయం అత్యల్పంగా రూ.8,739, రూ.9,800 తగ్గొచ్చని నివేదిక వెల్లడించింది.
రాష్ట్రాల వారీగా ఇలా..
రాష్ట్రాల వారీగా సగటు ఆదాయం తగ్గుదల జీఎస్డీపీ క్షీణత రూ.38 లక్షల కోట్లు!
- ప్రస్తుత ఆర్థిక సంవత్సరానికి సంబంధించి స్థూల రాష్ట్రీయోత్పత్తి (జీఎస్డీపీ) అంచనాల ఆధారంగానే తలసరి ఆదాయంపై ప్రభావాన్ని లెక్కించినట్లు ఎస్బీఐ ఎకోరాప్ తెలిపింది.
- కరోనా సంక్షోభంతో రాష్ట్రాల జీఎస్డీపీ రేటు 16.9 శాతం తగ్గొచ్చని పేర్కొంది ఎస్బీఐ. ఇది దాదాపు రూ.38 లక్షల కోట్లకు సమానం.
- ఈ ఆర్థిక సంవత్సరం దేశ జీడీపీ క్షీణతలో టాప్ 10 రాష్ట్రాల వాటానే 73.8 శాతం ఉంటుందని ఎస్బీఐ నివేదిక అంచనా వేసింది. అందులో మహారాష్ట్ర 14.2 శాతం, తమిళనాడు 9.2 శాతం, ఉత్తర్ప్రదేశ్ 8.2 శాతం చొప్పున వాటా ఉండొచ్చని పేర్కొంది.
నాలుగ త్రైమాసికాల్లోనూ ప్రతికూల వృద్ధే..
- ఇదిలా ఉండగా.. మేలో విడుదల చేసిన అంచనాలతో పోలిస్తే.. తాజా నివేదికలో దేశ జీడీపీ వృద్ధి రేటు క్షీణత అంచనాను 20 శాతం నుంచి 16.5 శాతానికి తగ్గించింది ఎస్బీఐ.
- ప్రస్తుత ఆర్థిక సంవత్సం నాలుగు త్రైమాసికాల్లోనూ ప్రతికూల వృద్ధి.. పూర్తి సంవత్సరానికి రెండంకెల వృద్ధి క్షీణత నమోదు కావచ్చని ఎస్బీఐ అంచనా వేసింది.
- దీనితో ఆగస్టు 31న జాతీయ గణాంక కార్యాలయం(ఎన్ఎస్ఓ) విడుదల చేయనున్న 2020-21 జీడీపీ వృద్ధి రేటు గణాంకాలపై ఆసక్తి పెరిగింది.
రిటైల్ ద్రవ్యోల్బణం జులైలో 6.9 శాతం (ఎన్ఎస్ఓ అధికారిక లెక్కల ప్రకారం) కన్నా ఎక్కువే ఉండొచ్చని ఎస్బీఐ పేర్కొంది. ప్రస్తుతం పరిస్థితుల్లో రిటైల్ ద్రవ్యోల్బణంపై ఎన్ఎస్ఓ ప్రకటించిన లెక్కలు అంచనాలు మాత్రమేనని తెలిపింది. వాస్తవ రిటైల్ ద్రవ్యోల్బణం 7.5 శాతానికిపైగా నమోదై ఉంటుందని అంచనా వేసింది.
జీడీపీ క్షీణత, వేగంగా పెరుగుతున్న ద్రవ్యోల్బణంతో.. వినియోగం, రికవరీ ఆశలు ఆవిరవుతున్నాయని ఎస్బీఐ అభిప్రాయపడింది.
ఇదీ చూడండి:క్యూ1లో జీడీపీ వృద్ధి రేటు 16.5 శాతం క్షీణత!
